30 వేలకు చేరువలో గాజా మృతుల సంఖ్య

దుబాయ్‌: ఇజ్రాయెల్‌-హమాస్‌ మధ్య కాల్పుల విరమణ ఒప్పందం కోసం జరుగుతున్న చర్చలు కొలిక్కి రావడం లేదు. మరోవైపు గాజాపై టెల్‌ అవీవ్‌ దాడులు కొనసాగుతూనే ఉన్నాయి. బుధవారం రాత్రి నుంచి జరుగుతున్న దాడుల్లో 48 మంది పాలస్తీనీయన్లు ప్రాణాలు కోల్పోయారని గాజా ఆరోగ్య విభాగం తెలిపింది. దీంతో మృతుల సంఖ్య 30 వేలకు చేరువయ్యే అవకాశాలు కనిపిస్తున్నాయి. గురువారానికి ఈ సంఖ్య 29,400కు చేరుకుంది. వెస్ట్‌బ్యాంకులోనూ పరిస్థితి ఉద్రిక్తంగానే ఉంది. ఓ చెక్‌ పాయింట్‌ దగ్గర ముగ్గురు పాలస్తీనీయన్లు జరిపిన కాల్పుల్లో ఒకరు ప్రాణాలు కోల్పోయారని, ఐదుగురు గాయపడ్డారని ఇజ్రాయెల్‌ పోలీసులు తెలిపారు.

మంటల్లో మరో వాణిజ్య నౌక

ఎర్రసముద్రంలో హూతీలు మరో దాడికి పాల్పడ్డారు. గురువారం ఎడెన్‌ జలసంధికి సమీపంలో ఓ నౌకపై క్షిపణి ప్రయోగించారు. దీంతో అది మంటల్లో చిక్కుకుంది. అందులోని సిబ్బంది సురక్షితంగా ఉన్నట్లు తెలిసింది.