ఇజ్రాయెల్‌ వైమానిక దాడి

ఏడుగురు లెబనాన్‌ పారామెడిక్స్‌ మృతి
ప్రతిదాడిలో ఒక ఇజ్రాయెలీ మరణం

హెబ్బారియే: దక్షిణ లెబనాన్‌లోని హెబ్బారియేలో మంగళవారం అర్ధరాత్రి ఇజ్రాయెల్‌ జరిపిన వైమానిక దాడిలో ఏడుగురు మృతి చెందారు. లెబనాన్‌ జరిపిన ప్రతి దాడిలో ఒక ఇజ్రాయెలీ మరణించారు. సున్నీ ముస్లింల గ్రూపునకు చెందిన పారామెడిక్స్‌ కేంద్రంపై ఇజ్రాయెల్‌ ఈ దాడి చేసింది. దీంతో ఏడుగురు ఆ గ్రూపు సభ్యులు మరణించారు. మంగళవారం నుంచి రెండు దేశాల మధ్య రాకెట్‌ దాడులు జరుగుతున్నాయి. ఇస్లామిక్‌ ఎమర్జెన్సీ అండ్‌ రిలీఫ్‌ కోర్‌కు చెందినవారు మృతి చెందారు. వారి వివరాలను పారామెడిక్స్‌ అసోసియేషన్‌ వెల్లడించింది. ఈ ఘటన జరిగిన కొన్ని గంటల తర్వాత హెజ్‌బొల్లా ఇజ్రాయెల్‌ ఉత్తర ప్రాంతంలోని కిర్యత్‌ షమోనాపై దాడి చేసింది. ఈ ఘటనలో 25ఏళ్ల వ్యక్తి మృతి చెందారు. మరో వ్యక్తికి స్వల్ప గాయాలయ్యాయి.

వెస్ట్‌బ్యాంకులో మంగళవారం రాత్రి ఇజ్రాయెల్‌ జరిపిన సోదాల సందర్భంగా ముగ్గురు పాలస్తీనీయులు మృతి చెందారు. మిలిటెంట్లు పేలుడు పదార్థాలను విసరగా కాల్పులు జరిపామని ఇజ్రాయెల్‌ సైన్యం వెల్లడించింది. ఈ ఘటనలో ఒకరు మృతి చెందగా, వైమానిక దాడిలో ఇద్దరు మరణించారు. నలుగురు గాయపడ్డారు.