రష్యా డ్రోన్ల కర్మాగారం, రిఫైనరీపై ఉక్రెయిన్‌ దాడి

కీవ్‌: రష్యాలో అతిపెద్ద చమురుశుద్ధి కర్మాగారాల్లో ఒకదానిపై, మరో డ్రోన్ల కర్మాగారంపై ఉక్రెయిన్‌ డ్రోన్లు భారీ దాడికి పాల్పడ్డాయి. యుద్ధం మొదలయ్యాక రష్యా భూభాగంలో తతార్‌స్థాన్‌ వరకు ఉక్రెయిన్‌ వెళ్లి దాడి చేయడం ఇదే  మొదటిసారి అని సంబంధిత వర్గాలు పేర్కొన్నాయి. ఉక్రెయిన్‌కు 1,200 కి.మీ. దూరంలో.. రెండు నగరాలకు చేరువగా ఉన్నచోట్ల ఈ దాడులు చోటుచేసుకున్నాయి. ఇటీవలి కాలంలో రష్యా చమురు కేంద్రాలను ఉక్రెయిన్‌ లక్ష్యంగా చేసుకుంటోంది. దీనిలో భాగంగా ఎక్కువ దూరాల్లోని లక్ష్యాలను డ్రోన్లు చేరుకునేలా ఉక్రెయిన్‌ వర్గాలు ప్రయత్నిస్తున్నాయి. తాజా దాడులు దానిలో భాగమే. సాధారణంగా రష్యా భూభాగంలో జరిగే దాడిపై బాహాటంగా మాట్లాడడానికి ఇష్టపడని ఉక్రెయిన్‌ అధికార వర్గాలు తాజా దాడిని మాత్రం తామే చేసినట్లు తెలిపాయి. సోమవారం రాత్రి దీనిని నిర్వహించినట్లు మంగళవారం వెల్లడించాయి. దాడి వల్ల ఉత్పత్తికి ఎలాంటి అవాంతరం వాటిల్లలేదని రిఫైనరీ అధికారులు తెలిపారు.