సిడ్నీ మాల్‌లో కత్తితో దాడి.. ఆరుగురి దుర్మరణం

పోలీసు కాల్పుల్లో దుండగుడి మృతి

సిడ్నీ: ఆస్ట్రేలియాలోని సిడ్నీ నగరంలో రద్దీగా ఉండే వెస్ట్‌ఫీల్డ్‌ షాపింగ్‌ మాల్‌లోకి దూసుకొచ్చిన ఓ దుండగుడు (40) అక్కడున్నవారిపై కత్తితో విచక్షణారహితంగా దాడి చేశాడు. శనివారం మధ్యాహ్నం జరిగిన ఈ ఘటనలో ఆరుగురు ప్రాణాలు కోల్పోగా, తొమ్మిది నెలల చిన్నారితోపాటు 8 మంది గాయపడ్డారు. మృతుల్లో అయిదుగురు మహిళలు ఉన్నారు. సమాచారం అందుకొన్న పోలీసులు వెంటనే అక్కడికి చేరుకొన్నారు. ఈ సందర్భంగా మహిళా పోలీస్‌ ఇన్‌స్పెక్టర్‌ జరిపిన కాల్పుల్లో నిందితుడు హతమయ్యాడు. మాల్‌లో ఉన్న వినియోగదారులను, సిబ్బందిని బయటకు తరలించిన పోలీసులు నలువైపులా చుట్టుముట్టి హంతకుడిని మట్టుబెట్టారు. ఆగంతకుడు పెద్దకత్తితో మాల్‌లో తిరగడం మీడియా దృశ్యాల్లో కనిపించింది. క్షతగాత్రుల్లో తల్లీబిడ్డ ఉన్నట్లు ప్రత్యక్ష సాక్షులు తెలిపారు. వీరందరినీ ఆసుపత్రికి తరలించారు. చిన్నారికి శస్త్రచికిత్స చేస్తున్నారు. దుండగుడు ఏ ఉద్దేశంతో ఈ దాడికి పాల్పడ్డాడో తెలియరాలేదు. ఉగ్రవాద ఘటన మాత్రం కాదని పోలీస్‌ కమిషనర్‌ కారెన్‌ వెబ్‌ మీడియాకు తెలిపారు.