మేయర్‌కు ఉగ్ర బెదిరింపులు

అమెరికాలో భారత సంతతి మహిళ అరెస్టు

వాషింగ్టన్‌: భారత సంతతికి చెందిన ఓ మహిళ అమెరికాలోని కాలిఫోర్నియా నగర మేయర్‌పై ఉగ్ర బెదిరింపులకు పాల్పడింది. దీంతో మేయర్‌ ఆదేశాల మేరకు ఆమెను అరెస్టు చేశారు. బేకర్స్‌ఫీల్డ్‌లో జరిగిన సమావేశంలో రిద్ధి పటేల్‌ అనే మహిళ పాల్గొన్నారు. ఈ సందర్భంగా మైనారిటీల అణచివేత, ఇజ్రాయెల్‌- హమాస్‌ అంశాలను ప్రస్తావించిన ఆమె.. మేయర్‌ కరెన్‌ గోహ్‌పై విరుచుకుపడ్డారు. ఇజ్రాయెల్‌- హమాస్‌ వ్యవహారంలో కాల్పుల విరమణ తీర్మానానికి మద్దతు ఇవ్వనందుకు ఆమెపై ఆగ్రహం వ్యక్తం చేశారు. అణచివేతకు గురైన మైనారిటీలు హింసాత్మక విప్లవం ద్వారా ఏదో ఒకరోజు అధికారులు అందరినీ అంతం చేస్తారంటూ ఘాటు వ్యాఖ్యలు చేశారు. ప్రభుత్వ కార్యాలయం వద్ద మెటల్‌ డిటెక్టర్లు, అదనపు భద్రతను ఏర్పాటుచేయడం నిరసనకారులను నేరస్థులుగా చిత్రీకరించే ప్రయత్నమేనని తప్పుబట్టారు. మేయర్‌ను హత్య చేసేందుకు ఆమె ఇంట్లో కలుస్తామంటూ ప్రసంగాన్ని ముగించారు. రిద్ధి చేసిన వివాదస్పద వ్యాఖ్యలపై మేయర్‌ ఆగ్రహం వ్యక్తం చేశారు. తక్షణమే ఆమెను అరెస్టు చేయాల్సిందిగా పోలీసులను ఆదేశించారు.