ఇజ్రాయెల్‌తో ఒప్పందానికి వ్యతిరేకంగాగూగుల్‌ కార్యాలయాల్లో ఆందోళనలు

28 మంది ఉద్యోగులపై వేటు

వాషింగ్టన్‌: ఇజ్రాయెల్‌తో కుదుర్చుకున్న క్లౌడ్‌ కంప్యూటింగ్‌ ఒప్పందాన్ని వ్యతిరేకిస్తూ నిరసన చేపట్టిన 28 మంది ఉద్యోగులను గూగుల్‌ సంస్థ విధులు నుంచి తొలగించింది. ఈ ఉద్యోగులంతా కాలిఫోర్నియా, న్యూయార్క్‌లోని సంస్థ కార్యాలయాల్లోకి ప్రవేశించి ఆందోళనలు నిర్వహించారు. ఇలా ధర్నాలు చేస్తున్న తొమ్మిది మందిని బుధవారం పోలీసులు అరెస్టు చేశారు. ఇజ్రాయెల్‌ సైన్యంతో గూగుల్‌ కుదుర్చుకున్న ఈ ఒప్పందం విలువ 1.2 బిలియన్‌ డాలర్లు. ‘‘చాలా తక్కువ సంఖ్యలో ఉద్యోగులు కొన్ని కార్యాలయాల్లోకి ప్రవేశించి ఆందోళన నిర్వహించారు. ఆవరణ వదిలి వెళ్లమని ఎన్ని సార్లు విజ్ఞప్తి చేసినా తిరస్కరించారు. దీంతో కార్యాలయాల భద్రతను దృష్టిలో ఉంచుకొని పోలీసులను పిలిపించి ఖాళీ చేయించాం’’ అని గూగుల్‌ ఒక ప్రకటనలో తెలిపింది.