ఖర్కీవ్‌ స్వాధీనం కోసం ఉక్రెయిన్‌-రష్యా హోరాహోరీ

కీవ్‌: ఖర్కీవ్‌ ప్రాంతంలో రష్యా సేనలు ఆక్రమించుకున్న భూభాగాలను తమ సేనలు తిరిగి స్వాధీనం చేసుకున్నాయని ఉక్రెయిన్‌ అధ్యక్షుడు వొలొదిమిర్‌ జెలెన్‌ స్కీ శుక్రవారం ప్రకటించారు. అయితే, రష్యా దీనికి భిన్నమైన కథనాన్ని వినిపిస్తోంది. ఉక్రెయిన్‌కు చెందిన వావ్‌ చాన్‌స్క్‌ పట్టణాన్ని సగానికిపైగా తమ సేనలు ఆక్రమించాయని రష్యా పార్లమెంటు సభ్యుడు విక్తర్‌ వోడోలాట్‌ స్కీ చెప్పారు. రష్యా ఖర్కీవ్‌పై మే 10న దండెత్తినప్పటి నుంచి ఆ ప్రాంతంలోని వావ్‌ చాన్‌స్క్‌ పట్టణంపై పట్టు కోసం హోరాహోరీ పోరు నడుస్తోంది. ఈ పట్టణాన్ని పూర్తిగా స్వాధీనం చేసుకున్న తరువాత సమీపంలో మరో మూడు పట్టణాలను కైవసం చేసుకోవడానికి ముందుకు కదులుతామని వోడోలాట్‌ స్కీ తెలిపారు. రష్యా, ఉక్రెయిన్‌ వాదనల్లో ఎవరిది నిజమో ఖరారు చేయగల స్వతంత్ర పరిశీలకులెవరూ అందుబాటులో లేరు. ఖర్కీవ్‌ ప్రాంతానికి రాజధాని అయిన ఖర్కీవ్‌ నగరం రష్యా సరిహద్దుకు 20 కిలోమీటర్ల దూరంలోనే ఉంది. నగరం చుట్టుపక్కల గ్రామాలను ఆక్రమించిన రష్యా సేనలు ఖర్కీవ్‌కు ఫిరంగి గుళ్ల వేటు సమీపంలోకి వచ్చాయి. ఉక్రెయిన్‌ ఈ ప్రాంతం నుంచి 11,000 మందిని ఖాళీ చేయించింది.