ఆయుధాలను ఆపినందుకు క్షమించండి

 ఉక్రెయిన్‌ అధ్యక్షుడికి తెలిపిన బైడెన్‌
మీ ప్రత్యర్థులకు ఆయుధాలిస్తాం: పుతిన్‌

పారిస్‌: ఉక్రెయిన్‌ ప్రజలకు అమెరికా అధ్యక్షుడు బైడెన్‌ క్షమాపణలు చెప్పారు. ఆయుధాలకు అవసరమైన నిధులను సకాలంలో పంపించకపోవడంతో ఖర్కివ్‌లో రష్యా ఆక్రమణలు కొనసాగాయని, అందులో తన బాధ్యత కూడా ఉందని అన్నారు. అమెరికా కాంగ్రెస్‌లో విభేదాల కారణంగా ఉక్రెయిన్‌ ఆయుధ ప్యాకేజీ కొన్ని నెలల పాటు నిలిచిపోయిన సంగతి తెలిసిందే. ఇటీవలే ఆమోదం పొందింది. అయితే ఆ సమయంలో రష్యా దూకుడు పెంచింది. ముఖ్యంగా ఖర్కివ్‌లోని చాలా ప్రాంతాలను ఆక్రమించింది. రెండో ప్రపంచయుద్ధానికి సంబంధించిన డీ డే ఉత్సవాల్లో హాజరయ్యేందుకు పారిస్‌ వచ్చిన బైడెన్‌ను జెలెన్‌స్కీ కలిశారు. ఈ సందర్భంగా అమెరికా అధ్యక్షుడు క్షమాపణ చెప్పారు. రష్యాతో పోరులో ఉక్రెయిన్‌కు పూర్తిస్థాయిలో అండగా నిలుస్తామని అభయమిచ్చారు. మరోవైపు అమెరికా, దాని మిత్ర పక్షాల ప్రత్యర్థులకు ఆయుధాలు సరఫరా చేసే అంశాన్ని రష్యా పరిశీలిస్తోందని మరోసారి పుతిన్‌ హెచ్చరించారు. ఏయే దేశాలకు లేదా సంస్థలకు ఈ ఆయుధాలను రష్యా పంపించనుందన్న విషయాన్ని పుతిన్‌ వెల్లడించలేదు.  ‘‘వారు (పాశ్చాత్య దేశాలు) పంపిన ఆయుధాలు ఉక్రెయిన్‌ మాపై ఉపయోగిస్తే మాకు కూడా అలా చేసే హక్కు ఉంటుంది’’ అని రష్యా అధ్యక్షుడు పేర్కొన్నారు.