ఉష్ణోగ్రతను శరీర కణం ఎలా గ్రహిస్తుంది

సరికొత్త మార్గాన్ని కనుగొన్న పరిశోధకులు 

దిల్లీ: బయటి ఉష్ణోగ్రతను మానవ శరీరంలోని కణం ఎలా గ్రహిస్తుంది, తద్వారా మనిషి శరీరం సాధారణ వేడి, హానికారకమైన వేడి మధ్య తేడాను ఎలా గుర్తిస్తుంది అనే కొత్త మార్గాన్ని అమెరికాలోని నార్త్‌వెస్ట్రన్‌ యూనివర్సిటీ పరిశోధకులు కనుగొన్నారు. ఈ ప్రక్రియను అర్థం చేసుకోవడం ద్వారా దీర్ఘకాల నొప్పుల నివారణకు కొత్త మందులను తయారు చేయడం సులభమవుతుందని వారు పేర్కొన్నారు. దీనికి సంబంధించిన వివరాలు ‘నేచర్‌ స్ట్రక్చరల్‌ అండ్‌ మాలిక్యులర్‌ బయాలజీ’ అనే జర్నల్‌లో ప్రచురితమయ్యాయి. ‘‘వాతావరణంలోని ఉష్ణోగ్రతను గుర్తించిన తర్వాత కణం పై పొరలో ఉండే టీఆర్‌పీఎం3 అనే సెన్సర్‌ విద్యుత్‌ భార కణాలను శరీరంలోకి అనుమతిస్తుంది. అనంతరం అవి నాడీ సంకేతాలను ఉత్పత్తి చేస్తాయి. ఆ తర్వాత వేడి లేదా నొప్పి అనే విషయాన్ని మన మెదడు గుర్తిస్తుంది. ఈ మొత్తం ప్రక్రియ దీర్ఘకాల నొప్పుల నివారణకు కొత్త ఔషధాలను తయారుచేసేందుకు సహాయ పడుతుంది’’ అని ఈ అధ్యయనంలో పాల్గొన్న పరిశోధకులు వెల్లడించారు.