Iran Israel Conflict: సుప్రీం లీడర్‌ పుట్టిన రోజే ఇరాన్‌పై దాడులు.. అమెరికాకు చివరి క్షణంలో తెలిసిందట!

ఇంటర్నెట్‌ డెస్క్‌: పశ్చిమాసియాలో ఉద్రిక్తకర పరిస్థితులు నెలకొన్నాయి. ఇరాన్‌ (Iran)లో శుక్రవారం తెల్లవారుజామున సంభవించిన పేలుళ్లకు ఇజ్రాయెల్‌ (Israel) ప్రతీకార దాడులే కారణమని అమెరికా చెబుతోంది. ఈ దాడి గురించి టెల్‌అవీవ్‌ నుంచి తమకు చివరి క్షణంలో సమాచారం అందిందని జీ7 దేశాలతో అమెరికా (USA) చెప్పినట్లు ఇటలీ విదేశాంగ మంత్రి ఆంటోనియో టజానీ తెలిపారు. ఈ ఘటనలో తమ పాత్రేమీ లేదని అగ్రరాజ్యం స్పష్టం చేసిందన్నారు.

ఇస్ఫహాన్‌లోని వైమానిక, అణు స్థావరాల సమీపంలో పలు డ్రోన్లను తమ గగనతల రక్షణవ్యవస్థ సాయంతో కూల్చినట్లు టెహ్రాన్‌ తెలిపింది. దీని కారణంగానే పేలుళ్ల శబ్దాలు వినిపించాయని, ఆ డ్రోన్లతో ఎలాంటి నష్టం వాటిల్లలేదని తెలిపింది. ఎగిరే వస్తువులను లక్ష్యంగా చేసుకున్నామని ఇరాన్ ఆర్మీ కమాండర్ జనరల్ అబ్దుల్‌రహీం మౌసావి తెలిపారు. ఇరాన్‌ సుప్రీం లీడర్‌ అయాతోల్ల అలీ ఖమేనీ 85వ పుట్టినరోజే ఈ దాడులు జరగడం గమనార్హం.

డ్రోన్లను కూల్చేశామన్న ఇరాన్‌.. ‘నో కామెంట్స్‌’ అంటున్న ఇజ్రాయెల్‌

ఇరాన్‌పై దాడి జరిగిన సమయంలోనే.. అటు సిరియాపైనా ఇజ్రాయెల్‌ క్షిపణులతో విరుచుకుపడినట్లు సమాచారం. తమ గగనతల రక్షణ వ్యవస్థే లక్ష్యంగా ఈ దాడి జరిగిందని సిరియా అధికారిక మీడియా తెలిపింది.  ప్రభుత్వ దళాలకు చెందిన సైనిక రాడార్‌ను ఆ క్షిపణి తాకినట్లు బ్రిటన్‌కు చెందిన సిరియన్ అబ్జర్వేటరీ ఫర్ హ్యూమన్ రైట్స్ వెల్లడించింది. ఈ ఘటనలో ప్రాణనష్టం జరిగిందా? అనేది తెలియరాలేదని చెప్పింది.