Israel Hamas War: మారణహోమానికి ఆరు నెలలు.. భీకర పోరులో 33 వేలు దాటిన మరణాలు

ఇంటర్నెట్‌ డెస్క్‌: ఒక్కసారిగా ఇజ్రాయెల్‌పైకి దూసుకొచ్చిన వేలాది రాకెట్లు.. ప్రతిగా హమాస్‌ నిర్మూలనే లక్ష్యంగా గాజాలో టెల్‌అవీవ్‌ సేనల భీకర దాడులు.. ఇలా ఇజ్రాయెల్‌- హమాస్‌ యుద్ధానికి (Israel Hamas War) ఆదివారంతో సరిగ్గా ఆరు నెలలు పూర్తవుతుంది. దాదాపు 500 కిలోమీటర్లమేర విస్తరించి ఉన్న హమాస్‌ (Hamas) సొరంగాల్లో చాలావరకు ధ్వంసం చేశామని, 13 వేల మంది ఉగ్రవాదులను హతమార్చామని ఇజ్రాయెల్‌ చెబుతోంది. మరోవైపు.. ఇప్పటికీ 130 మందికిపైగా బందీలు మిలిటెంట్ల చెరలోనే ఉండటం, గాజా (Gaza)లో 33 వేలమంది ప్రాణాలు కోల్పోవడం, పాలస్తీనీయుల వెతలు యావత్‌ ప్రపంచాన్ని కలవరపెడుతున్నాయి.

• ‘ఆపరేషన్‌ అల్‌-అక్సా స్ట్రామ్‌’ పేరిట గతేడాది అక్టోబర్‌ 7వ తేదీ తెల్లవారుజామున మెరుపుదాడికి పాల్పడిన హమాస్‌ మిలిటెంట్లు.. దాదాపు 1200 మందిని బలిగొన్నారు. 250 మందికిపైగా బందీలుగా చేసుకుని, గాజాకు తీసుకెళ్లారు. ఈ పరిణామంతో ఉలిక్కిపడిన ఇజ్రాయెల్‌.. ప్రతి దాడులను మొదలుపెట్టింది. ఉగ్రవాదుల అంతంతోపాటు బందీల విడుదలే లక్ష్యంగా పూర్తిస్థాయి యుద్ధాన్ని ప్రకటించింది.
• ఇప్పటివరకు 109 మంది బందీలు సురక్షితంగా విడుదలయ్యారు. ముగ్గురిని సైన్యం నేరుగా కాపాడింది. 12 మంది మృతదేహాలు లభ్యమయ్యాయి. మరో ముగ్గురు సొంత సైన్యం చేతిలోనే మృతి చెందారు. మిగిలినవారిలోనూ 34 మంది చనిపోయి ఉండొచ్చని ఇజ్రాయెల్‌ భావిస్తోంది. ఆ దేశ వైమానిక దాడుల్లో చాలామంది ప్రాణాలు కోల్పోయారని హమాస్ చెబుతోంది. తమవారిని విడిపించాల్సిందిగా ప్రధాని నెతన్యాహుపై బాధితుల కుటుంబీకులు, పౌరుల నుంచి ఒత్తిడి పెరుగుతోంది.
• గాజాలో విపత్కర పరిస్థితులు నెలకొన్నాయి. ఇప్పటివరకు 33 వేల మందికిపైగా ప్రాణాలు కోల్పోయినట్లు స్థానిక ఆరోగ్య విభాగం వెల్లడించింది. మృతుల్లో 70 శాతం మంది మహిళలు, చిన్నారులేనని పేర్కొంది. ఐరాస వివరాల ప్రకారం.. దాదాపు 17 లక్షల మంది నిరాశ్రయులయ్యారు. స్థానికంగా 56 శాతానికిపైగా భవనాలు ధ్వంసమయ్యాయి. అటు.. లెబనాన్‌లోని హెజ్‌బొల్లాతోపాటు సిరియాలోని ఇరాన్‌ మద్దతుదారులపైనా నెతన్యాహు సైన్యం ఉక్కుపాదం మోపుతోంది.

• యుద్ధం మొదట్లో గాజా సరిహద్దులను దిగ్బంధించడంతో.. ఆహారం, ఇంధనం, ఔషధాలు, మంచినీరు, నిత్యావసర సామగ్రి కొరతతో పౌరులు అల్లాడారు. ప్రస్తుతం పరిస్థితులు మరింత దిగజారాయి. ప్రతిఒక్కరూ ఆహారం కోసం ఇబ్బందులు పడుతున్నారని, ఉత్తర ప్రాంతంలో 2 లక్షల మంది విపత్కర పరిస్థితుల్లో కొట్టుమిట్టాడుతున్నట్లు ఐరాస ఆహార సంస్థ ఆందోళన వ్యక్తంచేసింది. ఒకవేళ రఫాకు దాడులను విస్తరిస్తే.. మొత్తం 23 లక్షల మంది జనాభాలో సగం మంది క్షుద్బాధకు లోనవుతారని ఇటీవల హెచ్చరించింది.
• అంతర్జాతీయ సమాజం ఒత్తిడి మేరకు పాలస్తీనీయన్లకు కొంతమేర మానవతా సాయానికి ఇజ్రాయెల్‌ అనుమతించింది. అయితే.. అనేక ఆంక్షలు, సవాళ్ల నడుమ అరకొర సాయాన్ని కూడా సరిగ్గా చేరవేయలేని దుస్థితి నెలకొందని స్వచ్ఛందసంస్థలు ఆరోపిస్తున్నాయి. గాజాకు సముద్రమార్గంలో ఆహార సాయం అందిస్తోన్న ‘వరల్డ్‌ సెంట్రల్‌ కిచెన్‌’ సిబ్బందిపై ఇటీవల ఇజ్రాయెల్‌ చేపట్టిన డ్రోన్‌ దాడిలో ఆరుగురు మృతి చెందడంపై విమర్శలు వెల్లువెత్తుతున్నాయి. ఈ క్రమంలోనే మానవతా సాయాన్ని పెంచేందుకు చర్యలు తీసుకుంటున్నట్లు ఆ దేశం తెలిపింది.

ఇజ్రాయెల్‌పై రాకెట్ల వర్షం.. ఏంటీ ‘హమాస్‌’

• హమాస్‌కు మద్దతుగా ఎర్ర సముద్రం, గల్ఫ్‌ ఆఫ్‌ ఏడెన్‌లలో వాణిజ్యనౌకలే లక్ష్యంగా యెమెన్‌లోని హూతీ తిరుగుబాటుదారులు రెచ్చిపోతున్నారు. ఇరాన్‌ మద్దతున్న ఈ హూతీ రెబల్స్‌.. గతేడాది అక్టోబరు 19 నుంచి 2024 మార్చి వరకు 60కిపైగా సందర్భాల్లో డ్రోన్లు, క్షిపణులతో నౌకలపై దాడులకు తెగబడ్డారు. దీంతో జనవరి 12 మొదలు అమెరికా, బ్రిటన్‌ సంకీర్ణ సేనలు పలుమార్లు వారిపై విరుచుకుపడ్డాయి. భారత నౌకాదళం సైతం ఆపదలో ఉన్న నౌకల విషయంలో సహాయక చర్యలు చేపట్టింది.
• దాడులను వెంటనే ఆపాలని అనేక దేశాలు ఇజ్రాయెల్‌ను డిమాండ్‌ చేస్తున్నాయి. గాజాలో కాల్పుల విరమణ పాటించాలని ఐరాస భద్రత మండలి, మానవహక్కుల మండలిలు తీర్మానం రూపంలో గొంతెత్తాయి. నవంబరులో ఓసారి కాల్పుల విరమణ సాధ్యమైనప్పటికీ.. మరోసారి ఈ అంశం చర్చల దశలోనే నిలిచిపోయింది. దక్షిణాఫ్రికా, కొలంబియాలు యుద్ధ పరిణామాలను అంతర్జాతీయ న్యాయస్థానం దృష్టికి తీసుకెళ్లాయి. హమాస్‌ను అంతం చేసేవరకు యుద్ధాన్ని ఆపే ప్రసక్తే లేదని నెతన్యాహు స్పష్టం చేస్తున్నారు. ద్విదేశ పరిష్కారాన్ని వ్యతిరేకిస్తోన్న ఆయన తీరుపై మిత్రదేశం అమెరికా సైతం పలుమార్లు అసంతృప్తి వ్యక్తం చేసింది.