UAE floods: దుబాయ్‌ వరదలకు ముందు.. తర్వాత: శాటిలైట్ చిత్రాల్లో ఇలా

ఇంటర్నెట్‌డెస్క్‌: ఇటీవల ఎడారి దేశం యునైటెడ్‌ అరబ్‌ ఎమిరేట్స్‌ (UAE)ను వరదలు ముంచెత్తాయి. ఈ ఆకస్మిక వాతావరణ మార్పుతో దుబాయ్‌లో ఏడాదిన్నరలో నమోదయ్యే వర్షపాతం.. కొద్దిగంటల్లోనే కురిసిందని అధికారులు తెలిపారు. ఈ కుండపోత వానల ప్రభావాన్ని చూపించే చిత్రాలను నాసాకు చెందిన ల్యాండ్‌శాట్ 9 తీసింది. ఆ దృశ్యాల్లో ఎప్పుడూ పొడిగా కనిపించే ఏడారిలో ముదురు నీలం రంగులో భారీ నీటి కుంటలు దర్శనమిచ్చాయి. ఇక తేమ నిండిన ప్రాంతాలు ఆకుపచ్చ రంగులో దర్శమనిచ్చాయి. వర్షం తగ్గుముఖం పట్టిన రెండురోజుల లోపే(ఏప్రిల్‌ 19న) యూఏఈ మీదుగా పయనించిన నాసా శాటిలైట్ వీటిని చిత్రీకరించింది. 

ఎడారి దేశంలో ఎందుకీ వరదలు.. క్లౌడ్‌ సీడింగ్‌ కారణమా?

ఎమిరేట్‌ ఆఫ్‌ ఫుజైరా.. నీరులేని పర్వత ప్రాంతాలు, రాతి నేలలు, మైదానాల మిశ్రమంతో కూడిన ఈ ప్రదేశం రాతి ఎడారిగా పేరొందింది. సాధారణంగా గతంలో యూఏఈ ఈ స్థాయి వర్షాలను చూడలేదు. అలాంటిది గత రెండు మూడు సంవత్సరాల్లో తరచూ భారీ వర్షాలు పడుతున్నాయి. వాతావరణ మార్పుల ప్రభావంతోనే ఈ పరిస్థితులు చోటుచేసుకుంటున్నాయని నిపుణులు ఆందోళన వ్యక్తం చేస్తున్నారు.