Papua New Guinea: పాపువా న్యూగినీలో 670 మంది సజీవ సమాధి

కొండచరియలు విరిగిపడిన ఘటనలో పెరుగుతున్న మృతుల సంఖ్య

పాపువా న్యూగినీలో కొండచరియలు విరిగిపడిన ప్రదేశంలో స్థానికుల సహాయక చర్యలు

మెల్‌బోర్న్‌: పాపువా న్యూగినీలో కొండచరియలు విరిగిపడిన ఘటనలో మృతుల సంఖ్య 670కి పైగా ఉంటుందని ఆదివారం ఐక్యరాజ్యసమితికి చెందిన ఇంటర్నేషనల్‌ ఆర్గనైజేషన్‌ ఫర్‌ మైగ్రేషన్‌ (ఐవోఎం) తెలిపింది. శుక్రవారం తెల్లవారుజామున ఎంగా ప్రావిన్స్‌లోని యంబాలి గ్రామంపై కొండచరియలు విరిగిపడిన సంగతి తెలిసిందే. తొలుత 60 ఇళ్లు నేలమట్టమయ్యాయని భావించారు. దీంతో మృతుల సంఖ్య 100 వరకు ఉంటుందని వార్తలు వచ్చాయి. తాజాగా 150కి పైగా ఇళ్లు శిథిలాల కింద కూరుకుపోయాయని మృతుల సంఖ్య భారీగా ఉండనుందని ఐవోఎం పేర్కొంది. కొండచరియలు ఇంకా విరిగిపడుతుండటంతో సహాయక చర్యల్లో తీవ్ర ఇబ్బందులు తలెత్తుతున్నాయి. ప్రమాద తీవ్రత దృష్ట్యా అంతర్జాతీయ మద్దతు తీసుకొనే అంశాన్ని న్యూగినీ ప్రభుత్వం పరిశీలిస్తోంది. ఆదివారం నాటికి అయిదు మృతదేహాలను మాత్రమే సహాయక బృందాలు వెలికితీశారు.