Terror Attack:: ఆ ఉగ్రసంస్థ.. గతంలో ఫ్రాన్స్‌లోనూ దాడులకు యత్నం: మెక్రాన్‌

ఇంటర్నెట్‌ డెస్క్‌: రష్యా రాజధాని మాస్కోలో మారణహోమానికి (Moscow Attack) పాల్పడింది ఇస్లామిక్‌ స్టేట్‌ ఉగ్రవాదులేనని చెప్పడానికి తమ వద్ద సమాచారం ఉందని ఫ్రాన్స్‌ అధ్యక్షుడు ఇమాన్యుయేల్‌ మెక్రాన్‌ (Emmanuel Macron) తెలిపారు. ఈ ఘటనలో ఉక్రెయిన్‌ (Ukraine)పై నిందమోపేందుకు రష్యా (Russia) యత్నించడం మూర్ఖపు చర్యే అవుతుందన్నారు. ఈ ఉగ్రమూక గతంలో ఫ్రాన్స్‌నూ లక్ష్యంగా చేసుకుందన్నారు. 

‘‘మాస్కో దాడికి పాల్పడింది తామేనని ఇస్లామిక్‌ స్టేట్‌ గ్రూపు ప్రకటించింది. మా నిఘావర్గాలకు అందుబాటులో ఉన్న సమాచారం ప్రకారం కూడా ఇదే విషయం వెల్లడవుతోంది. ఉక్రెయిన్‌కు వ్యతిరేకంగా ఈ సందర్భాన్ని వాడుకోవడం రష్యాపై, దాని పౌరుల భద్రతపై ప్రతికూల ప్రభావం చూపుతుంది. మాస్కో దాడికి బాధ్యత వహించిన ఉగ్రసంస్థ గతంలో ఫ్రాన్స్‌లోనూ దాడులకు యత్నించింది’’ అని మెక్రాన్‌ వ్యాఖ్యానించారు.

మాస్కో ఉగ్రదాడి.. నేరాన్ని అంగీకరించిన ముష్కరులు!

ఈ కాల్పులకు తామే తెగబడినట్లు అఫ్గాన్‌కు చెందిన ఇస్లామిక్‌ స్టేట్‌ గ్రూపు చెప్పినా.. పుతిన్‌ మాత్రం ఇప్పటివరకు ఈ పేరు ప్రస్తావించలేదు. అనుమానితులు నలుగురూ ఉక్రెయిన్‌ వైపు ముందే సిద్ధం చేసుకున్న మార్గం ద్వారా తప్పించుకోవాలని ప్రయత్నించగా తమ బలగాలు పట్టుకున్నాయని చెప్పారు. అయితే.. ఈ ఘటనలో తమకు ప్రమేయం లేదని ఉక్రెయిన్‌ ఇప్పటికే తేల్చిచెప్పింది. అమెరికా సహా ఇతర దేశాలు సైతం ఇస్లామిక్‌ స్టేట్‌పైనే అనుమానాలు వ్యక్తం చేశాయి. కీవ్‌ను అమెరికా కాపాడుతోందని రష్యా ఆరోపిస్తోంది.