Alexei Navalny: ఎట్టకేలకు నావల్నీ మృతదేహం అప్పగింత!

మాస్కో: రష్యా అధ్యక్షుడు పుతిన్‌ విమర్శకుడు, ప్రతిపక్ష నేత అలెక్సీ నావల్నీ (Alexei Navalny) మృతదేహాన్ని ఎట్టకేలకు ఆయన తల్లికి అప్పగించినట్లు తెలుస్తోంది. ఆయన ప్రతినిధి కిరా యార్మిష్‌ ఈ విషయాన్ని వెల్లడించారు. ఈ నెల 16న ఆర్కిటిక్‌ పీనల్‌ కాలనీలో నావల్నీ మరణించినట్లు అధికారులు వెల్లడించినప్పటికీ.. భౌతిక కాయం ఎక్కడుందో తెలియకపోవడం చర్చనీయాంశంగా మారింది. ఈ వ్యవహారంలో ప్రభుత్వ తీరుపై పెద్దఎత్తున విమర్శలు వచ్చాయి.

‘కేజీబీ వన్‌-పంచ్‌’ టెక్నిక్‌తో నావల్నీని చంపేశారా?

మృతదేహాన్ని కావాలనే దాచిపెడుతున్నారని ఆయన మద్దతుదారులు ఆరోపించారు. తన కుమారుడిని కడసారి చూసేందుకు అవకాశం ఇవ్వాలని తల్లి లియుడ్మిలా దేశాధ్యక్షుడు పుతిన్‌ను వేడుకున్నారు. గౌరవప్రదంగా ఖననం చేసేందుకు భౌతిక కాయాన్ని అప్పగించాలని కోరారు. ఈ క్రమంలోనే సలేఖార్ద్‌ నగరంలో ఆమెకు మృతదేహాన్ని అప్పగించినట్లు సమాచారం. అయితే.. రహస్యంగా ఖననం చేయాలని అధికారులు ఇప్పటికే తనపై ఒత్తిడి తీసుకువచ్చారని నావల్నీ తల్లి వాపోయారు.