North Korea: కిమ్‌ శాటిలైట్‌.. శ్వేతసౌధం, పెంటాగన్‌ ఫొటోలు తీసిందట..!

ప్యాంగ్యాంగ్‌: ఈ నెల ఉత్తర కొరియా(North Korea) తొలిసారి తన నిఘా ఉపగ్రహాన్ని(Spy Satellite) భూకక్ష్యలోకి ప్రవేశపెట్టింది. తాజాగా ఇది శ్వేతసౌధం, పెంటాగన్‌ సహా అమెరికాకు చెందిన నౌకాస్థావరాల చిత్రాలను తీసిందట. వాటిని అధ్యక్షుడు కిమ్ జోంగ్ ఉన్‌(Kim Jong Un) వీక్షించారట. ఈ విషయాన్ని ఉత్తర కొరియా ప్రభుత్వం ఆధ్వర్యంలో నడుస్తోన్న మీడియా సంస్థ వెల్లడించింది.

గతంలో రెండు సార్లు నిఘా ఉపగ్రహాన్ని(Spy Satellite) భూకక్ష్యలోకి ప్రవేశపెట్టేందుకు కిమ్‌ ప్రభుత్వం విఫలయత్నం చేసింది. ఈసారి రష్యా సహకారంతో ప్రయోగాన్ని విజయవంతం చేసింది. గతవారం ఈ ప్రయోగం జరగ్గా.. కిమ్ లాంచింగ్‌ను వీక్షించారు. అలాగే ఈ ప్రయోగంలో పాలుపంచుకొన్న శాస్త్రవేత్తలు, సిబ్బందికి విందు ఇచ్చారు. అలాగే సోమవారం రాత్రి నిఘా ఉపగ్రహం తీసిన అమెరికా ప్రభుత్వానికి చెందిన రెండు ప్రదేశాలను వీక్షించారని ఆ మీడియా సంస్థ వెల్లడించింది.

నకిలీ ప్రపంచంలో ‘నిజం’ కోసం ఆరాటం

అమెరికా నౌకా స్థావరం, విమాన వాహక నౌకలు, షిప్‌ యార్డ్‌లు, వర్జీనియాలోని ఎయిర్‌ఫీల్డ్ చిత్రాలను ఆ ఉపగ్రహం తీసిందని పేర్కొంది. అలాగే దక్షిణ కొరియాలోని సైనిక స్థావరాల చిత్రాలను తీసిందని తెలిపింది. అయితే ఈ నిఘా ఉపగ్రహం ప్రయోగించిన వారంలోనే సరైన పనితీరును ప్రదర్శిస్తుందని చెప్పడం తొందరపాటే అవుతుందని నిపుణులు అభిప్రాయం వ్యక్తం చేస్తున్నారు. దానికి అంతరిక్షం నుంచి ఫొటోలు తీసి, పంపే సామర్థ్యం ఉందని ఇప్పుడే చెప్పలేమన్నారు.

ఈ ఉపగ్రహం రూపకల్పనలో రష్యా(Russia) నుంచి ఉత్తరకొరియా(North Korea) సాంకేతిక సహకారం తీసుకున్నట్లు సమాచారం. ఈ ప్రయోగంతో దక్షిణ కొరియా, జపాన్‌, అమెరికా దేశాలు తమ సైన్యాన్ని అప్రమత్తం చేశాయి. అమెరికా, దక్షిణ కొరియా సైనిక కార్యకలాపాలను గమనించడంతోపాటు అణ్వస్త్ర సామర్థ్యాలను మెరుగుపర్చుకునేందుకే ఉత్తర కొరియా ఈ రాకెట్‌ ప్రయోగాలు చేస్తోందని ఇదివరకే న్యూయార్క్‌ టైమ్స్‌ పేర్కొంది.