Earthquake: జపాన్‌ భూకంపం.. కిషిదాకు ప్రధాని మోదీ లేఖ!

దిల్లీ: భారీ భూకంపం (Japan Earthquake)తో ఇటీవల జపాన్‌ పశ్చిమ తీరం వణికిపోయింది. 7.6 తీవ్రతతో ‘నోటో’ సమీపంలో సంభవించిన ప్రకృతి విపత్తు ధాటికి అనేక ఇళ్లు, ఇతర భవనాలు నేలమట్టమయ్యాయి. ఈ ఘటనపై ప్రధాన మంత్రి నరేంద్ర మోదీ (PM Modi) దిగ్భ్రాంతి వ్యక్తం చేశారు. భూకంపం వల్ల నష్టపోయిన జపాన్‌తోపాటు అక్కడి ప్రజలకు భారత్‌ తరఫున సంఘీభావం తెలుపుతూ ఆ దేశ ప్రధాని కిషిదా (Fumio Kishida)కు లేఖ రాసినట్లు సంబంధిత వర్గాలు వెల్లడించాయి.

వ్యూహాత్మక, ప్రపంచ భాగస్వామిగా జపాన్‌తో తన అనుబంధాన్ని భారత్‌ విలువైనదిగా పరిగణిస్తుందని ప్రధాని మోదీ లేఖలో పేర్కొన్నారు. ఈ ఘటనపై తీవ్ర వేదనకు లోనయ్యానని చెప్పారు. మృతుల కుటుంబాలకు ప్రగాఢ సానుభూతి వ్యక్తం చేశారు. ప్రస్తుత విపత్కర సమయంలో భారత్‌ తరఫున సాధ్యమైన మేర సాయాన్ని అందించేందుకు సిద్ధంగా ఉన్నామని హామీ ఇచ్చారు.

జపాన్‌ భూకంపంలో 242 మంది ఆచూకీ గల్లంతు..!

ఇటీవలి భూకంపానికి జపాన్‌లో ఇప్పటివరకు 92 మంది మృతి చెందారు. 240 మందికిపైగా పౌరుల ఆచూకీ లభించాల్సి ఉంది. సహాయక చర్యల్లో పాల్గొనే సిబ్బంది సంఖ్యను అధికారులు రెట్టింపు చేసి, 4,600కు పెంచారని స్థానిక వార్తాసంస్థలు తెలిపాయి. బాధితులను ఆదుకోవడంలో ఎటువంటి అవకాశాలను వదిలేయవద్దని, చివరి వరకు ప్రయత్నాలు కొనసాగించాలని అధికారులకు ప్రధాని కిషిదా ఆదేశించారు.