MV Rubymar: హూతీల దాడులు.. నీట మునిగిన తొలి వాణిజ్య నౌక

ఇంటర్నెట్‌ డెస్క్‌: వాణిజ్య నౌకలే లక్ష్యంగా యెమెన్‌కు చెందిన హూతీ తిరుగుబాటుదారులు (Houthi Rebels) దాడులకు తెగబడుతోన్న విషయం తెలిసిందే. ఫిబ్రవరి 18న బాబ్‌-అల్‌-మండెబ్‌ జలసంధి వద్ద దాడికి గురైన ఓ వాణిజ్య నౌక (MV Rubymar) తాజాగా ఎర్ర సముద్రం (Red Sea)లో మునిగిపోయింది. ప్రపంచ వాణిజ్యానికి కీలకమైన ఈ జలమార్గంలో నెలలతరబడి సాగుతోన్న దాడుల్లో మునిగిపోయిన మొదటి ఓడ ఇదే. యెమెన్ ప్రభుత్వం, ప్రాంతీయ సైనిక అధికారి ఈవిషయాన్ని ధ్రువీకరించారు.

ఎర్రసముద్రంలో అలజడి

బలీజ్‌ దేశపు జెండాతో వెళ్తున్న ‘ఎంవీ రూబీమర్‌’పై దాడి జరిగిన 12 రోజులకు సిబ్బంది వదిలిపెట్టేశారు. దాన్ని ఓడరేవుకు తరలించేందుకు ప్రణాళికలూ రూపొందించారు. అయితే..  నౌక క్రమంగా ఉత్తరం వైపు కొట్టుకుపోయి నీట మునిగింది. ఇదిలాఉండగా.. ఎర్ర సముద్రంలో హూతీలు దాడులను ఆపకపోవడంతో అగ్రరాజ్య సంకీర్ణ సేనలు ఇటీవల నాలుగోవిడత వైమానిక దాడులను చేపట్టాయి. అమెరికా, బ్రిటన్‌ యుద్ధ విమానాలు మొత్తం ఎనిమిది ప్రదేశాల్లోని 18 లక్ష్యాలను ధ్వంసం చేశాయి.