USA: చైనాను కట్టడి చేసేందుకు జపాన్‌కు దీర్ఘ శ్రేణి క్షిపణులు..!

ఇంటర్నెట్‌డెస్క్‌: చైనాను కట్టడి చేసేందుకు అమెరికా కీలక నిర్ణయం తీసుకొంది. జపాన్‌కు సుమారు 400 తోమహాక్‌ క్షిపణులను సరఫరా చేసేందుకు అమెరికా విదేశాంగశాఖ అనుమతులు మంజూరు చేసింది. ఓ వైపు చైనాతో చర్చలు జరుపుతూనే మరోవైపు రక్షణ రంగాన్ని బలోపేతం చేసుకొనే ప్రయత్నంలో భాగంగా జపాన్‌ వీటిని కొనుగోలు చేస్తోంది. ఈ డీల్‌ విలువ సుమారు 2.35 బిలియన్‌ డాలర్లు. దీని కింద రెండు రకాల తోమహాక్‌ క్షిపణులు కొనుగోలు చేయనుంది. వీటి రేంజి అత్యధికంగా 1,600 కిలోమీటర్ల వరకు ఉంటుంది. 

బందీల విడుదలపై హమాస్‌-ఇజ్రాయెల్‌ మధ్య ఒప్పందం..?

ఈ విక్రయంపై అమెరికా విదేశాంగ శాఖ స్పందిస్తూ ‘‘మా ప్రధాన మిత్రదేశం భద్రతను మెరుగుపరిస్తే అది ఇండోపసిఫక్‌ ప్రాంతంలో రాజకీయ సుస్థిరత, ఆర్థిక పురోగతికి కారణమవుతుంది. ప్రస్తుత, భవిష్యత్తులను ప్రమాదాలను ఎదుర్కోవడానికి ఈ విక్రయం జపాన్‌కు చాలా ప్రయోజనకరంగా ఉంటుంది. ఉపరితలంపై నుంచి ఉపరితలంపైకి ప్రయోగించే సంప్రదాయ ఆయుధాలతో పెరుగుతున్న ముప్పును నివారించవచ్చు’’ అని ఒక ప్రకటనలో పేర్కొంది. 

ఈ ఏడాది ఫిబ్రవరిలోనే జపాన్‌ ప్రధాని ఫూమియో కిషిద మాట్లాడుతూ తాము 400 క్షిపణులను కొనుగోలు చేయనున్నట్లు వెల్లడించారు.   

మరోవైపు ఉత్తర కొరియా భారీగా క్షిపణుల తయారీపై దృష్టిపెట్టింది. తాజాగా ఈ క్షిపణుల కోసం ఘన ఇంధన ఇంజిన్లను ఇటీవలే పరీక్షించినట్లు అధికార వార్తాసంస్థ ప్రకటించింది. ఘన ఇంధన క్షిపణులతో ఈ సమస్య ఉండదు. వీటిని వేగంగా ప్రయోగించవచ్చు, తరలించవచ్చు, శత్రువు కంటపడకుండా దాచిపెట్టవచ్చు. ఉత్తర కొరియా వద్దనున్న మధ్యశ్రేణి క్షిపణులలో హ్వాసాంగ్‌-12 క్షిపణి.. పసిఫిక్‌ మహా సముద్రంలో అమెరికా ఆధీనంలోని గ్వామ్‌ దీవిని తాకగలవు. ఇటీవల ఉత్తర కొరియా అధినేత కిమ్‌ జోంగ్‌ ఉన్‌ రష్యా వెళ్లినపుడు ఆ దేశ సాంకేతికత కోసం ప్రయత్నించి ఉంటారని అనుమానాలు వ్యక్తమవుతున్నాయి. అదే సమయంలో చైనా నుంచి ఈ దేశానికి బలమైన మద్దతు లభిస్తోంది.