బడా నేతలతో...ఛోటా విలేకరి!

చిచ్చర పిడుగులు

* ఎవరీ పిల్లాడు?

పేరు గుర్మీత్‌ గోయత్‌. ముద్దు పేరేమో గోల్డీ గోయత్‌. ఊరు హరియాణాలోని జీంద్‌.

* మరి మన పేజీలోకి ఎందుకొచ్చినట్టు...?
పన్నెండేళ్ల పిల్లలకు ఎన్నికల గురించి అంతగా తెలియదు. కానీ గోయత్‌ విషయం వేరు. ప్రస్తుతం జరుగుతున్న హరియాణా ఎన్నికల్లో గోయత్‌ ఏకంగా సెలబ్రెటీ అయిపోయాడు.
* ఎలా?
ఎంతో అనుభవం ఉన్న జర్నలిస్టుల్లా రాజకీయ నాయకుల్ని ఇంటర్వ్యూ చేస్తూ. అవును మీరు సరిగానే చదివారు. దిల్లీ ముఖ్యమంత్రి అరవింద్‌ కేజ్రీవాల్‌, జననాయక్‌ జనతాపార్టీ నేతలు దుష్యంత్‌ చౌతాలా, దిగ్విజయ్‌ చౌతాలా లాంటి రాజకీయ ప్రముఖులతోపాటు ఎన్నికల్లో బరిలోకి దిగిన బడా బడా నాయకుల్నీ ఇంటర్వ్యూ చేసేశాడు. యంగ్‌ జర్నలిస్టుగా మంచి పేరు తెచ్చుకుంటున్నాడు.

* ఎలా మాట్లాడాడబ్బా? భయపడలేదా?
లేదు. తన చిట్టి చిట్టి మాటలతో భలేగా మాట్లాడేస్తున్నాడు. ‘హా... థో నమస్కార్‌ దోస్తో... ఆజ్‌ హమారే సాత్‌ హై కేజ్రీవాల్‌ జీ. ఆజ్‌ హమ్‌ ఇన్‌ సే కుచ్‌ సవాల్‌ కరే.’ అంటూ గలగల హిందీలో తన ఇంటర్వ్యూ మొదలుపెట్టేశాడు. అంతేనా? ‘నమస్కారం సార్‌... ఎలా ఉన్నారు? హరియాణాలోని ప్రభుత్వ ఆసుపత్రుల్లో, పాఠశాలల్లో కనీస సదుపాయాలు లేవు. రోడ్లు సరిగా లేవు. మంచి నీటి ఇబ్బందులూ ఉన్నాయి. మీరు అధికారంలోకి వస్తే ఎలాంటి సౌకర్యాలు కల్పిస్తారు?’ అంటూ సామాజిక అంశాల్నీ జతచేస్తూ బోలెడన్ని ప్రశ్నలు అడుగుతున్నాడు. చిన్నవయసులో మైక్‌ పట్టుకుని ప్రశ్నల వర్షం కురిపిస్తుంటే అందరూ ఆశ్చర్యపోతూ ఎంతగానో మెచ్చుకుంటున్నారు.

* ఇంతకీ వీటిని ఎక్కడ చూడొచ్చు?
ఈ ఏడాది జనవరి నుంచి గోయత్‌ ఈ ఇంటర్వ్యూల్ని చేయడం మొదలుపెట్టాడు. ఇప్పటి వరకు వాటి సంఖ్య 100కు చేరింది. వాటన్నింటినీ ‘గోల్డీ గోయత్‌’ పేరుతో యూట్యూబ్‌ ఛానెల్‌ ప్రారంభించి అందులో అప్‌లోడ్‌ చేసేస్తున్నాడు.

* అబ్బో గొప్పే...!
అవును మరి. మరో సంగతి... ఆ వీడియోల్ని చూసిన వారి సంఖ్య, లైక్‌ కొట్టినవారి సంఖ్య లక్షల్లో ఉంది.

* ఇంతకీ ఆసక్తి ఎలా వచ్చింది?
‘సమాజంలో నీకంటూ గుర్తింపు తెచ్చుకోవాలి’ అన్న వాళ్ల తాతయ్య మాటను నెరవేర్చాలనే ఆలోచనతో ఇలా జర్నలిస్టుగా మారాడు.

* అది సరే. మరి చదువో?
ప్రస్తుతం తొమ్మిదో తరగతి చదువుతున్నాడు. ఖాళీ సమయాల్లో, కొన్నిసార్లు స్కూల్లో అనుమతి తీసుకుని వెళుతుంటాడట.
* ఈ పిల్లాడి లక్ష్యం?
కొంతకాలం పాటు విలేకరిగా పని చేస్తాననీ, ఆ తర్వాత స్వతంత్ర అభ్యర్థిగా రాజకీయాల్లోకి అడుగుపెడతానని చెబుతున్నాడీ బుల్లి జర్నలిస్టు.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి