Breaking | Feedback | ePratibha | E-PAPER | Pratibha

అల్లు అర్జున్‌ తగ్గేదేలే అని నిరూపించారు: లోకేశ్‌

Updated : 24 Aug 2023 20:35 IST

సంక్షిప్త వార్తలు - చిత్ర వార్తలు

25/08/2023 01:58(IST)

నార్సింగిలో కారు బీభత్సం.. ఒకరు మృతి

రంగారెడ్డి: నార్సింగి పరిధిలో అప్పా జంక్షన్‌ వద్ద గురువారం రాత్రి కారు బీభత్సం సృష్టించింది. డివైడర్‌ పైనుంచి దూసుకెళ్లి ఆటోను ఢీకొట్టింది. ఈ ఘటనలో ఒకరు మృతి చెందగా, మరో ఇద్దరికి తీవ్ర గాయాలు అయ్యాయి. క్షతగాత్రులను ఆసుపత్రులకు తరలించారు. ప్రమాదం వల్ల రోడ్డుపై భారీగా వాహనాలు నిలిచిపోయాయి.

24/08/2023 20:34(IST)

అల్లు అర్జున్‌ తెలుగు సినీచరిత్రను తిరగరాసి తగ్గేదేలే అని నిరూపించారు: లోకేశ్‌

జాతీయ చలనచిత్ర అవార్డులకు ఎంపికైన తెలుగు నటులకు తెదేపా జాతీయ ప్రధాన కార్యదర్శి నారా లోకేశ్‌ అభినందనలు తెలిపారు. అల్లు అర్జున్‌ తెలుగు సినీచరిత్రను తిరగరాసి తగ్గేదేలే అని నిరూపించారని చెప్పారు. ఆర్ఆర్‌ఆర్‌, పుష్ప తదితర చిత్రాలకు అవార్డులు రావడం సంతోషకరమని లోకేశ్‌ అన్నారు.

24/08/2023 20:29(IST)

నూజివీడు నియోజకవర్గంలోకి నారా లోకేశ్‌ యువగళం పాదయాత్ర

గన్నవరం నియోజకవర్గంలో నారా లోకేశ్‌ యువగళం పాదయాత్ర పూర్తయింది. నూజివీడు నియోజకవర్గంలోకి నారా లోకేశ్‌ యువగళం పాదయాత్ర ప్రవేశించింది. లోకేశ్‌కు నూజివీడు తెదేపా ఇన్‌ఛార్జి ముద్రబోయిన వెంకటేశ్వర రావు, తెదేపా నేతలు గన్ని వీరాంజనేయులు, మాగంటి బాబు, చింతమనేని ప్రభాకర్, ఎంవీ సత్యనారాయణ రాజు, పర్వతనేని గంగాధర్, కాపా శ్రీనివాస్, అట్లూరి రమేష్ తదితరులు ఘన స్వాగతం పలికారు.

24/08/2023 20:26(IST)

గోష్పాద క్షేత్రంలో నదిలో స్నానానికి దిగి భక్తుడు గల్లంతు

తూర్పు గోదావరి: కొవ్వూరు గోష్పాద క్షేత్రంలో నదిలో స్నానానికి దిగి భక్తుడు గల్లంతయ్యాడు. కార్తీక్‌ కుటుంబ సభ్యులు తణుకు నుంచి నది స్నానానికి వచ్చారు. గోదావరి వరద ప్రవాహంలో కార్తీక్‌ గల్లంతయ్యాడు. కార్తీక్‌ భార్య, బంధువు ప్రమాదం నుంచి బయటపడ్డారు.

24/08/2023 20:21(IST)

చిలకలూరిపేటకు చెందిన వైకాపా నేతల మధ్య వాగ్వాదం

పల్నాడు: నరసరావుపేటలో చిలకలూరిపేటకు చెందిన వైకాపా నేతల మధ్య వాగ్వాదం చోటు చేసుకుంది. మంత్రి రజని అనుకూల, వ్యతిరేక వర్గాల మధ్య గొడవ జరిగింది. ఇరువర్గాలకు పోలీసులు సర్దిచెప్పారు.

24/08/2023 20:19(IST)

మోకిలలో రెండో రోజు ఈ-వేలం.. రూ.131.72 కోట్ల ఆదాయం

హైదరాబాద్‌: మోకిలలో రెండో రోజు భూముల ఈ-వేలం కొనసాగింది. రెండో రోజు మొత్తం 60 ప్లాట్ల అమ్మకం జరిగింది. గరిష్టంగా గజం ధర రూ.75 వేలు పలికింది. కనిష్టంగా రూ.56 వేలు పలికింది. రెండో రోజు ఈ-వేలం ద్వారా రూ.131.72 కోట్లు ఆదాయం లభించింది. శుక్రవారం మరో 60 ప్లాట్లను ఈ-వేలం వేయనున్నారు.

24/08/2023 20:13(IST)

ప్రజలు జగన్‌ పాలనను ఛీ కొడుతున్నారు: సీపీఐ నేత రామకృష్ణ

విజయవాడ: సీపీఐ బస్సు యాత్ర విజయవాడకు చేరుకుంది. ఈ సందర్భంగా గాంధీనగర్‌ ధర్నా చౌక్‌ వద్ద నిర్వహించిన బహిరంగ సభలో ఆ పార్టీ నేత రామకృష్ణ మాట్లాడారు. ప్రజలు జగన్‌ పాలనను ఛీ కొడుతున్నారని తెలిపారు. ఎప్పుడు వైకాపాకు బుద్ధి చెబుదామా అని ఎదురు చూస్తున్నారని అన్నారు. సెప్టెంబర్‌ 8న యాత్ర తిరుపతికి చేరుకుంటుందని చెప్పారు. ముగింపు ర్యాలీలో సీపీఐ జాతీయ నాయకులు పాల్గొంటారని వివరించారు.

24/08/2023 20:04(IST)

తెలుగు చిత్రాలకు పురస్కారాలు దక్కడం సంతోషం: పవన్‌ కల్యాణ్‌

హైదరాబాద్‌: జాతీయ సినిమా అవార్డుల విజేతలకు సినీనటుడు పవన్‌ కల్యాణ్‌ అభినందనలు తెలిపారు. తెలుగు చిత్రాలకు పలు విభాగాల్లో పురస్కారాలు దక్కడం సంతోషం అన్నారు. అల్లు అర్జున్‌కు ఉత్తమ నటుడు అవార్డు రావడం హర్షణీయమని చెప్పారు. ఆర్‌ఆర్‌ఆర్‌ చిత్రబృందానికి పవన్‌ కల్యాణ్‌ అభినందనలు తెలిపారు.

24/08/2023 19:58(IST)

నిడుబ్రోలు సెంటర్‌లో ప్రధాన రహదారిపై మహిళల నిరనన

గుంటూరు: పొన్నూరు నిడుబ్రోలు సెంటర్‌లో ప్రధాన రహదారిపై మహిళలు నిరనన చేశారు. నిడుబ్రోలు రజకపేట చెరువులో చేపలు మృతిచెందడంతో దుర్గంధం వ్యాపిస్తోంది. దుర్గంధంతో రోగాల బారిన పడుతున్నామని ఆందోళన చేశారు. మహిళల నిరసనతో రహదారిపై రాకపోకలు నిలిచిపోయాయి.

24/08/2023 19:37(IST)

ప్రజ్ఞానంద ప్రతి ఒక్క భారతీయుడి హృదయాలు గెలిచారు: ద్రౌపదీ ముర్ము

దిల్లీ: ఫిడె చెస్‌ ప్రపంచకప్‌ రన్నరప్‌ ప్రజ్ఞానందను రాష్ట్రపతి ద్రౌపదీ ముర్ము అభినందించారు. ప్రజ్ఞానంద ప్రతి ఒక్క భారతీయుడి హృదయాలు గెలిచారని అన్నారు. ఫైనల్‌లో ప్రజ్ఞానంద అత్యుత్తమ ప్రదర్శన కనర్బరాని చెప్పారు. ప్రజ్ఞానంద దేశం గర్వపడేలా చేశారని వివరించారు. భవిష్యత్తులో మరిన్ని విజయాలు సాధించాలని ఆకాంక్షించారు.

24/08/2023 19:32(IST)

పంచాయతీ నిధుల మళ్లింపుపై గవర్నర్‌కు సర్పంచుల ఫిర్యాదు

ఏపీ గవర్నర్‌ జస్టిస్‌ అబ్దుల్‌ నజీర్‌ను ఏపీ సర్పంచుల సంఘం ప్రతినిధులు కలిశారు. పంచాయతీ నిధుల మళ్లింపు, దుర్వినియోగంపై గవర్నర్‌కు ఫిర్యాదు చేశారు. పంచాయతీ నిధులు రూ.8,629 కోట్లను జగన్‌ మళ్లించారని ఆ సంఘం నేత వైవీబీ రాజేంద్ర ప్రసాద్‌ ఆరోపించారు. సర్పంచులకు సమాచారం లేకుండా నిధులు దారి మళ్లించారని తెలిపారు. వివిధ పద్దుల నుంచి ఇవ్వాల్సిన రూ.4 వేల కోట్లు ఇవ్వలేదని చెప్పారు. ప్రభుత్వం తన అవసరాలకు రూ.17 వేల కోట్లు మళ్లించిందని వివరించారు.

24/08/2023 19:29(IST)

అంతా అనుకున్నట్లుగానే సాగుతోంది.. ఇస్రో

చంద్రయాన్‌-3 మిషన్‌లో అన్ని కార్యకలాపాలు షెడ్యూల్‌ ప్రకారం సాగుతున్నట్లు ‘ఇస్రో’ వెల్లడించింది. ల్యాండర్‌ మాడ్యుల్‌లోని ఐఎల్‌ఎస్‌ఏ, ఆర్‌ఏఎంబీహెచ్‌ఏ, చ.ఎస్‌టీఈ పేలోడ్‌లను నేడు ఆన్‌ చేసినట్లు తెలిపింది. రోవర్‌ మొబిలిటీ కార్యకలాపాలు ప్రారంభమయ్యాయని చెప్పింది. ప్రొపల్షన్‌ మాడ్యూల్‌లోని ‘షేప్‌’ సాధనాన్ని ఆదివారమే ఆన్‌ చేసినట్లు ట్వీట్‌ చేసింది.

24/08/2023 19:25(IST)

ఓటు బ్యాంకు రాజకీయాల కోసం రుణమాఫీ పేరుతో మోసం చేశారు: కిషన్‌రెడ్డి

హైదరాబాద్‌: కేంద్ర హోం మంత్రి అమిత్ షా ఈ నెల 27న తెలంగాణకు వస్తున్నారని భాజపా తెలంగాణ రాష్ట్ర అధ్యక్షుడు కిషన్‌రెడ్డి తెలిపారు. దిల్లీ నుంచి ప్రత్యేక విమానంలో విజయవాడకు చేరుకుంటారని.. అక్కడి నుంచి హెలికాప్టర్‌లో భద్రాచలానికి వస్తారని చెప్పారు. ఖమ్మంలో ‘రైతు గోస - భాజపా భరోసా’ పేరుతో నిర్వహించే సభలో మధ్యాహ్నం 2 గంటలకు పాల్గొంటారని తెలిపారు. ధాన్యం కొనుగోలులో కేసీఆర్ ప్రభుత్వం వైఫల్యం చెందిందని తెలిపారు. రైతులకు ఉచిత ఎరువులు ఇస్తామని చెప్పి వెన్నుపోటు పొడిచిందని విమర్శించారు. ఎన్నికలకు ముందు ఓటు బ్యాంకు రాజకీయాల కోసం రుణమాఫీ పేరుతో మోసం చేశారని మండిపడ్డారు. తెలుగు సినిమాలకు జాతీయ అవార్డులు రావడంపై కిషన్‌రెడ్డి హర్షం వ్యక్తం చేశారు.

24/08/2023 19:17(IST)

తెలుగు సినిమా గర్వపడేలా అవార్డులు వచ్చాయి: చిరంజీవి

హైదరాబాద్‌: జాతీయ అవార్డులు గెలిచిన అందరికీ చిరంజీవి శుభాకాంక్షలు తెలిపారు. తెలుగు సినిమా గర్వపడేలా అవార్డులు వచ్చాయని చెప్పారు. ఉత్తమ నటుడి అవార్డు గెలిచిన అల్లు అర్జున్‌కు చిరంజీవి అభినందనలు తెలిపారు.

24/08/2023 19:13(IST)

ఉరేసుకొని దంత వైద్య విద్యార్థిని ఆత్మహత్య

కృష్ణా: గన్నవరం మండలం చిన్నఅవుటపల్లిలో దంత వైద్య విద్యార్థిని ఆత్మహత్య చేసుకుంది. గుంటూరు జిల్లా పెదకూరపాడుకు చెందిన ప్రసన్న(25) స్థానిక ప్రైవేట్‌ దంత కళాశాల వసతి గృహంలో ఉరి వేసుకొని ఆత్మహత్యకు పాల్పడింది. పోలీసులు ఘటనా స్థలికి చేరుకుని వివరాలు సేకరిస్తున్నారు.

24/08/2023 19:09(IST)

పుష్ప.. తగ్గేదే లే.. అభినందనలు బన్నీ: రాజమౌళి

హైదరాబాద్‌: తెలుగు చిత్రాలకు అవార్డులు రావడంపై దర్శకుడు రాజమౌళి హర్షం వ్యక్తం చేశారు. పుష్ప.. తగ్గేదే లే.. అభినందనలు బన్నీ అని పేర్కొన్నారు. సిక్సర్‌ కొట్టిన ఆర్‌ఆర్‌ఆర్‌ బృందానికి అభినందనలు తెలిపారు.

24/08/2023 19:05(IST)

భాస్కర్‌ రెడ్డి, ఉదయ్‌ కుమార్‌ రెడ్డి బెయిల్‌ పిటిషన్లపై తీర్పు రిజర్వ్‌

హైదరాబాద్‌: వివేకా హత్య కేసు నిందితులు భాస్కర్‌ రెడ్డి, ఉదయ్‌ కుమార్‌ రెడ్డి బెయిల్‌ పిటిషన్లపై తెలంగాణ హైకోర్టులో వాదనలు ముగిశాయి. బెయిల్‌ పిటిషన్లపై తీర్పును హైకోర్టు రిజర్వ్‌ చేసింది.

24/08/2023 19:03(IST)

సునీల్‌ యాదవ్‌ బెయిల్‌పై విచారణ సెప్టెంబర్‌ 1కి వాయిదా

హైదరాబాద్‌: వివేకా హత్య కేసులో నిందితుడు సునీల్‌ యాదవ్‌ బెయిల్‌పై తెలంగాణ హైకోర్టు విచారించింది. కౌంటర్‌ దాఖలు చేయాలని సీబీఐని ఆదేశించింది. విచారణను హైకోర్టు సెప్టెంబర్‌ 1కి వాయిదా వేసింది.

24/08/2023 18:51(IST)

25న జరగాల్సిన ఎస్సై దేహదారుఢ్య పరీక్షలు వాయిదా

గుంటూరు రేంజ్‌ పరిధిలో శుక్రవారం జరగాల్సిన ఎస్సై దేహదారుఢ్య పరీక్షలను వాయిదా వేశారు. వర్షాల వల్ల మైదానం సిద్ధంగా లేకపోవడంతో సెప్టెంబర్‌ 16కు వాయిదా వేశారు. మిగతా తేదీల్లో జరగాల్సిన ఎస్సై దేహ దారుఢ్య పరీక్షలు యథాతథంగా నిర్వహించనున్నారు.

24/08/2023 18:46(IST)

పుష్ప చిత్రబృందానికి అల్లు అరవింద్‌ అభినందనలు

హైదరాబాద్‌: పుష్ప చిత్రబృందానికి అల్లు అరవింద్‌ అభినందనలు తెలిపారు. జాతీయ ఉత్తమ నటుడు అవార్డు సాధించిన అల్లు అర్జున్‌కు ఆయన అభినందనలు తెలిపారు. 69 ఏళ్లుగా రాని అవార్డును పుష్ప చిత్రం సాధించిందని చెప్పారు.

24/08/2023 18:38(IST)

జగన్‌ది జేసీబీ పరిపాలన: నారా లోకేశ్‌

గన్నవరం నియోజకవర్గంలో తెదేపా జాతీయ ప్రధాన కార్యదర్శి నారా లోకేశ్‌ మల్లవల్లి గ్రామస్థులతో రచ్చబండ కార్యక్రమం నిర్వహించారు. ఈ సందర్భంగా లోకేశ్‌ మాట్లాడుతూ.. తెదేపా సైకిల్‌కు రెండు చక్రాలుంటాయని ముందు చక్రం సంక్షేమం, వెనక చక్రం అభివృద్ధి అని తెలిపారు. రూ.200 పింఛన్‌ను తెదేపా రూ.2 వేలకు పెంచిందని తెలిపారు. పండుగ కానుకలు, పెళ్లి కానుక, పసుపు కుంకుమ, చంద్రన్న బీమా లాంటి అనేక సంక్షేమ కార్యక్రమాలు అమలు చేసిందని తెలిపారు. మల్లవల్లిలో భూములు కాపాడి ఇండస్ట్రియల్ ఎస్టేట్ ఏర్పాటు చేసినట్లు చెప్పారు. జగన్ విధ్వంసంతో పరిపాలన మొదలు పెట్టాడని.. ప్రజవేదిక కూల్చాడని గుర్తుచేశారు. జగన్‌ది జేసీబీ పరిపాలన అని విమర్శించారు.

24/08/2023 18:16(IST)

అల్లు అర్జున్‌ నివాసం వద్ద అభిమానుల సందడి

హైదరాబాద్‌: అల్లు అర్జున్‌ నివాసం వద్ద అభిమానుల సందడి నెలకొంది. జాతీయ ఉత్తమ నటుడు అల్లు అర్జున్‌కు అభినందనలు వెల్లువలా వస్తున్నాయి. పలువురు సినీ ప్రముఖులు ఆయన్ను అభినందిస్తున్నారు.

24/08/2023 18:04(IST)

వెనకబడిన కుల వృత్తిదారులకు చేయూత అందించడమే లక్ష్యం: తలసాని

హైదరాబాద్‌: వెనకబడిన కుల వృత్తిదారులకు చేయూత అందించడమే ప్రభుత్వ లక్ష్యమని మంత్రి తలసాని శ్రీనివాస్ యాదవ్ అన్నారు. ఖైరతాబాద్ నియోజకవర్గానికి చెందిన 300 మంది లబ్ధిదారులకు గురువారం బంజారాహిల్స్‌లోని బంజారా భవన్‌లో బీసీ బంధు చెక్కులను అందజేశారు. రాష్ట్రంలో అర్హులైన పేదలందరికీ నిరంతరం బీసీ బంధు పథకం కొనసాగుతుందని చెప్పారు. ప్రతి నెల దశలవారీగా అర్హులకు రూ.లక్ష చొప్పున ఆర్థిక సాయం అందజేస్తారని తెలిపారు.

24/08/2023 17:52(IST)

ఇంజినీరింగ్ ప్రత్యేక విడత సీట్ల కేటాయింపు

హైదరాబాద్‌: తెలంగాణ ఎంసెట్‌ కౌన్సెలింగ్‌కు సంబంధించి ఇంజినీరింగ్ ప్రత్యేక విడత సీట్ల కేటాయించారు. ఇంజినీరింగ్ ప్రత్యేక విడతలో కొత్తగా 1,966 సీట్లను కేటాయించారు. మొత్తంగా ఇంజినీరింగ్ కన్వీనర్ కోటాలో 16,296 సీట్లు మిగిలాయి. ఇంజినీరింగ్ ప్రత్యేక విడతలో 10,535 అభ్యర్థులు సీట్లు మార్పు చేసుకున్నారు. ఇంజినీరింగ్ కన్వీనర్ కోటాలో మొత్తంగా 69,375 సీట్లు కేటాయించారు. ఈ నెల 28 వరకు సెల్ఫ్ రిపోర్టింగ్ చేసి.. 29 వరకు కళాశాలలో చేరాలని కన్వీనర్ తెలిపారు.

24/08/2023 17:24(IST)

69వ జాతీయ చలనచిత్ర పురస్కారాల ప్రకటన

దిల్లీ: 2021 ఏడాదిగానూ 69వ జాతీయ చలనచిత్ర పురస్కారాలను కేంద్రం ప్రకటించింది. ఉత్తమ జాతీయ చిత్రం (తెలుగు)గా ‘ఉప్పెన’ నిలిచింది. వైష్ణవ్‌ తేజ్‌, కృతి శెట్టి జంటగా నటించిన ఈ చిత్రానికి బుచ్చిబాబు సానా దర్శకుడు. మైత్రీ మూవీ మేకర్స్‌ ఈ సినిమాను నిర్మించారు. మిగిలిన భాషల్లో ఇలా ఉన్నాయి... కన్నడ- 777 చార్లీ, హిందీ - సర్దార్‌ ఉద్దమ్‌, మలయాళం -హోం, గుజరాతీ- ఛల్లోషో, ఒడియా- ప్రతిక్షయ నిలిచాయి.

పూర్తి వార్త కోసం క్లిక్‌ చేయండి

24/08/2023 17:23(IST)

జగన్ మోహన్‌ రెడ్డి ఉత్తుత్తి శంకుస్థాపనలకు సిద్ధమయ్యాడు: గుమ్మడి సంధ్యారాణి

కృష్ణా: నాలుగేళ్లుగా గిరిజనులకు చేసిన అన్యాయం, ద్రోహాన్ని కప్పిపుచ్చడానికే జగన్ మోహన్‌ రెడ్డి ఉత్తుత్తి శంకుస్థాపనలకు సిద్ధమయ్యాడని తెదేపా పొలిట్‌బ్యూరో సభ్యురాలు గుమ్మడి సంధ్యారాణి విమర్శించారు. చంద్రబాబు హయాంలో పనులు ప్రారంభమైన గిరిజన విశ్వవిద్యాలయానికి మళ్లీ శంకుస్థాపన చేయడం, ఎన్నికల జిమ్మిక్కుల్లో భాగమేనని ఎద్దేవా చేశారు. ఒడిశా సరిహద్దు గ్రామాల వివాదంపై గతంలో అనుచిత వ్యాఖ్యలు చేసిన కేంద్ర మంత్రి ధర్మేంద్ర ప్రదాన్‌తో గిరిజన విశ్వవిద్యాలయానికి శంకుస్థాపన చేయిస్తారా అని ప్రశ్నించారు. ధర్మేంద్ర ప్రదాన్ ఆంధ్రప్రదేశ్ ప్రజలకు క్షమాపణలు చెప్పాకే రాష్ట్రంలో అడుగుపెట్టాలని డిమాండ్ చేశారు. నాలుగేళ్లుగా గిరిజనుల్ని మోసగించి, వారి భూములు, ఖనిజ సంపదను కొల్లగొట్టిన జగన్ వారికి బహిరంగ క్షమాపణ చెప్పాలన్నారు.

24/08/2023 17:10(IST)

విద్యార్థి దశ నుంచే అమ్మకాలు, కొనుగోలుపై అవగాహన కలిగి ఉండాలి

ప్రతి వ్యక్తి విద్యార్థి దశ నుంచి అమ్మకాలు, కొనుగోలు వాటి నాణ్యత ధరలపై అవగాహన కలిగి ఉండాలని రాష్ట్ర పౌరసరఫరాల శాఖ కమిషనర్ అనిల్ కుమార్ అన్నారు. కృష్ణా జిల్లా పెనమలూరు నియోజకవర్గంలోని కంకిపాడు మండలం పునాదిపాడు జడ్పీ పాఠశాలలో వినియోగదారుల ఫోరంపై అవగాహన సదస్సు ఏర్పాటు చేశారు. ఇందులో భాగంగా విద్యార్థులకు గ్యాస్, పెట్రోల్, విత్తనాలు, ఎరువులు ఇతర కొనుగోళ్లపై అవగాహన కల్పించారు. వినియోగదారుడు తాను కొనుగోలు చేసిన వస్తువులతో నష్టపోతే తీసుకోవాల్సిన చర్యలు గురించి అవగాహన కల్పించారు.

24/08/2023 16:59(IST)

పాఠశాలలో విద్యుదాఘాతంతో విద్యార్థి మృతి.. గ్రామస్థుల ఆందోళన

కృష్ణా జిల్లా గుడ్లవల్లేరు మండలంలోని చింతలకుంటలో దారుణం చోటు చేసుకుంది. విద్యుదాఘాతంతో రెండో తరగతి విద్యార్థి మృతి చెందాడు. విద్యుదాఘాతానికి గురైన విద్యార్థిని చికిత్సకు తీసుకెళ్లకుండా ఉపాధ్యాయులు తరగతి గదిలో పడుకోబెట్టారు. ఉపాధ్యాయుల నిర్లక్ష్యమే చిన్నారి మృతికి కారణమంటూ గ్రామస్థులు ఆందోళన చేపట్టారు. లంకా కార్తీక్ (8) చింతలకుంట మండల పరిషత్ పాఠశాలలో రెండో తరగతి చదువుతున్నాడు. పాఠశాలలో నాడు-నేడు పనులు జరుగుతుండటంతో తరగతులను ప్రైవేటు భవనంలో నిర్వహిస్తున్నారు. మధ్యాహ్న భోజనం ప్లేట్లు కడుక్కునేందుకు విద్యార్థులు కుళాయి వద్దకు చేరుకున్న సమయంలో నీరు చాలకపోవడంతో ఉపాధ్యాయులు మోటార్ వేశారు. దీంతో విద్యార్థి కార్తీక్‌ విద్యుదాఘాతంతో కుప్పకూలిపోయాడు.

24/08/2023 16:54(IST)

చోరీలకు పాల్పడుతున్న చెడ్డీ గ్యాంగ్‌ అరెస్ట్‌

హైదరాబాద్‌: చోరీలకు పాల్పడుతున్న చెడ్డీ గ్యాంగ్‌ను అరెస్ట్‌ చేశారు. ముఠాలోని నలుగురిని సైబరాబాద్‌ ఎస్‌వోటీ పోలీసులు అరెస్ట్‌ చేశారు. మియాపూర్‌, అమీన్‌పూర్‌లో చెడ్డీ గ్యాంగ్‌ పలు చోరీలకు పాల్పడింది. వారి నుంచి రూ.4 లక్షల విలువైన బంగారాన్ని పోలీసులు స్వాధీనం చేసుకున్నారు.

24/08/2023 16:52(IST)

చెస్‍ ప్రపంచకప్‍ 2023: ర్యాపిడ్‍ రౌండ్‍ తొలి గేమ్‍లో మాగ్నస్‍ కార్ల్‌సన్‌ విజయం

చెస్‍ ప్రపంచకప్‍ 2023 ర్యాపిడ్‍ రౌండ్‍ తొలిగేమ్‍లో మాగ్నస్‍ కార్ల్‌సన్‌ విజయం సాధించాడు. మొత్తం మూడు గేమ్‌లుగా ర్యాపిడ్‌ రౌండ్‌ సాగనుంది. ఈక్రమంలో ర్యాపిడ్‍ రౌండ్ రెండో గేమ్‍లో ప్రజ్ఞానంద తప్పక గెలవాల్సిన అవసరం ఏర్పడింది.

24/08/2023 16:49(IST)

బుగ్గన రాజేంద్రనాథ్ రెడ్డి అప్పుల మంత్రిగా పేరు తెచ్చుకున్నారు: కోట్ల సూర్యప్రకాష్ రెడ్డి

కర్నూలు: వైకాపా ప్రభుత్వానికి రైతులపై ప్రేమ లేదని మాజీ కేంద్ర మంత్రి కోట్ల సూర్యప్రకాష్ రెడ్డి ఆరోపించారు. కర్నూలు జిల్లాలో గుండ్రేవుల ప్రాజెక్టు, ఆర్టీఎస్ కుడి కాల్వ, వేదవతి లాంటి పెండింగ్ ప్రాజెక్టులు పూర్తి చేయాలని డిమాండ్ చేశారు. అక్రమ మద్యం, ఇసుక మాఫియా ఇష్టారాజ్యంగా చెలరేగిపోతుంటే కర్నూలు జిల్లా మంత్రిగా ఉన్న బుగ్గన రాజేంద్రనాథ్ రెడ్డి ఏం చేస్తున్నారని ప్రశ్నించారు. పోలీసు వ్యవస్థను నీరు గార్చారని ఆవేదన వ్యక్తం చేశారు. బుగ్గన అసెంబ్లీలోనే కాకుండా బయట కూడా పిట్ట కథలు చెబుతున్నారని, అప్పుల మంత్రిగా పేరు తెచ్చుకున్నారని ఎద్దేవా చేశారు.

24/08/2023 16:34(IST)

వీరవల్లి పోలీసుస్టేషన్‌ వద్ద ఉద్రిక్తత

ప్రకాశం జిల్లా వీరవల్లి పోలీసుస్టేషన్‌ వద్ద ఉద్రిక్తత నెలకొంది. ఫిర్యాదు చేసేందుకు వెళ్లిన తెదేపా నాయకులతో వైకాపా నాయకులు బాహాబాహీకి దిగారు. ఈక్రమంలో తెదేపా, వైకాపా శ్రేణులు పరస్పరం కుర్చీలు విసురుకున్నారు.

24/08/2023 16:31(IST)

ఇన్ఫోసిస్‌ గ్లోబల్‌ బ్రాండ్‌ అంబాసిడర్‌గా రఫెల్‌ నాదల్‌

ఇన్ఫోసిస్‌ గ్లోబల్‌ బ్రాండ్‌ అంబాసిడర్‌గా టెన్నిస్‌ దిగ్గజం రఫెల్‌ నాదల్‌ను నియమించారు. ఇన్ఫోసిస్‌లో భాగం అవుతున్నందుకు సంతోషంగా ఉందంటూ రఫెల్‌ ఈ మేరకు ట్వీట్‌ చేశారు.

24/08/2023 16:27(IST)

ప్రజాస్వామ్యాన్ని వైకాపా ఖూనీ చేస్తోంది: ప్రభాకర్ చౌదరి

కర్నూలు: ప్రజాస్వామ్యాన్ని వైకాపా ఖూనీ చేస్తోందని తెదేపా కర్నూలు జిల్లా బాధ్యుడు ప్రభాకర్ చౌదరి విమర్శించారు. తిరిగి అధికారంలోకి వచ్చేందుకు కుట్రలు, కుయుక్తులు, వక్రమార్గాలను అనుసరిస్తోందని మండిపడ్డారు. ఓటర్ లిస్టులో తెదేపా సానుభూతిపరుల ఓట్లు తొలగించడం, భారీగా దొంగ ఓట్లను చేర్చడం లాంటి చర్యలకు పాల్పడుతోందని ఆరోపించారు. వీటిని తమ పార్టీ అడ్డుకుంటోందని తెలిపారు.

24/08/2023 16:20(IST)

అవనిగడ్డలో భారీ ర్యాలీ

హైదరాబాద్‌: చంద్రయాన్ 3 విజయవంతమైన సందర్భంగా ఇస్రో శాస్త్రవేత్తలకు, భారతదేశ ప్రజలకు శుభాకాంక్షలు తెలియజేస్తూ అవనిగడ్డ శాసనసభ్యుడు సింహాద్రి రమేష్ బాబు ఆధ్వర్యంలో భారీ ర్యాలీ నిర్వహించారు. 5 వేల మంది విద్యార్థులు జాతీయ జెండాలు చేతపట్టి ర్యాలీలో పాల్గొన్నారు.

24/08/2023 16:16(IST)

మియాపూర్‌ కాల్పుల ఘటనలో నిందితుడు రితీష్‌ అరెస్ట్‌

హైదరాబాద్‌: మియాపూర్‌లో దేవేందర్‌పై కాల్పులు జరిపిన నిందితుడు రితీష్‌ను పోలీసులు అరెస్ట్‌ చేశారు. పోలీసులు తెలిపిన వివరాల ప్రకారం.. నెలక్రితం వరకు రితీష్‌ నాయర్‌ సందర్శిని ఎలైట్‌ మేనేజర్‌గా పనిచేశాడు. ఓ అమ్మాయి విషయంలో రితీష్‌ నాయర్‌, దేవేందర్‌ మధ్య గొడవ జరిగింది. రితీష్‌పై సందర్శిని ఎలైట్‌ యజమానికి దేవేందర్‌ ఫిర్యాదు చేశాడు. దేవేందర్‌ ఫిర్యాదు వల్లే ఉద్యోగం పోయిందనే కోపంతో రితీష్‌ కాల్పులు జరిపాడు.

24/08/2023 16:05(IST)

కాసేపట్లో సీపీఎస్‌పై ఏపీ రాష్ట్ర ప్రభుత్వం అత్యవసర భేటీ

కాసేపట్లో ఏపీ రాష్ట్ర ప్రభుత్వం సీపీఎస్‌పై అత్యవసర భేటీ కానుంది. సీపీఎస్‌పై ప్రభుత్వం ఇప్పటికే ఉద్యోగ సంఘాల నుంచి రాతపూర్వక ప్రతిపాదనలు కోరింది. సీపీఎస్‌ ఆర్డినెన్స్‌పై ఉద్యోగ సంఘాలు తీవ్ర ఆగ్రహం వ్యక్తం చేస్తున్నాయి. ఉద్యోగుల వ్యతిరేకతతో సాధారణ పరిపాలన శాఖ.. ఉద్యోగ సంఘాల నుంచి ప్రతిపాదనలు కోరింది.

24/08/2023 15:57(IST)

బాంబు పేలుళ్ల కేసులో ఆరుగురిని నిర్దోషులుగా ప్రకటించిన హైకోర్టు

2004 దేమాజీ బాంబు పేలుళ్ల కేసులో గువాహటి హైకోర్టు కీలక తీర్పునిచ్చింది. బాంబు పేలుళ్ల కేసులో ఆరుగురిని నిర్దోషులుగా ప్రకటించింది. 2019లో సెషన్స్‌ కోర్టు నలుగురికి జీవిత ఖైదు, ఇద్దరికి 4 ఏళ్ల జైలు శిక్ష విధించింది. సెషన్స్‌ కోర్టు తీర్పును గువాహటి హైకోర్టు తోసిపుచ్చింది.

24/08/2023 15:54(IST)

వైద్యారోగ్య శాఖపై సీఎం జగన్‌మోహన్‌రెడ్డి సమీక్ష

వైద్యారోగ్య శాఖపై సీఎం జగన్‌మోహన్‌రెడ్డి సమీక్ష నిర్వహించారు. ఆరోగ్యశ్రీ సేవలపై ముమ్మర ప్రచారం నిర్వహించాలని ఆదేశించారు. ప్రతి ఇంటికి వెళ్లి ఆరోగ్యశ్రీ గురించి వివరంగా తెలపాలని కోరారు. ఆరోగ్య ఆసరా కింద రోగికి డిశ్చార్జి రోజే డబ్బు అందించాలని తెలిపారు. కొత్తగా నిర్మించే 17 వైద్య కళాశాలల నిర్మాణంపై సీఎం సమీక్ష నిర్వహించారు.

24/08/2023 15:49(IST)

తిరుమల తొలి పౌరుడు తిరుమలనంబి

తిరుమల శ్రీవారికి పుష్ప కైంకర్యం, మంత్రపుష్ప కైంకర్యం, వేద‌పారాయ‌ణ కైంక‌ర్యం, ఇతర కైంకర్యాలు చేసి తిరుమల తొలి పౌరుడిగా తిరుమలనంబి నిలిచారని తిరుపతిలోని జాతీయ సంస్కృత విశ్వవిద్యాలయం ఆచార్యుడు చ‌క్రవర్తి రంగ‌నాథ‌న్‌ తెలిపారు. ప్రముఖ వైష్ణవాచార్యులు తిరుమలనంబి అవతార మహోత్సవాన్ని గురువారం తిరుమలలోని శ్రీవారి ఆలయ దక్షిణ మాడ వీధిలో గల తిరుమలనంబి ఆలయంలో ఘనంగా నిర్వహించారు. ఈ సందర్భంగా ఆయన మాట్లాడుతూ.. తిరుమలనంబి స్వయాన రామానుజులవారికి మేనమామ అన్నారు. రామానుజాచార్యులకు రామాయణంలోని రహస్యార్థాలను చెప్పి, విశిష్టాద్వైత మతానికి పునాది వేశారని తెలియజేశారు.

24/08/2023 15:42(IST)

రంగన్న గూడెం ఘర్షణపై తెదేపా నేతల ఫిర్యాదు

రంగన్న గూడెం ఘర్షణపై పోలీసులకు తెదేపా నేతలు దేవినేని ఉమ, కొల్లు రవీంద్ర ఫిర్యాదు చేశారు. కొడాలి నాని, వంశీ హింసను ప్రేరేపించేలా దాడికి ఉసిగొల్పారని ఫిర్యాదులో పేర్కొన్నారు. హత్యాయత్నం చేసిన బాధ్యులపై చర్యలు తీసుకోవాలని డిమాండ్‌ చేశారు. పాదయాత్రపై దాడి చేసి శాంతిభద్రతల విఘాతానికి కుట్ర చేశారని ఫిర్యాదులో పేర్కొన్నారు. 20 మంది వైకాపా శ్రేణులు రెచ్చగొట్టే నినాదాలు చేశారని చెప్పారు.

24/08/2023 15:32(IST)

తిరుమల నడకదారిలో ఐరన్ ఫెన్సింగ్‌ ఏర్పాటు చేయాలని హైకోర్టులో పిల్

అమరావతి: తిరుపతిలో అలిపిరి నుంచి తిరుమల వరకు నడకదారిలో ఐరన్ ఫెన్సింగ్‌ ఏర్పాటు చేయాలని తితిదే మాజీ బోర్డు సభ్యుడు భానుప్రకాశ్‌రెడ్డి ఏపీ హైకోర్టులో పిల్ దాఖలు చేశారు. భక్తులను పులుల బారి నుంచి కాపాడాలని పిల్‌లో పేర్కొన్నారు. చిరుత దాడిలో ప్రాణాలు కోల్పోయిన బాలిక లక్షిత కుటుంబానికి ప్రభుత్వం రూ.కోటి నష్ట పరిహారం చెల్లించాలని పిటిషనర్ డిమాండ్ చేశారు. పిటిషనర్ తరుఫున హైకోర్టులో న్యాయవాది యలమంజుల బాలాజీ పిల్ దాఖలు చేశారు. ఇది సోమవారం విచారణకు వచ్చే అవకాశం ఉంది.

24/08/2023 15:25(IST)

కృష్ణమోహన్‌రెడ్డి ఎన్నికను రద్దు చేస్తూ హైకోర్టు తీర్పు

గద్వాల భారాస ఎమ్మెల్యే కృష్ణమోహన్‌రెడ్డి ఎన్నికను రద్దు చేస్తూ తెలంగాణ హైకోర్టు తీర్పునిచ్చింది. డీకే అరుణను ఎమ్మెల్యేగా ప్రకటించింది. తప్పుడు అఫిడవిట్ దాఖలు చేసిన అంశంలో ఈ మేరకు హైకోర్టు తీర్పునిచ్చింది.

24/08/2023 15:15(IST)

మహబూబాబాద్‌ భారాస ఎమ్మెల్యే అభ్యర్థిని మార్చాలని డిమాండ్‌

మహబూబాబాద్‌లో ఎమ్మెల్సీ రవీందర్‌రావు వర్గీయులు సమావేశమయ్యారు. సీఎం కేసీఆర్‌ కోసం పని చేస్తాం.. శంకర్‌నాయక్‌ కోసం కాదని వారు తేల్చి చెప్పారు. శంకర్‌నాయక్‌కు మద్దతు ఇవ్వకూడదని రవీందర్‌రావు వర్గం తీర్మానించింది. మహబూబాబాద్‌ భారాస ఎమ్మెల్యే అభ్యర్థిని మార్చాలని వారు డిమాండ్‌ చేశారు. ఈక్రమంలో అనుచరులను ఎమ్మెల్సీ రవీందర్‌రావు శాంతింపజేశారు. అభ్యర్థి మార్పు అంశాన్ని సీఎం కేసీఆర్‌ దృష్టికి తీసుకెళ్తామని చెప్పారు.

24/08/2023 15:02(IST)

రాజ్‌భవన్‌కు చేరుకుంటున్న మంత్రులు, ఉన్నతాధికారులు

పట్నం మహేందర్‌రెడ్డి మంత్రిగా ప్రమాణస్వీకారం చేయనున్న నేపథ్యంలో మంత్రులు, ఉన్నతాధికారులు ఒక్కొక్కరుగా రాజ్‌భవన్‌కు చేరుకుంటున్నారు. రాజ్‌భవన్‌ దర్బార్‌హాల్‌లో గవర్నర్‌ తమిళిసై ఆయనతో ప్రమాణం చేయించనున్నారు. అనంతరం సాయంత్రం 3.30 గంటలకు మంత్రివర్గ విస్తరణ చేపట్టనున్నారు.

24/08/2023 14:36(IST)

నాడు దండగ అన్న జగన్‌కు నేడు పట్టిసీమే దిక్కయింది: లోకేశ్‌

దేశచరిత్రలో తొలిసారిగా పట్టిసీమ ఎత్తిపోతల పథకం ద్వారా గోదావరి-కృష్ణా నదుల అనుసంధానానికి శ్రీకారం చుట్టిన అపర భగరీథుడు చంద్రబాబునాయుడు అని నారా లోకేశ్‌ తెలిపారు. కృష్ణా డెల్టాలో రైతుల కష్టాలు తీర్చేందుకు కేవలం 11నెలల వ్యధిలో రూ.1360 కోట్ల వ్యయంతో 2016లో ఈ ప్రాజెక్టును పూర్తిచేశారని గుర్తు చేశారు. రికార్డు సమయంలో పూర్తయిన ప్రాజెక్టుగా కూడా పట్టిసీమ లిమ్కా బుక్ ఆఫ్ రికార్డ్స్‌లో స్థానం పొందిందని చెప్పారు. నాడు దండగ అన్న జగన్‌కు నేడు పట్టిసీమే దిక్కయిందని ఎద్దేవా చేశారు. దార్శనికుడు చంద్రబాబునాయుడు ముందుచూపునకు నిదర్శనం పట్టిసీమ ప్రాజెక్టు అని వివరించారు.

24/08/2023 14:36(IST)

మైలార్‌దేవ్‌పల్లి పోలీస్‌స్టేషన్‌ను ప్రారంభించిన మంత్రి మహమూద్‌ అలీ

రంగారెడ్డి జిల్లా మైలార్‌దేవ్‌పల్లి పోలీస్‌స్టేషన్‌ను మంత్రి మహమూద్‌ అలీ ప్రారంభించారు. ఈ కార్యక్రమంలో ఎంపీ రంజిత్‌రెడ్డి, డీజీపీ అంజనీకుమార్‌, ఎమ్మెల్యే ప్రకాశ్‌గౌడ్‌తో పాటు పలువురు ఉన్నతాధికారులు, ప్రజాప్రతినిధులు పాల్గొన్నారు.

24/08/2023 14:33(IST)

దివిసీమ రైతు పోరు బాటకు తొలగిన అడ్డంకులు

దివిసీమ రైతు పోరు బాటకు అడ్డంకులు తొలిగాయి. దివిసీమ రైతులు ఎదుర్కొంటున్న ప్రధాన సమస్యలపై శుక్రవారం మధ్యాహ్నం నిర్వహించనున్న సామూహిక సత్యాగ్రహానికి పోలీసులు అనుమతించారు. అక్విడెక్ట్ పై సత్యాగ్రహం చేస్తే ప్రజల తాకిడికి అక్విడెక్ట్ దెబ్బతింటుందని బుధవారం ఇరిగేషన్‌ అధికారులు అనుమతులు నిరాకరించిన విషయం తెలిసిందే.

24/08/2023 14:29(IST)

ప్రైవేటు డెయిరీకి భూకేటాయింపులపై రైతుల ఆగ్రహం

రాప్తాడు సమీపంలో ప్రైవేటు డెయిరీకి భూకేటాయింపులపై రైతులు ఆగ్రహం వ్యక్తం చేశారు. ఏపీఐఐసీ తీసుకున్న భూములు ప్రైవేటు డైరీకి ఎలా కేటాయిస్తారని మండిపడ్డారు. ప్రస్తుత మార్కెట్‌ ధర ప్రకారం చెల్లించి భూకేటాయింపులు చేయాలని డిమాండ్‌ చేశారు. ప్రైవేటు డెయిరీ ప్రతినిధులు భూమి వద్దకు వెళ్లగానే రైతులు అడ్డుకున్నారు.

24/08/2023 14:26(IST)

ప్రియుడి ఇంటి ముందు 2 నెలల చిన్నారితో యువతి నిరసన

సూర్యాపేట: కోదాడ బాలాజీ నగర్‌లో ప్రియుడి ఇంటిముందు 2 నెలల చిన్నారితో ఎండలో యువతి ఆందోళన చేసింది. ప్రియుడు నాగేంద్రబాబు మోసం చేశాడని యువతి నిరసన తెలిపింది. ప్రియుడి కుటుంబీకులు ఇంటికి తాళం వేసుకొని వెళ్లిపోయారు.

24/08/2023 14:22(IST)

జనగామ టికెట్‌కు పొన్నాల.. కామారెడ్డికి షబ్బీర్‌ అలీ దరఖాస్తులు

జనగామ కాంగ్రెస్‌ టికెట్‌ కోసం మాజీ మంత్రి పొన్నాల లక్ష్మయ్య దరఖాస్తు చేసుకున్నారు. పొన్నాల తరఫున ఆయన పీఏ దరఖాస్తు సమర్పించారు. కామారెడ్డి కాంగ్రెస్‌ టికెట్‌ కోసం షబ్బీర్‌ అలీ దరఖాస్తు చేసుకున్నారు. షబ్బీర్‌ అలీ తరఫున కామారెడ్డి నియోజకవర్గ కార్యకర్తలు దరఖాస్తు సమర్పించారు.

24/08/2023 14:18(IST)

గ్రేటర్‌ పరిధిలో రెండు పడక గదుల ఇళ్ల కేటాయింపు

హైదరాబాద్‌ గ్రేటర్‌ పరిధిలో రెండు పడక గదుల ఇళ్లను కేటాయించారు. తొలివిడతలో 12వేల ఇళ్లు పంపిణీ చేయాలని సర్కారు నిర్ణయించింది. ఈక్రమంలో లబ్ధిదారుల జాబితాను ఆన్‌లైన్‌ సాఫ్ట్‌వేర్‌ ద్వారా ర్యాండం పద్ధతిలో మంత్రి తలసాని శ్రీనివాస్‌ యాదవ్‌ విడుదల చేశారు. కార్యక్రమంలో మంత్రి మహమూద్‌ అలీ, ఎంపీ రంజిత్‌రెడ్డి తదితరులు పాల్గొన్నారు.

24/08/2023 14:12(IST)

జుట్లు జుట్లు పట్టుకున్నోళ్లు ఈరోజు పదవులు పంచుకుంటున్నారు: రేవంత్‌రెడ్డి

రంగారెడ్డి: తాండూరులో కాంగ్రెస్‌ కార్యకర్తల సమావేశంలో టీపీసీసీ చీఫ్ రేవంత్‌రెడ్డి పాల్గొన్నారు. ఈ నెల 26న చేవెళ్ల ప్రజాగర్జన సభ నేపథ్యంలో తాండూరులో సమావేశం ఏర్పాటు చేశారు. ఈ సందర్భంగా రేవంత్‌రెడ్డి మాట్లాడుతూ.. నాలుగేళ్లుగా అపాయింట్‌మెంట్‌ ఇవ్వని సీఎం ఇప్పుడు మంత్రి పదవి ఇచ్చారని తెలిపారు. జుట్లు జుట్లు పట్టుకున్నోళ్లు ఈరోజు పదవులు పంచుకుంటున్నారని ఆరోపించారు. వాళ్లకు మంత్రి పదవులు వచ్చాయి తప్ప.. తాండూరుకు ఒరిగిందేంటి అని ప్రశ్నించారు. తాండూరుకు సాగునీరు ఇవ్వాల్సిందేనని డిమాండ్‌ చేశారు.

24/08/2023 14:04(IST)

మురికి గుంటలో పడి రెండేళ్ల చిన్నారి మృతి

కృష్ణా జిల్లాలో రెండేళ్ల బాలుడి అదృశ్యం విషాదాంతంగా ముగిసింది. మురికి గుంటలో పడి రెండేళ్ల చిన్నారి ప్రిన్స్‌ బాబు మృతి చెందాడు. ఆడుకుంటూ ప్రమాదవశాత్తు గుంటలో పడి ఉంటాడని పోలీసులు భావిస్తున్నారు. కృష్ణా జిల్లా పమిడిముక్కల మండలం కపిలేశ్వరపురంలో ఈ ఘటన చోటు చేసుకుంది. ప్రిన్స్‌ బాబు కనిపించడంలేదని బుధవారం తల్లి అనూష పోలీసులకు ఫిర్యాదు చేశారు. ఈక్రమంలో ఇంటి సమీపంలోని మురికి గుంటలో ప్రిన్స్‌బాబు మృతదేహం లభ్యమైంది.

24/08/2023 13:54(IST)

జగన్‌ పాదయాత్రలో జనాలను కనీసం దగ్గరికి రానివ్వలేదు: ప్రత్తిపాటి

పల్నాడు: లోకేశ్ యువగళం పాదయాత్ర విజయవంతమైందని తెదేపా నేత ప్రత్తిపాటి పుల్లారావు తెలిపారు. చిలకలూరిపేటలో నిర్వహించిన మీడియా సమావేశంలో ఆయన మాట్లాడారు. ఓడినా లోకేశ్‌ ధైర్యంగా మంగళగిరిలోనే పోటీ చేస్తున్నారని వివరించారు. జగన్‌ పాదయాత్రలో జనాలను కనీసం దగ్గరికి రానివ్వలేదని విమర్శించారు. రాష్ట్ర ప్రభుత్వ వ్యవస్థలను అడ్డుపెట్టుకొని మార్గదర్శిపై దాడులు చేస్తున్నారని ఆరోపించారు. మార్గదర్శిపై ప్రజల్లో ఉన్న నమ్మకాన్ని దెబ్బతీయలేరని ప్రత్తిపాటి అన్నారు.

24/08/2023 13:46(IST)

స్థల వివాదంలో ఇరువర్గాల ఘర్షణ

వైఎస్‌ఆర్‌ కడప జిల్లా వేంపల్లిలో స్థల వివాదంలో ఇరువర్గాల మధ్య ఘర్షణ చోటు చేసుకుంది. మందినాపురానికి చెందిన నాసర్‌ బాషా అనే వ్యక్తి ప్రత్యర్థులపై కత్తితో దాడికి దిగాడు. ఈ ఘటనలో చిన్న కాశీం, ఉమర్‌ బాషా, అహ్మద్‌, మహమ్మద్‌ రఫీలు కత్తిపోట్లకు గురయ్యారు. ఘర్షణలకు దిగిన ఇరువర్గాలను పోలీసులు చెదరగొట్టారు. గాయపడిన వారిని వేంపల్లి ప్రభుత్వాసుపత్రికి తరలించారు. ఘర్షణకు గల కారణాలను పోలీసులు ఆరా తీస్తున్నారు.

24/08/2023 13:38(IST)

లోకేశ్‌ పాదయాత్రలో వైకాపా కవ్వింపు చర్యలు

కృష్ణా: బాపులపాడు మండలం రంగన్నగూడెంలో లోకేశ్‌ పాదయాత్రలో వైకాపా కవ్వింపు చర్యలకు పాల్పడింది. వైకాపా నాయకులు కొడాలి నాని, వల్లభనేని వంశీ ఫొటోలతో బ్యానర్లు ఏర్పాటు చేశారు. తెదేపా శ్రేణులపైకి వైకాపా కార్యకర్తలు ఇటుకలు విసిరారు. తెదేపా కార్యకర్తలు తిరగబడటంతో పోలీసులు ఘటనాస్థలికి వచ్చారు. ఈక్రమంలో దేవినేని ఉమ పోలీసులతో తీవ్ర వాగ్వాదానికి దిగారు. వైకాపా శ్రేణులకు మద్దతుగా పోలీసులు వ్యవహరిస్తున్నారని తెదేపా నేతలు మండిపడ్డారు.

24/08/2023 13:35(IST)

‘బ్రిక్స్‌’ మరింత విస్తరణ.. కొత్తగా ఆరు దేశాలు!

జొహాన్నెస్‌బర్గ్‌: ఇప్పటివరకు ఐదు దేశాల కూటమిగా ఉన్న ‘బ్రిక్స్‌’ మరింత విస్తరించనుంది. కొత్తగా ఈజిప్టు, ఇథియోపియా, ఇరాన్‌, అర్జెంటీనా, యూఏఈ, సౌదీ అరేబియాలు ఈ కూటమిలో శాశ్వత సభ్యులుగా చేరతాయని దక్షిణాఫ్రికా అధ్యక్షుడు సిరిల్‌ రమఫోస ప్రకటించారు. వచ్చే జనవరి 1 నుంచి వారి సభ్యత్వం అమల్లోకి వస్తుందని తెలిపారు. ప్రస్తుతం ‘బ్రిక్స్‌’లో బ్రెజిల్‌, రష్యా, భారత్‌, చైనా, దక్షిణాఫ్రికాలు సభ్యదేశాలుగా ఉన్న విషయం తెలిసిందే.

24/08/2023 13:30(IST)

ప్రజ్ఞాన్‌ రోవర్‌ చంద్రుని ఉపరితలంపై పరిశోధనలు చేస్తోంది: ఇస్రో చీఫ్‌ సోమనాథ్‌

ప్రజ్ఞాన్‌ రోవర్‌ చంద్రుని ఉపరితలంపై పరిశోధనలు చేస్తోందని ఇస్రో చీఫ్‌ సోమనాథ్‌ తెలిపారు. రోవర్‌లో రెండు పరికరాలున్నాయని తెలిపారు. ఈ పరికరాలు చంద్రునిపై మూలకాల కూర్పును పరిశోధిస్తాయని వివరించారు. రోవర్‌తో రోబోటిక్‌ పాత్‌ ప్లానింగ్‌ కూడా చేయిస్తామని వివరించారు.

24/08/2023 13:25(IST)

జగన్‌మోహన్‌ రెడ్డి పాలనలో సాగునీటి ప్రాజెక్టులను నిర్వీర్యం చేశారు: లోకేశ్

గన్నవరం నియోజకవర్గం అంపాపురం గ్రామస్థులు నారా లోకేశ్‌ను కలిశారు. తెదేపా పాలనలో పోలవరం కాలువ నుంచి ఏలూరు కాలువ అనుసంధానానికి చర్యలు చేపట్టారని, పనుల నిమిత్తం అప్పట్లో రూ.15కోట్లు మంజూరు చేశారని వారు తెలిపారు. వైకాపా ప్రభుత్వం అధికారంలోకి వచ్చాక ఈ పనులను రద్దు చేసిందని చెప్పారు. తెదేపా అధికారంలోకి వచ్చాక నిలిచిపోయిన పనులను పూర్తిచేయాలని కోరారు.

ఈ సందర్భంగా నారా లోకేశ్‌ మాట్లాడుతూ.. జగన్‌మోహన్‌ రెడ్డి పాలనలో సాగునీటి ప్రాజెక్టులను నిర్వీర్యం చేశారని తెలిపారు. కనీసం ప్రాజెక్టుల నిర్వహణను పట్టించుకోకపోవడంతో అన్నమయ్య ప్రాజెక్టు కొట్టుకుపోయిందని తెలిపారు. పులిచింతల, గుండ్లకమ్మ గేట్లు కొట్టుకుపోతే పట్టించుకునే దిక్కులేదని విమర్శించారు.

24/08/2023 13:13(IST)

ప్రభుత్వ భూములను భారాస నేతలకు కట్టబెడుతున్నారు: కోదండరామ్‌

హైదరాబాద్‌: ప్రభుత్వ భూములను భారాస నేతలకు కట్టబెడుతున్నారని తెజస అధ్యక్షుడు కోదండరామ్‌ ఆరోపించారు. ఎస్సీల భూములను ప్రభుత్వం లాక్కొని వేలం వేస్తోందని విమర్శించారు. కేసీఆర్‌ పదేళ్ల పాలనపై ఛార్జ్‌షీట్‌ వేస్తామన్నారు. కేసీఆర్‌ రెండు చోట్ల పోటీ చేయడం భయంతో కూడిన చర్యగా పేర్కొన్నారు. పోటీ చేయమని కామారెడ్డి ఎమ్మెల్యే అడిగారనడం హాస్యాస్పదమని ఎద్దేవా చేశారు.

24/08/2023 13:12(IST)

దుర్గం చెరువు తీగల వంతెనపై ఆటో బోల్తా

హైదరాబాద్‌: రోడ్డు ప్రమాదాల నివారణకు సైబరాబాద్ ట్రాఫిక్‌ పోలీసులు ప్రజలకు పలు విధాలుగా అవగాహన పెంచే ప్రయత్నం చేస్తున్నారు. అందులో భాగంగా దుర్గం చెరువు తీగల వంతెనపై గతంలో ఓ ఆటో బోల్తా పడిన ఘటనకు సంబంధించిన వీడియోను సామాజిక మాధ్యమాల్లో షేర్‌ చేసినట్లు తెలుస్తోంది. ఇందులో జూబ్లీహిల్స్ నుంచి ఐటీసీ కొహినూర్ వైపు వస్తున్న ఆటో అకస్మాత్తుగా బోల్తా కొట్టింది. డ్రైవర్ సెల్‌ఫోన్‌ చూస్తూ ఆటో నడుపుతూ.. ఎదురుగా ఉన్న వాహనాన్ని గమనించలేదు. దీంతో ద్విచక్ర వాహనానికి సమీపించగానే.. ఢీ కొడుతుందనే భయంతో ఆటోను కుడివైపుకు తిప్పాడు. దీంతో అదుపు తప్పిన ఆటో పల్టీ కొట్టింది.

24/08/2023 13:07(IST)

టీచర్‌ పోస్టుల భర్తీకి 2 రోజుల్లో డీఎస్సీ నోటిఫికేషన్‌: సబితా ఇంద్రారెడ్డి

హైదరాబాద్‌: నిరుద్యోగులకు మరో శుభవార్త. టీచర్‌ పోస్టుల భర్తీకి 2 రోజుల్లో డీఎస్సీ నోటిఫికేషన్‌ జారీ చేయనున్నట్లు మంత్రి సబితా ఇంద్రారెడ్డి వెల్లడించారు. మొత్తంగా 6,500కు పైగా పోస్టులను భర్తీ చేయాలని నిర్ణయించినట్టు తెలిపారు. ఇందులో పాఠశాల విద్యలో 5,089, స్పెషల్‌ ఎడ్యుకేషన్‌ స్కూళ్లలో 1,523 పోస్టులు ఉన్నట్లు చెప్పారు. ఈ మేరకు హైదరాబాద్‌లో ఆమె మీడియాతో మాట్లాడారు. కార్పొరేట్‌ పాఠశాలల స్థాయిలో ప్రభుత్వ పాఠశాలలను తీర్చిదిద్దుతున్నట్లు వివరించారు.

24/08/2023 13:01(IST)

ఓట్ల తొలగింపుపై రాష్ట్రవ్యాప్తంగా చర్చ జరగాలి: పయ్యావుల

అనంతపురం: ఓట్ల తొలగింపుపై రాష్ట్రవ్యాప్తంగా చర్చ జరగాలని తెదేపా ఎమ్మెల్యే పయ్యావుల కేశవ్‌ అన్నారు. కిందిస్థాయిలో తప్పులు చేస్తున్న అధికారులపై చర్యలు తప్పవని హెచ్చరించారు. కొందరు అధికారులు సొంత మార్గదర్శకాలు ఇస్తున్నారని ఆయన ఆరోపించారు. అనంతపురంలో నిర్వహించిన మీడియా సమావేశంలో పయ్యావుల మాట్లాడారు.

24/08/2023 13:01(IST)

ఆర్టీసీ కురువృద్ధుడి మృతికి సంతాపం తెలిపిన సజ్జనార్‌

నిజాం స్టేట్‌ రైల్‌ అండ్‌ రోడ్‌ ట్రాన్స్‌పోర్టు డిపార్ట్‌మెంట్‌ (NSRRTD)లో ఉద్యోగంలో చేరి ఉమ్మడి రాష్ట్ర ఆర్టీసీకి సేవలందించిన 98 ఏళ్ల ఆర్టీసీ కురువృద్ధుడు టీఎల్ నరసింహా మృతికి టీఎస్‌ఆర్టీసీ ఎండీ సజ్జనార్‌ ట్విటర్‌ వేదికగా సంతాపం తెలిపారు. ఓల్డ్‌ అల్వాల్‌లోని తన నివాసంలో గురువారం తెల్లవారుజామున నరసింహ తుది శ్వాస విడిచారని పేర్కొన్నారు.

24/08/2023 12:54(IST)

ఉద్యోగాలను పర్మినెంట్ చేయాలని పారిశుద్ధ్య కార్మికుల ఆందోళన

విజయవాడ: చలో విజయవాడకు సీఐటీయూ పిలుపునిచ్చింది. ఏపీ రాష్ట్రవ్యాప్తంగా పారిశుద్ధ్య కార్మికులు హాజరయ్యారు. ఒప్పంద, పొరుగు సేవల సిబ్బందిని పర్మినెంట్‌ చేయాలని డిమాండ్ చేశారు. సమాన పనికి సమాన వేతనం ఇవ్వాలని కోరారు. రాజాంలో వైకాపా ఎమ్మెల్యే జోగులు ఇంటిని కార్మికులు ముట్టడించారు. సమస్యలు పరిష్కరించాలని నిరసన వ్యక్తం చేశారు.

24/08/2023 12:38(IST)

కొడంగల్‌ను దత్తత తీసుకున్న కేసీఆర్‌ ఏం చేశారు: రేవంత్‌రెడ్డి

కేసీఆర్‌ మరోసారి కొడంగల్‌ ప్రజలను మోసం చేస్తున్నారని టీపీసీసీ చీఫ్‌ రేవంత్‌రెడ్డి ఆరోపించారు. ఓటమి భయంతోనే రెండు చోట్ల పోటీ చేస్తున్నారని విమర్శించారు. కొడంగల్‌ను దత్తత తీసుకున్న కేసీఆర్‌ ఏం చేశారని ప్రశ్నించారు. కొడంగల్‌కు రెండేళ్లలో కృష్ణా జలాలు తెస్తామన్న హామీ ఏమైందని అన్నారు.

24/08/2023 12:33(IST)

మంత్రి గంగుల కమలాకర్ ఇంటి వద్ద ఉద్రిక్తత

కరీంనగర్‌లో బీసీ సంక్షేమ శాఖ మంత్రి గంగుల కమలాకర్ ఇంటి వద్ద తీవ్ర ఉద్రిక్తత చోటుచేసుకుంది. ఎన్నికల హామీలు నెరవేర్చాలన్న డిమాండ్‌తో భాజపా శ్రేణులు.. మంత్రి ఇంటి ముట్టడికి యత్నించారు. ఈ క్రమంలో పోలీసులు అడ్డుకొని అదుపులోకి తీసుకునే ప్రయత్నం చేసినప్పటికీ.. వారు ప్రతిఘటించడంతో ఉద్రిక్తత నెలకొంది. ఆందోళనలు చేపట్టకుండా ముందస్తుగానే కొంత మందిని పోలీసులు అదుపులో తీసుకున్నారు. అయినప్పటికీ మరికొందరు మంత్రి ఇంటి ముట్టడికి యత్నించారు. వీరిని అదుపులో తీసుకునే క్రమంలో రోడ్డుపై బైఠాయించారు. కొందరు కార్యకర్తలు గేటు దూకి లోపలికి వెళ్లే ప్రయత్నం చేయగా.. పోలీసులు వారిని అడ్డుకొని పోలీస్ స్టేషన్‌కు తరలించారు.

24/08/2023 12:31(IST)

భద్రాచలంలో బీసీ కులవృత్తుల చెక్కుల పంపిణీలో రసాభాస

భద్రాచలంలో బీసీ కులవృత్తుల చెక్కుల పంపిణీలో రసాభాస చోటు చేసుకుంది. ఎమ్మెల్యే అనుమతి లేకుండా చెక్కులు ఇస్తున్నారని పోదెం వీరయ్య ఆగ్రహం వ్యక్తం చేశారు. భద్రాచలం కార్యక్రమానికి పినపాక ఎమ్యెల్యే రావడంపై వీరయ్య అసహనం వ్యక్తం చేశారు. పినపాక ఎమ్మెల్యే రేగా కాంతారావును మాట్లాడొద్దని పోదెం వీరయ్య అన్నారు. ఈ క్రమంలో కాంగ్రెస్‌, భారాస నాయకుల మధ్య వాగ్వాదం, తోపులాట చోటు చేసుకుంది.

24/08/2023 12:25(IST)

మియాపూర్‌లో కాల్పులు.. నిందితుడిని గుర్తించిన పోలీసులు

హైదరాబాద్‌: మియాపూర్ పోలీసుస్టేషన్ పరిధిలో ఓ హోటల్‌ జనరల్‌ మేనేజర్‌పై జరిగిన కాల్పుల ఘటన కేసును పోలీసులు ఛేదించారు. నిందితుడిని కేరళకు చెందిన రితీష్‌ నాయర్‌గా గుర్తించారు. మదీనాగూడలోని సందర్శిని హోటల్‌ జనరల్ మేనేజర్‌గా పనిచేస్తున్న దేవేందర్‌ గాయన్‌ (35) బుధవారం అర్ధరాత్రి కాల్పులు జరిగిన సంగతి తెలిసిందే. ఈ కాల్పుల్లో తీవ్రంగా గాయపడిన దేవేందర్‌.. ఆస్పత్రిలో చికిత్స పొందుతూ చనిపోయారు. ఈ ఘటనపై కేసు నమోదు చేసి దర్యాప్తు చేపట్టిన మియాపూర్‌ పోలీసులు.. నిందితుడిని గుర్తించారు.

24/08/2023 12:11(IST)

మద్దతు కోసం కోదాడ ఎమ్మెల్యే.. పట్టు వీడని మాజీ ఎమ్మెల్యే

సూర్యాపేట జిల్లా కోదాడ పట్టణ రాజకీయంలో కీలక పరిణామం చోటుచేసుకుంది. వచ్చే ఎన్నికల్లో తనకు మద్దతుగా నిలవాలని ఎమ్మెల్యే బొల్లం మల్లయ్య యాదవ్.. మాజీ ఎమ్మెల్యే, భారాస కీలక నాయకుడు చందర్రావు ఇంటికి వెళ్లారు. అయితే, ఆయణ్ని కలిసేందుకు చందర్రావు ఆసక్తి చూపలేదు. దీంతో అరగంట పాటు నిరీక్షించి, అక్కడ నుంచి బొల్లం మల్లయ్య యాదవ్ వెనుదిరిగాడు. ఎమ్మెల్యేని కలిసేందుకు సిద్ధంగా చందర్రావు లేరని అనుచరులు చర్చించుకుంటున్నారు. కోదాడ భారాస ఎమ్మెల్యే టికెట్‌ను సిట్టింగ్ ఎమ్మెల్యేకే కేటాయించడన్ని చందర్రావు, శశిధర్ రెడ్డి వర్గీయులు తీవ్రంగా వ్యతిరేస్తున్నారు.

24/08/2023 12:06(IST)

లాస్య నందితను గెలిపించాలి: మంత్రి తలసాని

సికింద్రాబాద్‌: కులవృత్తులను ప్రోత్సహించి ఆర్థిక చేయూత అందించాలనే ముఖ్య ఉద్దేశంతో.. ‘బీసీ బంధు’ అమలు చేస్తున్నట్లు మంత్రి తలసాని శ్రీనివాస్ యాదవ్ తెలిపారు. సికింద్రాబాద్‌ కంటోన్మెంట్ నియోజకవర్గ పరిధిలో 300 మంది లబ్ధిదారులకు.. బీసీ బంధు చెక్కులను ఆయన అందజేశారు. ఈ కార్యక్రమంలో దివంగత ఎమ్మెల్యే సాయన్న కుమార్తె లాస్య నందిత తదితరులు పాల్గొన్నారు. ఇటీవల లాస్య నందితకు సీఎం కేసీఆర్‌ కంటోన్మెంట్ టికెట్‌ ప్రకటించిన నేపథ్యంలో.. ఆమెను ప్రజలు ఆదరించి గెలిపించాలని మంత్రి కోరారు.

24/08/2023 12:01(IST)

చంద్రయాన్-3లో భాగస్వాములైన తెలుగువారికి లోకేశ్‌ అభినందనలు

అమరావతి: ప్రపంచ అంతరిక్ష రంగంలో దేశం సగర్వంగా తలెత్తుకునేలా.. ఇస్రో ప్రయోగించిన చంద్రయాన్ -3 ప్రాజెక్టులో భాగస్వాములైన తెలుగువారికి తెదేపా జాతీయ ప్రధాన కార్యదర్శి నారా లోకేష్‌ అభినందనలు తెలిపారు. అసోసియేట్‌ ప్రాజెక్టు డైరెక్టర్‌ కల్పన కాళహస్తి, రాడార్ కంట్రోలర్‌ విభాగం జనరల్ మేనేజర్ మాజేటి మురళి, ల్యాండర్ సాఫ్ట్ వేర్ టెస్టింగ్ విభాగం యువ శాస్త్రవేత్త బొల్లు మానసని అభినందించారు. ఈ ప్రాజెక్టులో వివిధ బాధ్యతలు నిర్వహించి మన తెలుగు ప్రతిభను.. జాబిల్లిని తాకేలా చేసిన తెలుగు వారందరినీ పేరుపేరునా అభినందించారు.

24/08/2023 11:45(IST)

మా సత్తా ఏంటో చూపిస్తాం: కూనంనేని

హైదరాబాద్‌: భారాస చేసిన తప్పుతో కుమిలిపోమని, తమ సత్తా ఏంటో చూపిస్తామని సీపీఐ రాష్ట్ర కార్యదర్శి కూనంనేని సాంబశివరావు వెల్లడించారు. సమరశీల పోరాటాలు చేసి గ్రామగ్రామనా పార్టీని బలోపేతం చేస్తామన్నారు. ‘‘సెప్టెంబర్ 11 నుంచి బస్సు యాత్ర చేస్తాం. 17న హైదరాబాద్‌లో భారీ ర్యాలీ నిర్వహించి ఎగ్జిబిషన్ మైదానంలో బహిరంగ నిర్వహిస్తాం. ‘ఇండియా’ కూటమిలో చేరి పొత్తు నుంచి వైదొలిగామని చెబుతున్న భారాస నాయకులు.. ఎందుకు ఒక్క సీటు ఇస్తామని సంప్రదింపులు జరిపారు? వెన్నుపోటు ఎలా పొడవాలి.. అధికారంలోకి ఎలా రావాలన్నదే మీ పని. కేసీఆర్ కనీసం రాజకీయ విలువలు పాటించలేదు’’ అని విమర్శించారు.

24/08/2023 11:21(IST)

భారాస ఎమ్మెల్యే కార్యాలయం ముట్టడికి భాజపా యత్నం.. హనుమకొండలో ఉద్రిక్తత

హనుమకొండలో ఉద్రిక్తత చోటుచేసుకుంది. ఇచ్చిన హామీలు నెరవేర్చలేదంటూ భారాస ఎమ్మెల్యే వినయ్‌భాస్కర్‌ కార్యాలయాన్ని ముట్టడించేందుకు భాజపా శ్రేణులు యత్నించగా పోలీసులు వారిని అడ్డుకున్నారు. దీంతో అక్కడ ఉద్రిక్తత చోటుచేసుకుంది.

24/08/2023 11:10(IST)

తల్లి, చెల్లిని గెంటేసిన వారికి పరువు ఉంటుందా?: దేవినేని

గన్నవరం: తల్లి, చెల్లిని గెంటేసి, బాబాయ్‌ని హత్య చేయించిన వారికి పరువు అంటూ ఉంటుందా? అని మాజీ మంత్రి, తెదేపా నేత దేవినేని ఉమామహేశ్వరరావు ధ్వజమెత్తారు. కృష్ణా జిల్లా వైకాపా నేతలు.. దోచుకున్న డబ్బు కాపాడుకోవటానికి ముఖ్యమంత్రికి దాసోహం అయ్యారని తీవ్ర స్థాయిలో మండిపడ్డారు. వారికి ప్రజలు ఓట్ల రూపంలో తగిన బుద్ధి చెబుతారని హెచ్చరించారు. లోకేశ్‌ యువగళం పాదయాత్రతో వైకాపాకు భయం పట్టుకుందని మాజీ మంత్రి కొల్లు రవీంద్ర అన్నారు. అర్ధరాత్రి కూడా ప్రజల మధ్య లోకేశ్‌ ధైర్యంగా నడుస్తున్నారన్నారు.

24/08/2023 11:02(IST)

ఆటో బోల్తా.. ఆరుగురికి స్వల్ప గాయాలు

గుంటూరు జిల్లా మంగళగిరి మండలం పెదవడ్లపూడి వద్ద ప్రమాదవశాత్తు ఆటో బోల్తా పడింది. ఈ ప్రమాదంలో ఆటోలో ప్రయాణిస్తున్న ఆరుగురికి స్వల్ప గాయాలయ్యాయి. వీరిలో పత్తిపాటి లావణ్య అనే 9 నెలల గర్భిణి ఉన్నారు. ఆమె తెనాలి ఆసుపత్రికి వైద్య పరీక్షల కోసం వెళ్తుండగా ప్రమాదం జరిగింది. అదే సమయంలో మంగళగిరి ఎమ్మెల్యే ఆళ్ల రామకృష్ణారెడ్డి అటు వైపు వెళ్తున్నారు. విషయం తెలుసుకొని గర్భిణిని తన వాహనంలో తెనాలి ప్రభుత్వాస్పత్రికి తరలించారు.

24/08/2023 10:46(IST)

అంపాపురంలో ప్రారంభమైన నారా లోకేశ్‌ పాదయాత్ర.. ప్రత్యక్ష ప్రసారం

తెదేపా జాతీయ ప్రధాన కార్యదర్శి నారా లోకేశ్‌ చేపట్టిన ‘యువగళం’ పాదయాత్ర ఉత్సాహంగా కొనసాగుతోంది. 193వ రోజు గన్నవరం నియోజకవర్గం అంపాపురంలో మొదలైంది. ఈ పాదయాత్రలో నందమూరి రామకృష్ణతో పాటు పలువురు తెదేపా ముఖ్యనేతలు పాల్గొన్నారు.

24/08/2023 10:42(IST)

నేపాల్‌లో ఆరుగురు భారతీయులు మృతి

ఖాట్మాండు: నేపాల్‌లోని బారా జిల్లాలో ఘోర రోడ్డు ప్రమాదం జరిగింది. ఈ దుర్ఘటనలో ఏడుగురు మృతి చెందారు. మరో 19 మంది తీవ్రంగా గాయపడ్డారు. మృతుల్లో ఆరుగురు భారతీయులు ఉన్నట్లు అక్కడి అధికారులు తెలిపారు.

24/08/2023 10:34(IST)

రోడ్డు ప్రమాదంలో ఇద్దరి మృతి

సంగారెడ్డి జిల్లాలో జరిగిన రోడ్డు ప్రమాదంలో ఇద్దరు మృతి చెందారు. కొల్లూరు ఔటర్‌ రింగు రోడ్డుపై ఆగి ఉన్న టిప్పర్‌ను ఓ కంటైనర్‌ ఢీ కొట్టింది. ఈ ఘటనలో ఇద్దరు మృతి చెందారు. మరొకరికి తీవ్ర గాయాలు కాగా, సమీప ఆస్పత్రికి తరలించారు.

24/08/2023 10:26(IST)

మహిళ దారుణ హత్య

ములుగు: సిద్దిపేట జిల్లాలో ఓ మహిళ దారుణ హత్యకు గురైంది. మహిళను గొంతు కోసి, కాళ్లను శరీరం నుంచి వేరు చేశారు. ములుగు మండలం బండమైలారంలో ఈ దారుణ ఘటన జరిగింది. ఘటనాస్థలిని గజ్వేల్‌ ఏసీపీ పరిశీలించారు. కేసు నమోదు చేసి దర్యాప్తు చేపట్టారు. మృతి చెందిన మహిళను వెంకటమ్మ (40)గా గుర్తించారు. వెంకటమ్మ ప్లాస్టిక్‌ సామగ్రి అమ్ముతూ జీవనం కొనసాగిస్తుండగా.. ఆమెకు ముగ్గురు పిల్లలు ఉన్నారు. వెంకటమ్మ భర్త గతంలో మృతి చెందారు.

24/08/2023 09:43(IST)

అమెరికాలో కాల్పుల కలకలం.. పలువురి మృతి

కాలిఫోర్నియా: అగ్రరాజ్యం అమెరికాలో మరోసారి కాల్పుల కలకలం రేగింది. కాలిఫోర్నియాలోని ఆరెంజ్‌ కౌంటీలో ప్రముఖ బైకర్స్‌ బార్‌ వద్ద ఓ దుండగుడు కాల్పులకు తెగబడ్డారు. అమెరికా కాలమానం ప్రకారం.. బుధవారం రాత్రి 7.30 గంటల ప్రాంతంలో ఈ ఘటన జరిగింది. ఈ ఘటనలో పలువురు మృతి చెందినట్లు తెలుస్తోంది. మరికొందరు తీవ్రంగా గాయపడినట్లు అమెరికా మీడియా కథనాలు పేర్కొన్నాయి. నిందితుడు రిటైర్డ్‌ పోలీసు అధికారి అని సమాచారం.

24/08/2023 09:37(IST)

బత్తిని హరినాథ్‌ మృతిపై రేవంత్‌ సంతాపం

బత్తిని సోదరుల్లో ఒకరైన హరినాథ్‌ గౌడ్‌ (84) మృతి పట్ల టీపీసీసీ అధ్యక్షుడు రేవంత్‌ సంతాపం వ్యక్తం చేశారు. ఏటా మృగశిర కార్తె సందర్భంగా చేప మందు పంపిణీ చేస్తూ లక్షలాది మందికి సుపరిచుతులైన హరినాథ్ మరణం తెలంగాణకు తీరని లోటు అన్నారు. ఆయన ఆత్మకు శాంతి చేకూరాలని భగవంతుణ్ని ప్రార్థిస్తున్నట్లు తెలిపారు. వారి కుటుంబానికి ప్రగాఢ సానుభూతి తెలిపారు.

24/08/2023 09:36(IST)

మైలార్‌దేవ్‌పల్లిలో కారు బీభత్సం.. ఒకరి మృతి

మైలార్‌దేవ్‌పల్లి: రంగారెడ్డి జిల్లా మైలార్‌దేవ్‌పల్లిలో కారు బీభత్సం సృష్టించింది. దుర్గానగర్‌ చౌరస్తాలో డివైడర్‌ను ఢీకొని పల్టీలు కొట్టింది. అనంతరం అక్కడే ఆగిఉన్న మరో కారును ఢీకొట్టి రోడ్డుకు అడ్డంగా పడింది. ఈ ప్రమాదంలో కారులో ప్రయాణిస్తున్న డిగ్రీ విద్యార్థి చంద్రశేఖర్‌ మృతిచెందగా.. మరో ఇద్దరికి గాయాలయ్యాయి. క్షతగాత్రులను సమీపంలోని ఆస్పత్రికి తరలించారు. ప్రస్తుతం వారి పరిస్థితి విషమంగా ఉన్నట్లు సమాచారం. విద్యార్థులు మద్యం సేవించి కారు నడిపినట్లు తెలిసింది.

24/08/2023 09:06(IST)

చంద్రమా.. అంతులేని ఆనందమా..

చంద్రయాన్‌-3 ల్యాండింగ్‌ ప్రక్రియను వీక్షించేందుకు బుధవారం జిల్లా వ్యాప్తంగా ప్రభుత్వ, ప్రైవేట్‌ పాఠశాలల్లో ఏర్పాట్లు చేశారు. ఈ కార్యక్రమాన్ని అధ్యాపకులు, విద్యార్థులు ఆసక్తిగా తిలకించారు. విజయవంతం కాగానే చిన్నారులు కేరింతలు కొట్టారు.

24/08/2023 09:05(IST)

చరవాణి వెలుతురులో సేవలు

జగిత్యాల తహసీల్‌ కార్యాలయంలో బుధవారం 2 గంటలపాటు విద్యుత్తు సరఫరా నిలిచిపోగా అత్యవసరమైన ధ్రువపత్రాలు జారీ చేయాల్సి ఉండడంతో తహసీల్దార్‌ చరవాణి వెలుతురులో సంతకాలు చేశారు.

24/08/2023 08:15(IST)

విజయపతాక

భారత అంతరిక్ష పరిశోధన సంస్థ ఇస్రో ప్రతిష్ఠాత్మకంగా చేపట్టిన చంద్రయాన్‌-3 విజయవంతమైన సందర్భంగా చంద్రుడిపై జాతీయ జెండాను ల్యాండర్‌ విక్రమ్‌ ఎగరేసినట్లు కొత్తవలస మండలం కంటకాపల్లి పాఠశాల ఉపాధ్యాయుడు ప్రేమ రామచంద్రరరావు కార్టూన్‌ను వేశారు.

24/08/2023 08:14(IST)

ఎరుపు రంగు సీతాఫలాలు

సీతాఫలాలు అనగానే ఆకుపచ్చని రంగులో ఉండేవి గుర్తొస్తాయి. అనంతగిరి మండలంలోని గుమ్మకోట పంచాయతీ సిల్లమామిడి గ్రామానికి చెందిన లక్ష్మయ్య తోటలో ఎరుపు రంగు సీతాఫలాలు పండుతున్నాయి. మాములుగా సీతాఫలాల తోటలు సాగు చేస్తున్నామని, ఒక చెట్టుకు మాత్రం ఎరుపు రంగులో కాయలు కాస్తున్నాయని ఆయన తెలిపారు. వీటిని పలువురు ఆసక్తిగా తిలకిస్తున్నారు.

24/08/2023 08:14(IST)

తీరంలో కోత.. కలత

విశాఖపట్నం ఆర్కేబీచ్‌లోని ‘చిల్డ్రన్‌ పార్కు’ ప్రాంతం గతంలో అలల తాకిడికి దెబ్బతింది. ఎప్పటికప్పడు ఇసుకను పోస్తున్నా పరిస్థితి మారటం లేదు. ఈ ఏడాది ఫిబ్రవరిలో తవ్వోడ సాయంతో సముద్రంలోని ఇసుకను తోడిపోశారు. ఆరు నెలలకే మళ్లీ సముద్ర అలల తాకిడికి ఇదిగో ఇలా కోతకు గురౌతోంది. శాశ్వత ప్రాతిపదికన ఇక్కడ రక్షణ చర్యలు చేపట్టాలని పలువురు సూచిస్తున్నారు.

24/08/2023 08:14(IST)

కారుమబ్బులు కమ్మేశాయ్‌..

విజయవాడలో బుధవారం ఉదయం నుంచి మధ్యాహ్నం వరకు ఎండ, ఉక్కపోతతో ఉన్న వాతావరణం సాయంత్రం ఒక్కసారిగా చల్లగా మారిపోయింది. నగరాన్ని మేఘాలు దట్టంగా కమ్మేశాయి. ఆపై నిమిషాల వ్యవధిలో జోరు వర్షం కురిసింది. ఇంద్రకీలాద్రి పైనుంచి నగరాన్ని కమ్మేసిన మేఘాలను ‘ఈనాడు’ కెమెరా క్లిక్‌మనిపించిన దృశ్యమిది.

24/08/2023 08:13(IST)

పర్యావరణ పరిరక్షణకై జాగృతి నమూనా

బెంగళూరు (మల్లేశ్వరం) : సైకిల్‌ తొక్కడం ద్వారా కాలుష్యం గణనీయంగా తగ్గిపోతుంది. భూతాపం తగ్గి పచ్చదనం వ్యాపిస్తుంది. శిలాజ ఇంధనాలను వినియోగించుకునే అవసరం ఉండదు. ఈ అంశాలపై జాగృతి కల్పించేందుకు ఖనిజ భవన్‌ సమీపంలో ఈ సైకిల్‌ నమూనాను ఏర్పాటు చేశారు. సైకిల్, దాని క్యారేజీపై భూగోళం నమూనాలను పాదచారి మార్గం పక్కనే ఉన్న చిన్న ప్రహరీపై అమర్చారు. తక్కువ దూరం వాహనాల్లో వెళ్లే వారికి ఈ నమూనా ఆలోచింపజేసేలా ఉంది.

24/08/2023 08:13(IST)

జ్ఞాపకాలు చెదిరిపోకుండా

ఓయూలోని భాషా శాస్త్రం విద్యార్థులు కోర్సు పూర్తికావడంతో బుధవారం ఆర్ట్స్‌ కళాశాల ఆవరణలో సందడిగా గడిపారు. ఒకరినొకరు వీడ్కోలు చెప్పుకున్నారు. జ్ఞాపకాలు నిలిచిపోయేలా అందరూ ఒకేరకం టీషర్టులు ధరించి వాటిపై ఇలా సంతకాలు చేసుకున్నారు.

24/08/2023 08:10(IST)

ఉద్యాన నగరికి లక్ష్మీ కళ

బెంగళూరు (శివాజీనగర), న్యూస్‌టుడే: వరమహాలక్ష్మి పండగను పురస్కరించుకుని నగరంలోని అన్ని మార్కెట్లలో రద్దీ నెలకొంది. పండ్లు, అమ్మవారి విగ్రహాలు, అరటి బోదెలు, వెండితో చేసిన అమ్మవారి ముఖ కవచాలు, చీరలు, పసుపు, కుంకుమలు, పిండి వంటలకు కావలసిన నిత్యావసరాల కొనుగోళ్లకు వినియోగదారులు సిటీ మార్కెట్, మల్లేశ్వరం, బసవనగుడి, చిక్కపేట, యశ్వంతపుర మార్కెట్లకు తరలివచ్చారు. అరటి పండ్లు, యాపిల్, తామరపూలకు వినియోగదారుల నుంచి డిమాండ్‌ వచ్చిందని వ్యాపారులు తెలిపారు. నేటి (గురువారం) నుంచి వాటి విక్రయాలు ఉంటాయని వ్యాపారులు అంచనా వేశారు. వరుసగా సెలవులు ఉండడంతో నగరం చుట్టుపక్కల ప్రాంతాల్లోని తమ సొంత ఊళ్లకు ఎక్కువ మంది తరలివెళ్లారు. ప్రైవేటు ట్రావెల్స్‌లో రెట్టింపు ధరలకు టిక్కెట్లు విక్రయించుకున్నారు. ఆర్టీసీ బస్సుల్లోనూ రద్దీ కనిపించింది.

అల్లు అర్జున్‌ తగ్గేదేలే అని నిరూపించారు: లోకేశ్‌

తాజా వార్తలు (Latest News)

కిషన్‌రెడ్డి హైదరాబాద్‌కు రూపాయి తీసుకు రాలేదు: మంత్రి పొన్నం

‘యానిమల్‌ పార్క్‌’.. ఆ విషయం నేను చెప్పలేను: త్రిప్తి దిమ్రీ

పారిస్‌ ఒలింపిక్స్‌లో హిందీకి అరుదైన గౌరవం

ఆగస్టు 23న.. ఉక్రెయిన్‌ పర్యటనకు ప్రధాని మోదీ..!

భద్రాచలం వద్ద మళ్లీ పెరుగుతున్న గోదావరి నీటి మట్టం

రివ్యూ: బ్లడీ ఇష్క్‌: అవికా గోర్‌ సినిమా థ్రిల్‌ చేసిందా?

సుఖీభవ

చదువు