CUET-UG ఫలితాలు విడుదల.. 22వేల మందికి 100శాతం స్కోర్‌

దిల్లీ: ఉమ్మడి విశ్వవిద్యాలయ ప్రవేశ పరీక్ష(సీయూఈటీ)-యూజీ ఫలితాలు (CUET-UG Results) విడుదలయ్యాయి. ఈ ఫలితాలను జాతీయ పరీక్షల మండలి (NTA) శనివారం విడుదల చేసింది. ఈ పరీక్షలో దాదాపు 22వేలకు పైగా అభ్యర్థులు 100శాతం స్కోరు సాధించినట్లు ఎన్‌టీఏ తెలిపింది. విద్యార్థులు cuet.samarth.ac.in వెబ్‌సైట్‌కి వెళ్లి తమ వివరాలతో లాగిన్‌ అయి ఫలితాలను చూసుకోవచ్చని అధికారులు తెలిపారు.

నాలుగేళ్లకే రెండు పట్టాలు!

అత్యధికంగా ఇంగ్లీష్‌లో 5,685 మంది, ఆ తర్వాత బయాలజీ/బయోటెక్నాలజీ/బయోకెమిస్ట్రీలో 4,850 మంది, ఎకానమిక్స్‌ 2,836 మంది 100 శాతం స్కోరు సాధించారు. ఈ ఏడాది మే 21 నుంచి జూన్‌ 23 వరకు ఈ పరీక్ష (CUET-UG Exam) తొమ్మిది దశల్లో నిర్వహించగా.. దేశవ్యాప్తంగా 387 నగరాలు, విదేశాల్లోని 24 నగరాల్లో దాదాపు 11.11లక్షల మంది ఈ పరీక్షకు హాజరయ్యారు.

44 సెంట్రల్‌ యూనివర్సిటీలు, 12 స్టేట్‌ యూనివర్సిటీలు 11 డీమ్డ్‌ యూనివర్సిటీలు, 19 ప్రైవేటు వర్సిటీలతో కలిపి దేశవ్యాప్తంగా 99 విశ్వవిద్యాలయాల్లో గ్రాడ్యుయేషన్‌ కోర్సుల్లో ప్రవేశాల కోసం గతేడాది నుంచి ఈ పరీక్షను నిర్వహిస్తున్నారు. అభ్యర్థుల పరంగా దేశంలోనే రెండో అతిపెద్ద ప్రవేశ పరీక్ష ఇది.