SSC GD Constable: సీఏపీఎఫ్‌లో 50వేలకు పైగా పోస్టులు.. ఫిజికల్‌ టెస్ట్‌ వాయిదా

దిల్లీ: సాయుధ బలగాల్లో(CAPF) 50,187 కానిస్టేబుల్(జీడీ)/ రైఫిల్‌మ్యాన్/ సిపాయి పోస్టులు భర్తీ విషయంలో సీఆర్‌పీఎఫ్‌ కీలక నిర్ణయం తీసుకుంది. ఈ నెల 24 నుంచి జరగాల్సిన శారీరక సామర్థ్య పరీక్షలను వాయిదా వేస్తున్నట్టు ప్రకటించింది. రాత పరీక్షలో ఉత్తీర్ణులైన అభ్యర్థులకు పీఎస్‌టీ, పీఈటీలను ఏప్రిల్‌ 24 నుంచి మే 8 వరకు నిర్వహించనున్నట్లు ఏప్రిల్‌ 19న సీఆర్‌పీఎఫ్‌ ప్రకటించిన విషయం తెలిసిందే. అయితే,  పాలనాపరమైన కారణాల వల్ల ఈ పరీక్షలను వాయిదా వేస్తున్నట్లు పేర్కొంటూ సీఆర్‌పీఎఫ్‌ డీఐజీ (రిక్రూట్‌మెంట్‌) అధికారిక ప్రకటన విడుదల చేశారు. రీ షెడ్యూల్‌ చేసిన ఈ పరీక్షను మే 1 నుంచి ప్రారంభించనున్నట్టు పేర్కొన్నారు.

రీషెడ్యూల్‌ అయిన ఈ పరీక్షకు కొత్తగా ఈ- అడ్మిట్‌ కార్డులను అందుబాటులో ఉంచనున్నట్టు వెల్లడించారు. అందుకోసం అభ్యర్థులు ఎప్పటికప్పుడు https://rect.crpf.gov.in వెబ్‌సైట్‌లో చెక్‌ చేసుకోలని సూచించించారు.  ఈ-అడ్మిట్‌ కార్డులు ఉంటేనే పరీక్షకు అనుమతిస్తామని ఇదివరకే సీఆర్‌పీఎఫ్‌ స్పష్టంచేసింది.