నాగరాజు సురేంద్రకు కేంద్ర సాహిత్య అకాడమీ పురస్కారం

కరీంనగర్‌ సాంస్కృతికం, న్యూస్‌టుడే: కరీంనగర్‌ జిల్లా ఎలగందుల గ్రామానికి చెందిన డాక్టర్‌ నాగరాజు సురేంద్ర(కలం పేరు ఎలనాగ)కు ‘గాలిబ్‌ నాటి కాలం’ అనే తెలుగు అనువాదానికి కేంద్ర సాహిత్య అకాడమీ పురస్కారం(2023) లభించింది. ఈ మేరకు సాహిత్య అకాడమీ సోమవారం ప్రకటించింది. 1953లో ఎలగందుల గ్రామంలో జన్మించిన ఈయన వృత్తిరీత్యా డాక్టరైనా ప్రవృత్తి రీత్యా కవి, రచయిత, అనువాదకుడు, విమర్శకుడు. 1980 నుంచి 1986 వరకు నైజీరియాలోని ప్రభుత్వ ఆసుపత్రుల్లో, తర్వాత 1989 నుంచి 2012 వరకు ఏపీ వైద్య విధాన పరిషత్‌లో పనిచేసి రాష్ట్రస్థాయి అధికారిగా పదవీ విరమణ పొందారు. ప్రస్తుతం హైదరాబాద్‌లో నివాసముంటున్నారు. ఎన్నో అనువాద రచనలు చేశారు. అందులో ఒకటైన ‘గాలిబ్‌ నాటి కాలం’ అనే  రచనను కేంద్ర సాహిత్య అకాడమీ అవార్డు వరించింది. ఉన్నత పాఠశాల స్థాయి నుంచే ఆయన రచనలు ప్రారంభించారు. వివిధ ప్రక్రియల్లో, అనువాదంలో దాదాపు 38 నవలలు ప్రచురితమయ్యాయి. గతంలో ఎన్నో పురస్కారాలు అందుకున్నారు.