ఉపాధి పనుల్లో పశువులు!

జీలుగుమిల్లి, న్యూస్‌టుడే: ‘ఉపాధి’ పని చేస్తున్న కూలీల చిత్రం ఉండాల్సిన చోట గేదెల చిత్రం అప్‌లోడ్‌ చేశారు.. ఏలూరు జిల్లా జీలుగుమిల్లి మండల ఉపాధి ఉద్యోగులు. ఈ నెల 23న 6 గ్రూపులకు చెందిన సుమారు 60 మంది కూలీలు తాటియాకులగూడెం పంచాయతీ పరిధి బర్రింకలపాడు చెరువు వద్ద పనులు చేశారు. వారికి మస్టర్లు వేసి, పని చేస్తున్న చిత్రాలూ సంబంధిత పేజీలో అప్‌లోడ్‌ చేయాలి. ఈ క్రమంలో ఉద్యోగులు కూలీలకు బదులు చెరువు వద్ద సేద తీరుతున్న గేదెల చిత్రాలు పెట్టారు. ఇలా ఒకటి కాదు.. ఏకంగా 6 పేజీల్లో అలాంటి చిత్రాలనే అప్‌లోడ్‌ చేసి జిల్లా యంత్రాంగానికి పంపారు. మండల స్థాయిలోనూ ఈ తప్పిదాన్ని గుర్తించలేదు.