Phone pay: ఫోన్‌పే నుంచి 6 రుణ పథకాలు

దిల్లీ: ఫోన్‌పే తన ప్లాట్‌ఫామ్‌ మీద 6 విభాగాల్లో సెక్యూర్డ్‌ రుణ పథకాలను అందుబాటులోకి తెచ్చింది. మ్యూచువల్‌ ఫండ్, పసిడి, ద్విచక్రవాహనం, కారు, గృహ/ఆస్తి తనఖా, విద్యా విభాగాల్లో రుణాలు పొందొచ్చని కంపెనీ తెలిపింది. ఇందుకోసం బ్యాంకులతో పాటు టాటా కేపిటల్, ఎల్‌అండ్‌టీ ఫైనాన్స్, హీరో ఫిన్‌కార్ప్, ముత్తూట్‌ ఫిన్‌కార్ప్, డీఎంఐ హౌసింగ్‌ ఫైనాన్స్, హోమ్‌ ఫస్ట్‌ ఫైనాన్స్‌ లాంటి బ్యాంకింగేతర ఆర్థిక సంస్థలు, ఫిన్‌టెక్‌ సంస్థలతో భాగస్వామ్యాన్ని కుదుర్చుకున్నట్లు పేర్కొంది. ప్రస్తుతం 15 భాగస్వామ్య సంస్థలు ఉండగా.. వచ్చే త్రైమాసికం కల్లా ఈ సంఖ్యను 25కు పెంచుకోవాలని ఫోన్‌పే లక్ష్యంగా పెట్టుకుంది. ‘డిజిటల్‌ పద్ధతిలో సెక్యూర్డ్‌ రుణాల మంజూరుపై ఆర్థిక సంస్థలు ఎక్కువగా దృష్టి పెడుతున్నాయి. అందువల్ల ఈ సేవల ప్రారంభానికి ఇదే అత్యుత్తమ సమయం అని భావిస్తున్నామ’ని ఫోన్‌పే లెండింగ్‌ సీఈఓ హేమంత్‌ గలా తెలిపారు.