Paytm: 85% పేటీఎం వాలెట్‌ యూజర్లకు ఇబ్బంది లేదు: శక్తికాంత దాస్‌

దిల్లీ: పేటీఎం పేమెంట్స్‌ బ్యాంక్‌పై (Paytm payments bank) విధించిన ఆంక్షల గురించి ఆర్‌బీఐ (RBI) గవర్నర్‌ శక్తికాంత దాస్‌ మరోసారి స్పందించారు. ఆంక్షల మూలంగా పేటీఎం వాలెట్‌ యూజర్లలో 80-85 శాతం మందికి ఎలాంటి ఇబ్బందీ తలెత్తబోదన్నారు. మిగిలిన 15 శాతం మంది మాత్రం తమ వాలెట్లను నిర్దేశిత గడువులోగా ఇతర బ్యాంకులతో అనుసంధానించుకోవాలని సూచించారు.

పేటీఎం ఎఫెక్ట్‌.. గూగుల్‌ పే, ఫోన్‌పే వైపు యూజర్ల చూపు

పేటీఎం వాలెట్‌ను ఇతర బ్యాంకులతో అనుసంధానించేందుకు మార్చి 15 వరకు గడువు ఉంది. ఇప్పటివరకు తమ వాలెట్లను ఇతర బ్యాంకులతో అనుసంధానం చేయనివారు గడువులోగా పూర్తి చేయాల్సి ఉంటుంది. ఆర్‌బీఐ నిర్దేశించిన గడువు సరిపోతుందని, పొడిగించాల్సిన అవసరం లేదని దాస్‌ స్పష్టంచేశారు. ఇప్పటికే 80-85 శాతం మంది వాలెట్‌ యూజర్లు ఇతర బ్యాంకులకు లింక్‌ చేసుకున్నారని, మిగిలినవారూ వీలైనంత త్వరగా ఆ ప్రక్రియ పూర్తి చేయాలని సూచించారు. ఫిన్‌టెక్‌ సంస్థల అభివృద్ధికి ఆర్‌బీఐ పూర్తి మద్దతునిస్తుందని దాస్‌ పేర్కొన్నారు. తమ చర్య కేవలం పేటీఎం పేమెంట్‌ బ్యాంకుపై మాత్రమేనని తెలిపారు. పేటీఎం యాప్‌ అంశం ఎన్‌పీసీఐ చూసుకుంటుందన్నారు.