Avtar Saini: ఇంటెల్‌ ఇండియా మాజీ చీఫ్‌ అవతార్‌ సైనీ కన్నుమూత

ముంబయి: ప్రముఖ టెక్నాలజీ కంపెనీ ఇంటెల్‌ ఇండియా మాజీ చీఫ్‌ అవతార్‌ సైనీ (Avtar Saini) (68) గురువారం ఉదయం కన్నుమూశారు. నవీ ముంబయి టౌన్‌షిప్‌లో సైక్లింగ్‌ చేస్తున్న సమయంలో ఓ క్యాబ్‌ వచ్చి ఢీకొట్టడంతో తీవ్రంగా గాయపడ్డారు. వెంటనే ఆసుపత్రికి తరలించగా.. అప్పటికే మరణించినట్లు వైద్యులు ధ్రువీకరించారు. క్యాబ్‌ డ్రైవర్‌ని పోలీసులు అదుపులోకి తీసుకున్నారు. కేసు నమోదు చేసి విచారిస్తున్నారు.

సైనీ (Avtar Saini) ఇంటెల్‌ 386, 486 మైక్రోప్రాసెసర్ల అభివృద్ధిలో కీలక పాత్ర పోషించారు. పెంటియం ప్రాసెసర్‌ డిజైన్‌ బృందానికి నేతృత్వం వహించారు. ఇంటెల్‌ దక్షిణాసియా విభాగానికి డైరెక్టర్‌గా వ్యవహరించారు. ఆయన సతీమణి మూడేళ్ల క్రితమే చనిపోయారు. కుమార్తె, కుమారుడు అమెరికాలో నివాసముంటున్నారు.

సైనీ మృతిపై ఇంటెల్ ఇండియా తీవ్ర విచారం వ్యక్తం చేసింది. ఆయన ఓ విజయవంతమైన ఆవిష్కర్తగా, అత్యుత్తమ నాయకుడిగా, విలువైన మెంటార్‌గా గుర్తుండిపోతారని పేర్కొంది.