FD Rates: వడ్డీ రేట్లను సవరించిన యాక్సిస్‌ బ్యాంక్‌

దిల్లీ: ప్రైవేటు రంగానికి చెందిన యాక్సిస్‌ బ్యాంక్‌ తన ఎఫ్‌డీ వడ్డీ రేట్లను 5-20 బేసిస్‌ పాయింట్లు తగ్గించింది. 7-14 రోజుల ఎఫ్‌డీపై సాధారణ డిపాజిటర్లకు 3.50% కనిష్ఠ వడ్డీని, 13 నెలలు ఆపై కాలవ్యవధులకు 7.10% గరిష్ఠ వడ్డీని అందిస్తుంది. ఇదే కాలవ్యవధులపై సీనియర్‌ సిటిజన్లు కనిష్ఠంగా 3.50% నుంచి గరిష్ఠంగా 7.85% మధ్య వడ్డీ రేట్లను పొందొచ్చు.

ఒక సంవత్సరం  నుంచి ఒక సంవత్సరం 4 రోజుల్లో మెచ్యూర్‌ అయ్యే ఎఫ్‌డీలపై బ్యాంకు 5 బీపీఎస్‌ తగ్గించింది. ఇప్పుడు ఈ కాలవ్యవధి డిపాజిట్లపై 6.75% వడ్డీని అందిస్తుంది. ఒక సంవత్సరం 5 రోజుల నుంచి 13 నెలల కంటే తక్కువ వ్యవధిలో మెచ్యూర్‌ అయ్యే డిపాజిట్లపై వడ్డీ రేటు ఇంతకు ముందు 7.10% ఉండేది. ఇప్పుడు 20 బీపీఎస్‌ తగ్గింపుతో 6.80% అందిస్తోంది. 13 నెలల నుంచి రెండేళ్లలోపు డిపాజిట్లపై, బ్యాంకు మునుపటి 7.15% నుంచి 7.10% ఆఫర్‌ చేస్తోంది. 2 సంవత్సరాల నుంచి 30 నెలల లోపు కాలవ్యవధి డిపాజిట్లపై వడ్డీ రేటు 7.20% నుంచి 7.05%కు బ్యాంకు తగ్గించింది. తాజా ఎఫ్‌డీ వడ్డీ రేట్లు 2023, మే 18 నుంచి అమల్లోకి వచ్చాయి. రూ.2 కోట్ల లోపు డిపాజిట్లకు ఈ రేట్లు వర్తిస్తాయి.