బ్యాంక్‌ ఆఫ్‌ బరోడా నికర లాభం రూ.4,775 కోట్లు

ఇంటర్నెట్‌ డెస్క్‌: ప్రభుత్వ రంగానికి చెందిన బ్యాంక్‌ ఆఫ్‌ బరోడా మార్చితో ముగిసిన 4వ త్రైమాసికంలో 168% వృద్ధితో రూ.4,775 కోట్ల స్టాండలోన్‌ నికర లాభాన్ని నమోదు చేసింది. గత సవత్సరం ఇదే త్రైమాసికంలో నికర లాభం రూ.1,779 కోట్లు. త్రైమాసికంలో నికర వడ్డీ ఆదాయం 33.8% పెరిగి రూ.11,525 కోట్లుగా ఉంది. 2023 ఆర్థిక సంవత్సరం నికర వడ్డీ ఆదాయం 26.80% వృద్ధిని నమోదు చేసి రూ.41,355 కోట్లకు చేరుకుంది. బ్యాంకు స్థూల ఎన్‌పీఏ జనవరి-మార్చి కాలంలో 3.79 శాతానికి తగ్గాయి. ఏడాది క్రితం 6.61 శాతంగా ఉంది. 27వ వార్షిక సర్వసభ్య సమావేశంలో 2022-23 ఆర్థిక సంవత్సరానికి ఈక్విటీ షేరుకు రూ.5.50 డివిడెండ్‌ను బ్యాంకు సిఫార్సు చేసింది. 2023, జూన్‌ 30వ తేదీ నాటికి షేర్‌లను కలిగి ఉన్న వాటాదారులు డివిడెండ్‌కు అర్హులు.