Bharti Airtel: ఎయిర్‌టెల్‌ లాభం 1,612 కోట్లు.. 56 లక్షల కొత్త కస్టమర్లు

దిల్లీ: ప్రముఖ టెలికాం సంస్థ భారతీ ఎయిర్‌టెల్‌ (Bharti Airtel) త్రైమాసిక ఫలితాలను ప్రకటించింది. జూన్‌తో ముగిసిన తొలి త్రైమాసికంలో (Q1 results) కంపెనీ రూ.1612 కోట్ల నికర లాభాన్ని ప్రకటించింది. గతేడాదితో ఇదే త్రైమాసికంలోనూ ఇదే స్థాయిలో లాభాన్ని కంపెనీ నమోదు చేసింది. ఆదాయంలో మాత్రం 14 శాతం వృద్ధితో రూ.37,440 కోట్లుగా నమోదు చేసింది.

ఈ త్రైమాసికంలో అన్ని వ్యాపారాల్లో మరోసారి మెరుగైన వృద్ధిని నమోదు చేసినట్లు ఎయిర్‌టెల్‌ మేనేజింగ్‌ డైరెక్టర్‌ గోపాల్‌ విఠల్‌ తెలిపారు. సమీక్షా త్రైమాసికంలో 56 లక్షల మంది కొత్త కస్టమర్లు నెట్‌వర్క్‌లో చేరినట్లు చెప్పారు. అలాగే ఎన్నడూ లేనంతగా పోస్ట్‌పెయిడ్‌ కస్టమర్లూ భారీగా పెరిగినట్లు పేర్కొన్నారు. టెలికాం కంపెనీలు కీలక కొలమానంగా భావించే.. ఆర్పు (వ్యక్తి నుంచి వచ్చే సగటు ఆదాయం) రూ.200కు చేరినట్లు కంపెనీ పేర్కొంది.