China: చైనా ఎగుమతులు 7.6% పెరిగాయ్‌

హాంకాంగ్‌: అమెరికా, ఐరోపాలతో వాణిజ్య ఉద్రిక్తతలున్నప్పటికీ, ఈ ఏడాది మే నెలలో చైనా ఎగుమతులు అంచనాలకు మించి నమోదయ్యాయి. ఆ దేశ వాణిజ్య శాఖ విడుదల చేసిన గణాంకాల ప్రకారం.. మేలో చైనా ఎగుమతులు 7.6% పెరిగి 302.35 బిలియన్‌ డాలర్లుగా నమోదయ్యాయి. 2023 ఏప్రిల్‌ తర్వాత ఇదే అత్యంత వేగవంత వృద్ధి. దిగుమతులు 1.8% పెరిగి 219.73 బిలియన్‌ డాలర్లకు పరిమితమయ్యాయి. విశ్లేషకులు దిగుమతుల్లో 4% వృద్ధిని అంచనా వేశారు. ఎగుమతుల్లో బలమైన వృద్ధి కారణంగా చైనా వాణిజ్య మిగులు మేలో 82.62 బిలియన్‌ డాలర్లకు పెరిగింది. ఏప్రిల్‌లో ఇది 72.35 బిలియన్‌ డాలర్లుగా ఉంది. ఈ ఏడాది మేలో ఎగుమతులు పెరిగినట్లు కనిపించడానికి కిందటేడాది ఇదే నెలలో ఎగుమతుల్లో వృద్ధి తక్కువగా నమోదుకావడం కూడా ఓ కారణమని చెబుతున్నారు. ఈ ఏడాది ఏప్రిల్‌లో చైనా ఎగుమతులు 1.5%, దిగుమతులు 8.4% పెరిగాయి.