Income Tax: పన్ను చెల్లింపుదారులకు చిదంబరం సూచన!

దిల్లీ: బడ్జెట్‌ 2023 (Budget 2023)లో ఆదాయ పన్ను (Income Tax) విధానంలో పలు మార్పుల నేపథ్యంలో వివిధ వర్గాల్లో దీనిపై ప్రధానంగా చర్చ జరుగుతోంది. ఈ నేపథ్యంలో కొత్త, పాత పన్ను విధానాల పేరిట ప్రభుత్వం హడావుడి సృష్టించిందని కేంద్ర మాజీ ఆర్థిక మంత్రి, కాంగ్రెస్ నేత పి.చిదంబరం అన్నారు. తద్వారా ప్రజల వ్యక్తిగత పొదుపు ప్రాధాన్యాన్ని విస్మరించిందని ఆరోపించారు. మెజారిటీ ప్రజలకు ప్రభుత్వం రక్షణ కల్పించలేకపోతున్న తరుణంలో వ్యక్తిగత పొదుపే వారికి సామాజిక భద్రత అని వ్యాఖ్యానించారు. 

పలు వార్తాపత్రికల్లో ఆదాయపన్ను (Income Tax) విధానంపై వచ్చిన కథనాలు, విశ్లేషణనల ఉటంకిస్తూ.. కొత్త విధానంలో ఉన్న రహస్యం బయటపడుతోందని చిదంబరం వ్యాఖ్యానించారు. పన్ను చెల్లింపుదారులు తొందరపడి సొంతంగా ఎలాంటి నిర్ణయానికి రావొద్దని సూచించారు. సరైన లెక్కలు వేసుకోవాలన్నారు. అవసరమైతే ఛార్టెడ్‌ అకౌంటెంట్లను సంప్రదించాలన్నారు. పన్ను విధానం సంక్లిష్టంగా ఉందని ఆయన అన్యాపదేశంగా అభిప్రాయపడ్డారు.

పార్లమెంటులో కేంద్ర ప్రభుత్వం ప్రవేశపెట్టిన పద్దును చిదంబరం బుధవారం కఠోరమైన బడ్జెట్‌గా వ్యవహరించిన విషయం తెలిసిందే. సామాన్యుల అవసరాలు ఎంతమాత్రం పట్టించుకోలేదన్నారు. ప్రభుత్వంపై భరోసా పెట్టుకున్న ప్రజలను మోసం చేశారని ఆరోపించారు. సమాజంలో ఉన్న పేదరికం, నిరుద్యోగం, అసమానతల వంటి పదాల జోలికి కూడా మంత్రి వెళ్లలేదన్నారు. ‘పేద’ అనే మాట దయతో రెండుసార్లు ఉచ్చరించారని వ్యాఖ్యానించారు. ఇతర వాణిజ్య, ఆర్థిక కేంద్రాల నోళ్లు కొట్టి అహ్మదాబాద్‌ను ‘గిఫ్ట్‌ సిటీ’గా మారుస్తున్నారని ఆరోపించారు.