వసూళ్లు 27%.. వదులుకుంది 73%

2023-24 దివాలా ప్రక్రియల్లో రుణ సంస్థల పరిస్థితి ఇది: ఇక్రా

దిల్లీ: నిరర్థక ఆస్తులుగా మారిన రుణాల నుంచి వసూళ్లకు చేపట్టిన దివాలా పరిష్కార ప్రక్రియ, ఆర్థిక సంస్థలకు ఎంతగా ఉపయోగ పడుతోందో ఆలోచించాల్సిన పరిస్థితి ఏర్పడుతోంది. బ్యాంకులు-ఇతర ఆర్థిక సంస్థలు ఇస్తున్న రుణ మొత్తంతో పోలిస్తే, దివాలా పరిష్కార ప్రక్రియ కింద వసూలవుతున్న మొత్తం నాలుగో వంతుకు పరిమితం కావడం ఇందుకు కారణం. 2022-23లో ప్రతి రూ.100 బకాయిల్లో, ఆర్థిక సంస్థలు దివాలా ప్రక్రియ కింద రూ.64 వదులుకోగా, 2023-24లో ఈమొత్తం మరింత అధికమై రూ.73 పోగొట్టుకున్నట్లు రేటింగ్‌ సంస్థ ఇక్రా తెలిపింది. 

• 2022-23లో రుణ సంస్థలకు రావాల్సిన బకాయిల్లో సగటున 36 శాతం రాగా, 2023-24లో ఇది 27 శాతానికి పరిమితమైనట్లు సంస్థ నివేదిక వెల్లడించింది.
• 2023-24లో మొత్తంగా 269 దివాలా పరిష్కార ప్రక్రియలకు జాతీయ కంపెనీ లా ట్రైబ్యునళ్లు  ఆమోదం తెలిపాయి. 2022-23లో ఈ సంఖ్య 189గా ఉంది. 
• కొత్తగా దాఖలైన దివాలా పరిష్కార దరఖాస్తుల సంఖ్య 2022-23లోని 1,263తో పోలిస్తే 2023-24లో 987కు తగ్గింది. 
• కార్పొరేట్‌ దివాలా పరిష్కార ప్రక్రియలో, పలు కారణాల రీత్యా రుణ సంస్థలు తమకు రావాల్సిన మొత్తం బకాయిల నుంచి కొంత మొత్తాన్ని వదులుకోవడం లేదా త్యాగం చేయక (హెయిర్‌కట్‌) తప్పట్లేదు. ఈ మొత్తం మరీ ఎక్కువగా ఉంటుండటంపైనే ఆందోళన వ్యక్తమవుతోందని ఇక్రా హెడ్‌ (స్ట్రక్చర్డ్‌ ఫైనాన్స్‌ రేటింగ్స్‌) అభిషేక్‌ డాఫ్రియా తెలిపారు. 

జాప్యం వల్లే: దివాలా స్మృతి ప్రకారం.. దివాలా పరిష్కార ప్రక్రియను 330 రోజుల్లో పూర్తి చేయాలి. అయితే దివాలా పరిష్కార ప్రక్రియ పూర్తికి పడుతున్న సమయం 2023-24లో సగటున 843 రోజులకు పెరిగింది. న్యాయ వివాదాలు ఇందుకు కారణమవుతున్నాయి. ఆర్థిక సంస్థలు తమకు రావాల్సిన బకాయిల్లో, భారీమొత్తాన్ని వదులుకోవాల్సిన పరిస్థితి ఏర్పడటానికి ఈ పరిణామమూ ఓ కారణమని ఇక్రా తెలిపింది. 2024-25లోనూ రుణ సంస్థలకు వసూళ్ల సగటు 30-35 శాతంగానే కొనసాగొచ్చని అభిప్రాయపడింది. 2023-24లో మొత్తంగా ఎన్‌సీఎల్‌టీ 446 కేసుల్లో లిక్విడేషన్‌ (ఆస్తుల విక్రయానికి) ఆదేశాలు జారీచేసింది. 2022-23లో ఈ సంఖ్య 400గా ఉంది. దివాలా స్మృతి అమల్లోకి వచ్చినప్పటి నుంచి మొత్తం 5,467 దివాలా పరిష్కార ప్రక్రియలు పూర్తి కాగా.. ఇందులో 45% శాతం కేసులు లిక్విడేషన్‌కు దారి తీశాయి.