Elon Musk: రిలాక్స్‌ అయ్యేందుకు ఎలాన్‌ మస్క్‌ ఏం చేస్తారో తెలుసా?

ఇంటర్నెట్‌ డెస్క్‌: చిన్న ఉద్యోగంలోనూ ఎంతో కొంత ఒత్తిడి ఉంటుంది. అలాగే వ్యాపారంలోనూ అంతే. ఇక పెద్ద కంపెనీలను ముందుకు నడిపే వ్యక్తులపై ఎన్ని బరువు బాధ్యతలు ఉంటాయో చెప్పాల్సిన అవసరం లేదు. అయితే, ఎంత ఒత్తిడి ఉన్నా.. ఏదో మార్గంలో రిలాక్స్‌ అయ్యి మానసిక ప్రశాంతతను పొందడం చాలా ముఖ్యం. లేదంటే వర్క్‌ లైఫ్‌ బ్యాలెన్స్‌ దెబ్బతిని అది చివరకు ఆరోగ్యంపై ప్రభావం చూపే ప్రమాదం ఉంది. మరి టెస్లా, ఎక్స్‌, న్యూరాలింక్‌, స్టార్‌లింక్‌.. ఇలా దాదాపు ఓ పది కంపెనీలను నిర్వహిస్తున్న బిలియనీర్‌ ఎలాన్‌ మస్క్‌ (Elon Musk) ఒత్తిడిని ఎలా అధిగమిస్తారు? ఇటీవల ఆయన ఓ పాడ్‌కాస్ట్‌లో స్వయంగా ఈ విషయాన్ని వెల్లడించారు. అదేంటో చూద్దాం..

తన మైండ్‌ ఓ తుపానులా ఉంటుందని మస్క్‌ (Elon Musk) చెప్పారు. పరోక్షంగా అనేక విషయాలపై తాను ఫోకస్‌ చేయాల్సి ఉంటుందని.. అంతా గందరగోళంగా అనిపిస్తుందని వెల్లడించారు. చాలా మంది తనలా ఉండాలనుకుంటారని.. కానీ, అది అంత సులభం కాదని వివరించారు. తనలా ఉండడం అంటే ఏంటో అర్థం చేసుకోలేనివారే అలా అనుకుంటారని వ్యాఖ్యానించారు. అయితే, ఒత్తిడి నుంచి బయటపడేందుకు తాను వీడియో గేమ్స్‌ ఆడతానని వెల్లడించారు. వాటిలోని వర్చువల్‌ ఛాలెంజెస్‌ను ఎదుర్కోవడం ద్వారా తన ఆలోచనల్లో ఉండే గందరగోళాన్ని సమర్థంగా పరిష్కరించే సామర్థ్యం వస్తుందని వివరించారు. వినోదం కోసం ఇప్పటి వరకు చాలా వీడియో గేమ్స్‌ ఆడానని తెలిపారు.

మస్క్‌కు వీడియో గేమ్స్‌ ఆడడం తప్ప మరో హాబీ లేదని ఆయనతో కలిసి ముగ్గురు పిల్లలకు జన్మనిచ్చిన గ్రైమ్స్‌ ఓ సందర్భంలో వెల్లడించారు. అవే ఆయనకు విశ్రాంతినిస్తాయని తెలిపారు. అయితే, వాటిని కూడా మస్క్‌ చాలా సీరియస్‌గా ఆడతారని వివరించారు. మస్క్‌ ఫేవరెట్‌ వీడియో గేమ్‌ ‘ది బ్యాటిల్‌ ఆఫ్‌ పాలిటోపియా’ అని ఆయన సోదరుడు కింబల్‌ మస్క్‌ (Elon Musk) గతంలో ఓ సందర్భంలో వెల్లడించారు. ఇది ఒక నాగరికతను నిర్మించడం, యుద్ధానికి వెళ్లడం గురించిన వ్యూహాత్మక గేమ్ అని తెలిపారు. ఒక సీఈఓకు కావాల్సిన నైపుణ్యాలను నేర్చుకునేందుకు ఈ గేమ్‌ను మస్క్‌ ఓ సాధనంగా భావిస్తారని పేర్కొన్నారు.

మస్క్‌ (Elon Musk) ఇష్టపడే మరో వీడియో గేమ్‌ ‘ఎల్డెన్‌ రింగ్‌’. యుద్ధంపై దృష్టి సారించడం, రాజ్యాన్ని నిర్మించడమే ఈ గేమ్‌ లక్ష్యం. దీన్ని మస్క్‌ అత్యుత్తమైన గేమ్‌గా అభివర్ణించారు. జీవితంతో పాటు వీడియో గేమ్‌లో అంతర్గత శత్రుత్వాన్ని జయించడం అత్యంత సవాల్‌తో కూడుకున్న అంశమని తాజా పాడ్‌కాస్ట్‌లో వివరించారు. తన మెదడును ఒక నిర్దిష్ట స్థితికి తీసుకెళ్లడానికి వీడియో గేమ్స్‌ను సాధనంగా వాడతానని మస్క్‌ వెల్లడించారు.  కఠినమైన గేమ్‌ను ఆడడం వల్ల మెదడు స్థితి ఒక స్థాయికి చేరుతుందని తెలిపారు. గేమ్‌లో ముందుకు వెళుతున్న కొద్దీ పురోగతి సాధిస్తున్న ఫీలింగ్‌ కలుగుతుందని.. అలాగే దాంట్లో గొప్ప కళ దాగి ఉంటుందని.. అద్భుతమైన పజిల్‌ను పరిష్కరించినట్లు అవుతుందని వివరించారు.