Elon Musk: అవే నా ప్రాణాలను కాపాడాయి: ఎలాన్‌ మస్క్‌

వాషింగ్టన్‌: ఆధునిక ఔషధాలు కలిగి ఉండడం నేటి ప్రపంచం చేసుకున్న గొప్ప అదృష్టమని టెస్లా అధినేత ఎలాన్‌ మస్క్‌ ( Elon Musk) అన్నారు. అవే తనను మలేరియా (Malaria) నుంచి రక్షించాయని ఓ ట్వీట్‌లో పేర్కొన్నారు. దీనికి ఆయన తల్లి మే మస్క్ స్పందించారు. ఎలాన్‌ మస్క్‌ ( Elon Musk) మలేరియా బారిన పడిన నాటి రోజులను గుర్తు చేసుకున్నారు.

‘‘నిజం చెప్పాలంటే.. ఆధునిక ఔషధాలు కలిగి ఉండడం మన అదృష్టం. క్లోరోక్వైన్‌, డాక్సీసిక్లైన్ (chloroquine & doxycycline) గనక ఇచ్చి ఉండకపోతే నేను మలేరియా (Malaria) వల్ల మరణించి ఉండేవాణ్ని. అయినప్పటికీ.. ఔషధాలను పవిత్రంగా భావించడానికి బదులు వాటిని మనం ఎప్పుడూ ప్రశ్నిస్తూనే ఉండాలి. శాస్త్ర విజ్ఞాన పునాదులే ప్రశ్నించడంపై ఉన్నాయి. తద్వారా వాస్తవానికి చేరువయ్యే ప్రయత్నం చేయాలి’’ అని మస్క్‌ ట్విటర్‌లో రాసుకొచ్చారు.

దీనికి ఆయన తల్లి మే మస్క్‌ స్పందిస్తూ.. ‘‘నీకు (ఎలాన్‌ మస్క్‌) మలేరియా సోకడం నాకు స్పష్టంగా గుర్తుంది. ఆ సమయంలో అపస్మారక స్థితిలోకి వెళ్లావు. కొన్ని రోజుల పాటు వణికిపోయావు. నీ శరీరంలోకి అనేక ట్యూబులను అమర్చారు. అది చాలా భయంకరమైన కాలం. ఆధునిక ఔషధాలే నిన్ను రక్షించాయి’’ అని ట్వీట్‌ చేశారు.