డేటా ఛార్జీల పెరుగుదల ఆందోళనకరమే

కేంద్ర ఐటీ మంత్రి రాజీవ్‌ చంద్రశేఖర్‌

దిల్లీ: డేటా ఛార్జీలు, స్మార్ట్‌ఫోన్‌ ధరల పెరుగుదల ఆందోళన కలిగించే అంశమని, డిజిటలీకరణ వేగానికి ఇవి ప్రతిబంధకంగా మారే అవకాశం ఉందని కేంద్ర ఎలక్ట్రానిక్స్‌, ఐటీ మంత్రి రాజీవ్‌ చంద్రశేఖర్‌ పేర్కొన్నారు. దేశంలో రెండో అతిపెద్ద టెలికాం సంస్థ ఎయిర్‌టెల్‌, ప్రీపెయిడ్‌ కనీస రీఛార్జి మొత్తాన్ని రూ.155కు పెంచిన నేపథ్యంలో ఆయన ఈ వ్యాఖ్యలు చేశారు. ‘2025కు 120 కోట్ల మంది భారతీయులను ఆన్‌లైన్‌లోకి తీసుకు రావాలన్న లక్ష్యం ఉంది. ప్రస్తుతం ఈ సంఖ్య 83 కోట్లుగా ఉంది. అందువల్ల డేటా ఛార్జీల పెరుగుదలపై దృష్టి పెడతాం’ అని చంద్రశేఖర్‌ అన్నారు. ఇండియా స్టాక్‌ డెవలపర్ల సదస్సులో ఆయన మాట్లాడారు. ఎయిర్‌టెల్‌ ఛార్జీల పెంపుపై ఇంకా పూర్తిగా అధ్యయనం చేయలేదని, దీనిపై ట్రాయ్‌ జరిపే సమీక్ష కోసం చూస్తామని అన్నారు. రష్యా-ఉక్రెయిన్‌ యుద్ధ ప్రభావం వల్ల ప్రపంచవ్యాప్తంగా వివిధ రంగాల్లో ధరల పెరుగుదల ఉందని మంత్రి తెలిపారు. మార్చి కల్లా, మన యూపీఐ, ఆధార్‌ వంటి వ్యవస్థలను అందింపుచ్చుకునేందుకు 5-7 దేశాలు ముందుకు రావొచ్చని అంచనా వేశారు. వీటిలో ఆసియా, ఆఫ్రికా, ఐరోపా, దక్షిణ అమెరికా దేశాలు ఉన్నాయన్నారు.