ప్రీమియం హోటళ్లకు కళ

80% పెరగనున్న ఆదాయం: క్రిసిల్‌ నివేదిక అంచనా

ముంబయి: ప్రీమియం హోటళ్లు కళకళలాడనున్నాయి. ముఖ్యంగా ఆదాయం విషయంలో రాణించనున్నాయి. ప్రస్తుత ఆర్థిక సంవత్సరంలో 80%, వచ్చే ఆర్థిక సంవత్సరంలో 15-20% మేర వృద్ధి చెందనున్నట్లు క్రిసిల్‌ తన నివేదికలో పేర్కొంది. విహార, కార్పొరేట్‌, ఎమ్‌ఐసీఈ (సమావేశాలు, ప్రోత్సాహకాలు, కాన్ఫరెన్స్‌లు, ప్రదర్శనలు), అంతర్జాతీయ ప్రయాణాలు పెరగడంతో ప్రీమియం హోటళ్లలో దశాబ్దంలోనే అత్యధిక ఆక్యుపెన్సీ కనిపిస్తోందని క్రిసిల్‌ మార్కెట్‌ ఇంటలిజెన్స్‌ నివేదిక చెబుతోంది. అందులోని ముఖ్యాంశాలు..

* గిరాకీ పెరగడంతో సగటు గది రేట్లు(ఏఆర్‌ఆర్‌) కరోనా ముందు స్థాయికి చేరాయి. దీంతో ఆపరేటింగ్‌ మార్జిన్లు రికార్డు స్థాయికి చేరుతున్నాయి.

* 2021-22లో ప్రీమియం హోటళ్లలో ఏఆర్‌ఆర్‌ 13% పెరిగింది. 2022-23లో 19-21% పెరగడంతో దశాబ్ద గరిష్ఠస్థాయి రూ.7500-10,000కు చేరుకుంది.

* 2021-22లో ఆక్యుపెన్సీ స్థాయి 50% ఉండగా.. ఈ ఏడాది అది 67-72 శాతానికి చేరింది. ఇది కూడా దశాబ్దపు గరిష్ఠమే. కాగా, 2020-21లో ఏఆర్‌ఆర్‌ 20-25% క్షీణించడంతో పాటు ఆక్యుపెన్సీ 31 శాతానికి పరిమితమైంది.

* ప్రతీకార ప్రయాణాలు (కరోనా సమయం ఇంటికే పరిమితం కావడంతో తర్వాత చేస్తున్న విహారాలు), విరామ, కార్పొరేట్‌, ఎమ్‌ఐసీఈ అంశాల్లో మెరుగుపడడంతో దేశీయ గిరాకీ రాణిస్తోంది.

* విదేశీ పర్యాటకుల సంఖ్య ఇంకా కరోనా ముందు స్థాయిలకు చేరలేదు. తొలి 9 నెలల్లో 54 లక్షలు లేదా కరోనా ముందు స్థాయిలో 70% మాత్రమే నమోదైంది. అయితే 2023-24లో 100 శాతానికి చేరొచ్చని అంచనా.

* కాగా, ప్రస్తుత రికవరీలో ప్రీమియం హోటళ్లలోనే అధిక ఏఆర్‌ఆర్‌, ఆక్యుపెన్సీ కనిపిస్తోంది. బడ్జెట్‌ హోటళ్లలో మాత్రం తగ్గుతోంది.