చదరపు అడుగు రూ.1.36 లక్షలు

హైదరాబాద్‌లో చదరపు అడుగు రూ.5-16 వేల వరకు ఉంది. అయితే ముంబయిలో చదరపు అడుగు రూ.1.36 లక్షల చొప్పున ఒక విలాసవంత అపార్టుమెంటులో ట్రిప్లెక్స్‌ అమ్ముడుపోయిందని ఆంగ్ల పత్రికలు పేర్కొన్నాయి. దక్షిణ ముంబయిలోని మలబార్‌ హిల్‌లో రూ.369 కోట్లకు లగ్జరీ ట్రిప్లెక్స్‌ అపార్ట్‌మెంట్‌ను ఔషధ ఉత్పత్తుల సంస్థ ఫామీ కేర్‌ అధిపతి జేపీ తపారియా కుటుంబ సభ్యులు కొనుగోలు చేశారు. లోధా గ్రూప్‌ సంస్థ మ్యాక్రోటెక్‌ డెవలపర్స్‌ ఈ అపార్ట్‌మెంట్‌ను విక్రయించింది. అత్యంత విలాసవంత గృహ సముదాయమైన లోధా మలబార్‌లో 26, 27, 28 అంతస్తుల్లో ఈ ఫ్లాట్‌ విస్తరించి ఉంది. ఈ ట్రిప్లెక్స్‌ మొత్తం విస్తీర్ణం 27,160 చదరపు అడుగులు. దీనికి రూ.369 కోట్ల ధర అంటే ఒక చదరపు అడుగు విలువ రూ.1.36 లక్షలుగా ఉంది.