భారతీయ సంస్థలతో భాగస్వామ్యానికి ఐఏజీ కార్గో ఆసక్తి

దిల్లీ: భారత్‌లో వృద్ధి అవకాశాలపై సానుకూల ధోరణితో ఉన్న ఐరోపా దిగ్గజ సంస్థ ఐఏజీ కార్గో, ఇక్కడి క్యారియర్లు, లాజిస్టిక్స్‌ సంస్థలతో భాగస్వామ్యం కుదుర్చుకునేందుకు ఆసక్తిగా ఉంది. ఇక్కడి సంస్థల నుంచి సరైన అవకాశం లభిస్తే కలిసి పని చేసేందుకు సిద్ధంగా ఉన్నామని ఐఏజీ కార్గో సీఈఓ డేవిడ్‌ షెపర్డ్‌ వెల్లడించారు. ఐరోపాకు చెందిన ఐఏజీ కార్గో 5 విమానయాన సంస్థలకు సంబంధించిన సరకు రవాణా వ్యాపారాన్ని నిర్వహిస్తోంది. అంతర్జాతీయ ఎగుమతుల్లో భారత్‌ నుంచి ఈ సంస్థకు సుమారు 10 శాతం ఆదాయం లభిస్తోంది. బ్రిటిష్‌ ఎయిర్‌వేస్‌, ఐబెరియా కార్గోతో పాటు స్పానిష్‌ క్యారియర్లు వ్యూలింగ్‌, లెవెల్‌, ఐర్లండ్‌కు చెందిన ఎయిర్‌ లింగస్‌ కార్గోల వ్యాపారాన్ని ఐఏజీ కార్గో నిర్వహిస్తోంది. భారతీయ విపణి నుంచి అత్యధికంగా ఔషధ, ఇ-కామర్స్‌ రంగాల నుంచి సరకు రవాణా అవకాశాలు బాగున్నాయని, ఇక్కడి క్యారియర్లు, లాజిస్టిక్‌ సంస్థలతో భాగస్వామ్యంతో వృద్ధికి అవకాశాలు బాగున్నాయని డేవిడ్‌ వివరించారు. ప్రస్తుతం భారత్‌-యూకే మధ్య వారానికి 112 విమానాలను ఐఏజీ కార్గో నడుపుతోంది.