రెండో త్రైమాసిక జీడీపీ గణాంకాలు మెరుగ్గానే ఉండొచ్చు

ఆర్థిక వ్యవహారాల కార్యదర్శి

దిల్లీ: ప్రస్తుత ఆర్థిక సంవత్సరం రెండో త్రైమాసికం (జులై-సెప్టెంబరు)లో మనదేశ వృద్ధి రేటు మెరుగ్గానే ఉండే అవకాశం ఉందని ఆర్థిక వ్యవహారాల కార్యదర్శి అజయ్‌ సేథ్‌ బుధవారం తెలిపారు. రెండో త్రైమాసిక  జీడీపీ గణాంకాలు ఈనెల 30న (గురువారం) విడుదల కానున్నాయి. జూన్‌ త్రైమాసికంలో వృద్ధి రేటు 7.8 శాతంగా నమోదైన సంగతి తెలిసిందే. ‘రెండో త్రైమాసికంలో భారత ఆర్థిక వ్యవస్థ మంచి ప్రదర్శనే కనబర్చింది. అందువల్ల గణాంకాలూ బాగానే ఉంటాయ’ని ఇక్కడ జరిగిన ఓ కార్యక్రమంలో పాల్గొన్న సేథ్‌ వెల్లడించారు. వచ్చే అయిదేళ్లకు ఆహార సబ్సిడీకి కేటాయింపును ప్రభుత్వం పెంచినప్పటికీ, ద్రవ్యలోటును 5.9 శాతం లోపునకు నియంత్రించాలనే లక్ష్యాన్ని సాధిస్తామనే నమ్మకం ఉందన్నారు.