స్థిరాస్తిలోకి వచ్చే ఏడాది భారీ పెట్టుబడులు

కొలియర్స్‌ ఇండియా నివేదిక

దిల్లీ: ఆసియా పసిఫిక్‌ ప్రాంతం (ఏపీఏసీ)లో భారత్‌, దక్షిణ కొరియాలలోని వివిధ స్థిరాస్తి ప్రాజెక్టుల్లోకి విదేశీ పెట్టుబడులు వస్తాయని స్థిరాస్తి కన్సల్టెంట్‌ సంస్థ కొలియర్స్‌ ఇండియా అంచనా వేసింది. ఈ రెండు కీలక మార్కెట్లలో వృద్ధికి ఉన్న అవకాశాలను అందిపుచ్చుకోవాలని అంతర్జాతీయ మదుపర్లు భావిస్తుండడమే ఇందుకు కారణమని ‘2024 గ్లోబల్‌ ఇన్వెస్టర్‌ అవుట్‌లుక్‌’ నివేదికలో పేర్కొంది. అందులోని ముఖ్యాంశాలు..

• భారత్‌, దక్షిణ కొరియా వంటి వృద్ధి ఆధారిత ప్రాంతాల స్థిరాస్తిలో అధిక కార్యకలాపాలు కనిపించొచ్చు. మదుపర్ల విశ్వాసం తిరిగి పుంజుకోవడం, అవకాశాలూ పెరుగుతుండటం ఇందుకు కారణాలుగా నిలవవచ్చు.
• ప్రపంచంలోనే అత్యంత వేగవంతమైన వృద్ధిని సాధిస్తున్న ప్రధాన ఆర్థిక వ్యవస్థల్లో ఒకటిగా భారత్‌ కొనసాగుతుందని అంచనా. ఇందుకు ప్రైవేటు వినియోగం, మూలధన పెట్టుబడులు సహకరించొచ్చు.
• 2023 తొలి తొమ్మిది నెలల్లో స్థిరాస్తిలోకి సంస్థాగత పెట్టుబడులు 27 శాతం పెరిగాయి.
• పారిశ్రామిక, నివాస విభాగాల ఒప్పందాల్లో మంచి వృద్ధి కనిపిస్తోంది.
• భారత డేటా కేంద్రాలపై సంస్థాగత మదుపర్లు దృష్టి సారించారు. వీటి నుంచి స్థిరాదాయం, అధిక ప్రతిఫలాలు వస్తుండడంతో పాటు, నియంత్రణల పరంగా మద్దతు లభిస్తుండడంతో 2020 నుంచి ఈ విభాగంలోకి 1.1 బిలియన్‌ డాలర్ల పెట్టుబడులు వచ్చాయి.
• మరింత మంది సంస్థాగత మదుపర్లు, నిధులు భారత్‌లోకి వచ్చే అవకాశాలు పుష్కలంగా ఉన్నాయి. డేటా కేంద్రాలతో పాటు కార్యాలయాలు, రవాణా వ్యవస్థలు, నివాస గృహాల వంటి పలు విభాగాల్లో పెట్టుబడి అవకాశాలు కనిపిస్తున్నాయి.