యూకో బ్యాంక్‌ ఖాతాదారుల్లో డబ్బుల జమ కేసులో సీబీఐ తనిఖీలు

దిల్లీ: యూకో బ్యాంకుకు చెందిన 41,000 మంది ఖాతాదార్ల ఖాతాల్లోకి  మొత్తంగా రూ.820 కోట్లు జమ అయిన వ్యవహారంపై సీబీఐ ఎఫ్‌ఐఆర్‌ నమోదుచేసింది. నవంబరు 10- 13 మధ్య జరిగిన ఈ ఘటనలో ఆశ్చర్యకరంగా ఏ ఖాతాల నుంచి నగదు బదిలీ జరిగిందో, ఆ ఖాతాల్లో డబ్బు డెబిట్‌ కాకపోవడం గమనార్హం. ఈ వ్యవహారానికి సంబంధించి కోల్‌కతా, మంగళూరు సహా పలు నగరాల్లోని 13 ప్రాంతాల్లో సీబీఐ తనిఖీలు నిర్వహించినట్లు అధికారులు తెలిపారు. మూడు రోజుల్లో ప్రైవేట్‌ బ్యాంకులకు చెందిన 14,000 ఖాతాల నుంచి 8.53 లక్షల ఐఎంపీఎస్‌ లావాదేవీల ద్వారా ఈ డబ్బులు యూకో బ్యాంకు ఖాతాదారుల ఖాతాల్లోకి వచ్చాయని తెలిపారు. ఈ డబ్బులను కొంత మంది వారి ఖాతాల నుంచి ఉపసంహరించుకున్నారని పేర్కొన్నారు. దీనిపై ఇద్దరు సపోర్టు ఇంజినీర్లు, మరికొందరిపై యూకో బ్యాంకు ఫిర్యాదు చేయడంతో సీబీఐ ఎఫ్‌ఐఆర్‌ నమోదుచేసింది. తనిఖీల్లో మొబైల్‌ ఫోన్లు, ల్యాప్‌టాప్‌లు, కంప్యూటర్‌ సిస్టమ్‌లు, ఇ-మెయిల్‌లు, డెబిట్‌, క్రెడిట్‌ కార్డులు లాంటి ఎలక్ట్రానిక్‌ సాక్ష్యాలను స్వాధీనం చేసుకున్నట్లు అధికారులు వెల్లడించారు. .