2025కు పునరుత్పాదక ఇంధన సామర్థ్యం 170 గిగా వాట్లకు: ఇక్రా

దిల్లీ: దేశంలో పునరుత్పాదక ఇంధన సామర్థ్యం 2025 నాటికి  170 గిగా వాట్లకు చేరుకుంటుందని ఇక్రా వైస్‌ ప్రెసిడెంట్‌, సెక్టార్‌ హెడ్‌ - కార్పొరేట్‌ రేటింగ్స్‌ వి.విక్రమ్‌ అంచనా వేశారు. ప్రస్తుతం దేశీయ పునరుత్పాదక ఇంధన సామర్థ్యం 130 గిగా వాట్లుగా ఉంది. బలమైన విధాన మద్దతు, సౌర మాడ్యూళ్ల ధరలు అందుబాటులోకి రావడంతో, 2025 నాటికి పునరుత్పాదక ఇంధన సామర్థ్యం 170 గిగా వాట్లకు చేరుతుందని విక్రమ్‌ పేర్కొన్నారు. గత 12 నెలల్లో సౌర పీవీ సెల్‌, మాడ్యూళ్ల ధరలు వరుసగా 65 శాతం, 50 శాతం  తగ్గాయని వివరించారు. రాబోయే సౌర విద్యుత్‌ ప్రాజెక్టులు ఆరోగ్యకర వృద్ధిని సాధించేందుకు ఇది దోహదం చేయనుందని అభిప్రాయపడ్డారు. 2023 మార్చిలో ప్రభుత్వం ప్రకటించిన 50 గిగా వాట్ల వార్షిక బిడ్డింగ్‌లో భాగంగా, ఈ ఆర్థిక సంవత్సరంలో ఇప్పటికే 16 గిగా వాట్లకు పైగా ప్రాజెక్టుల టెండరింగ్‌ కార్యకలాపాలు పూర్తయ్యాయి. మరో 17 గిగా వాట్ల బిడ్లు కేంద్ర నోడల్‌ ఏజెన్సీల ఆధ్వర్యంలో నడుస్తున్నాయి.