సంస్థల్లో నియామకాలు 12% తగ్గాయ్‌

నౌకరీ జాబ్‌స్పీక్‌ సూచీ నివేదిక

దిల్లీ: వేర్వేరు రంగాల కార్యాలయాల్లో  నైపుణ్యంతో కూడిన (వైట్‌-కాలర్‌) ఉద్యోగాల నియామకాలు గత 2 నెలల్లో తగ్గినట్లు నౌకరీ జాబ్‌స్పీక్‌ సూచీ నివేదిక వెల్లడించింది. ఇందుకు సంబంధించిన ఉద్యోగ పోస్టింగ్‌లు 2022 అక్టోబరు, నవంబరులో 2781 కాగా,  ఈ ఏడాది అదే సమయంలో 12 శాతం తగ్గి 2,433 కు పరిమితమయ్యాయని తెలిపింది. ఐటీ-సాఫ్ట్‌వేర్‌, టెలికాం, విద్యా రంగాల్లో ఉద్యోగ నియామకాలు తగ్గాయని పేర్కొంది. టెలికాంలో 18%, విద్యారంగంలో 17%, రిటైలింగ్‌లో 11% చొప్పున నియామక పోస్టింగులు తగ్గాయని వివరించింది. ఆతిథ్యం, ప్రయాణ, వాహన, వాహన విడిభాగాల రంగాల్లో నియామకాలు స్తబ్దుగా సాగాయని నివేదిక తెలిపింది.

వీటిల్లో పెరిగాయ్‌: చమురు-గ్యాస్‌ రంగాల్లో 9%,  ఔషధ రంగంలో 6%, బీమా రంగంలో 5% చొప్పున కొత్త ఉద్యోగాలు వృద్ధి చెందాయని పేర్కొంది. ఐటీయేతర రంగాలైన చమురు-గ్యాస్‌, ఔషధ, బీమా రంగాలు పండుగ సీజన్‌లో ఆరోగ్యకర వృద్ధి సాధించాయని తెలిపింది. ఐటీ రంగంలో 22% ఉద్యోగాలు తగ్గాయని నౌకరీ.కామ్‌ ముఖ్య వ్యాపార అధికారి పవన్‌ గోయల్‌ వెల్లడించారు. అయితే కృత్రిమ మేధ (ఏఐ) ఆధారిత రంగాలైన మెషీన్‌ లెర్నింగ్‌ ఇంజినీర్‌, ఫుల్‌ స్టాక్‌ డేటా శాస్త్రవేత్తల ఉద్యోగాలు వరుసగా 64%, 16% చొప్పున పెరిగాయని నివేదిక తెలిపింది.

నగరాల వారీగా..: మెట్రోయేతర నగరాల్లోనే అధికంగా నియామకాలు జరిగాయని నౌకరీ.కామ్‌ నివేదిక పేర్కొంది. ఈ నివేదిక ప్రకారం.. వడోదరలో 9% వృద్ధి కనిపించింది. దిల్లీ-ఎన్‌సీఆర్‌, ముంబయి వంటి మెట్రో నగరాల్లో 12% క్షీణత నమోదైంది. ఐటీ ఆధారిత నగరాలైన బెంగళూరు, హైదరాబాద్‌, చెన్నై, పుణెలలో వరుసగా 20%, 18%, 21%, 18 శాతం చొప్పున నియామక పోస్టింగులు తగ్గాయి. 16 ఏళ్లకు పైగా అనుభవం ఉన్న సీనియర్‌ వృత్తి నిపుణులకు గత రెండు నెలల్లో గిరాకీ 26% పెరిగింది. ఇదే సమయంలో తాజా ఉత్తీర్ణుల (ఫ్రెషర్లు) విభాగంలో 13% క్షీణత కనిపించింది.