ప్చ్‌.. ఉద్యోగం వదిలేస్తోంది మహిళలే

వ్యక్తిగత, వృత్తి జీవితాన్ని సమతుల్యం చేయలేకే
పురుషుల్లో వైదొలగుతున్న వారు 4 శాతమే

దిల్లీ: వ్యక్తిగత జీవితం, వృత్తిపరమైన బాధ్యతల మధ్య సమతౌల్యం చేసుకోలేక మహిళలే అత్యధికంగా ఉద్యోగాలను వదిలేస్తున్నారని ఒక నివేదిక తేల్చింది. మహిళల్లో 34% మంది ఉద్యోగాలను ఈ కారణం చేతనే విడిచిపెట్టారని, మగవారిలో ఈ సంఖ్య 4 శాతమేనని పేర్కొంది. గోద్రేజ్‌ డెయి ల్యాబ్స్‌, సెంటర్‌ ఫర్‌ ఎకనమిక్‌ డేటా అండ్‌ అనాలసిస్‌, అశోకా యూనివర్శిటీ, డాస్రాల భాగస్వామ్యంతో ఉదైతి ఫౌండేషన్‌ ఈ నివేదికను రూపొందించింది. ఇందుకోసం 200 మంది సీనియర్‌ హెచ్‌ఆర్‌ మేనేజర్ల అభిప్రాయాలను సేకరించారు. ఈ నివేదిక ప్రకారం..

• మహిళలు ఉద్యోగాలను విడిచిపెట్టేందుకు ‘వేతనంపై ఆందోళన, కెరీర్‌ అవకాశాలు, ఉద్యోగ బాధ్యతలు-వ్యక్తిగత జీవితం మధ్య అసమతుల్యత’ ప్రధాన కారణాలుగా ఉన్నాయి. మగవారిలో మొదటి రెండు కారణాలు పైవే కాగా.. మూడో కారణం ఉద్యోగ భవిష్యత్తుపై ఆందోళన అని నివేదిక తెలిపింది. మహిళలు ఉద్యోగాలను విడిచిపెట్టకుండా అవసరమైన విధానాలు తీసుకొస్తే.. ఈ సమస్యకు పరిష్కారం చూపినట్లు అవుతుందని వివరించింది.
• నియామకాల సమయంలో మహిళల వైవాహిక స్థితి, వయసును హెచ్‌ఆర్‌ మేనేజర్లు ప్రధానంగా గమనిస్తున్నారని, మహిళల నియామకానికి ఇవి ప్రధానంగా అడ్డంకులుగా మారుతున్నాయని పేర్కొంది. మహిళల వైవాహిక స్థితిని పరిగణనలోకి తీసుకుంటామని 38% మంది హెచ్‌ఆర్‌ మేనేజర్లు వెల్లడించగా.. పురుష అభ్యర్థుల విషయంలో ఇది 22 శాతంగానే ఉంది.
• మగవారితో పోలిస్తే మహిళల విషయంలో వయసు, నివాస ప్రాంతాలనూ కాస్త ఎక్కువగానే పరిగణనలోకి తీసుకుంటున్నారు. మహిళల వయసును 43% మంది, నివాస ప్రాంతాన్ని 26% మంది హెచ్‌ఆర్‌ మేనేజర్లు పరిగణనలోకి తీసుకుంటామని చెప్పారు. మగవారిలో ఇది వరుసగా 39%; 21 శాతంగా ఉంది.
• లైంగిక వేధింపుల నియంత్రణ చట్టం కింద ఇంటర్నల్‌ కంప్లయింట్స్‌ కమిటీని ఏర్పాటు చేయడం తప్పనిసరి అయినప్పటికీ.. ఆ నిబంధనను తమ కంపెనీలు పాటించడం లేదని సర్వేలో పాల్గొన్న వారిలో 59% మంది వెల్లడించడం గమనార్హం. మహిళలపై లైంగిక వేధింపుల సమస్యను నియంత్రించడంలో అలసత్వాన్ని ఇది సూచిస్తోందని నివేదిక అభిప్రాయపడింది.