జీమెయిల్‌ మూసివేస్తారంటూ ప్రచారం

సేవలు యథాతథంగా కొనసాగుతాయని గూగుల్‌ స్పష్టత

గూగుల్‌కు చెందిన ఇ-మెయిల్‌ సర్వీస్‌ జీమెయిల్‌ సేవలను నిలిపివేస్తారంటూ సామాజిక మాధ్యమాల్లో పోస్టులు చక్కర్లు కొడుతున్నాయి. ఆగస్టు 1 నుంచి ఈ సేవలు నిలిచిపోనున్నాయన్నది ఆ పోస్టుల సారాంశం. దీనిపై గూగుల్‌ స్పష్టత ఇచ్చింది. ఈ సేవలు యథాతథంగా కొనసాగుతాయని వెల్లడించింది. జీమెయిల్‌ త్వరలో మూతపడబోతోందని, 2024 ఆగస్టు 1 నుంచి ఈ సర్వీసులు నిలిచిపోనున్నాయంటూ ఓ స్క్రీన్‌షాట్‌ సామాజిక మాధ్యమాల్లో కొన్ని రోజులుగా చక్కర్లు కొడుతోంది. దీంతో చాలామంది జీమెయిల్‌ వినియోగదార్లు ఆందోళన వ్యక్తం చేశారు. ఈ నకిలీ ప్రచారంపై గూగుల్‌ స్పందించింది. జీమెయిల్‌ అధికారిక ఎక్స్‌ ఖాతా ద్వారా ‘ఈ సేవలు కొనసాగుతాయి’ అంటూ ఓ పోస్ట్‌ పెట్టింది. వాస్తవానికి ఈ ఏడాది జనవరి నుంచి జీమెయిల్‌ తన హెచ్‌టీఎంఎల్‌ వెర్షన్‌ సర్వీసులను మాత్రమే నిలిపివేసింది. నెట్‌వర్క్‌ సరిగా లేని సమయంలోనూ ఇ-మెయిల్స్‌ పొందడం ఈ సర్వీసుల ఉద్దేశం.