అక్టోబరు- డిసెంబరులో జీడీపీ వృద్ధి 6.7- 6.9%

జులై- సెప్టెంబరుతో పోలిస్తే నెమ్మదించొచ్చు: ఎస్‌బీఐ రీసెర్చ్‌ అంచనా

దిల్లీ: ప్రస్తుత ఆర్థిక సంవత్సరం (2023-24) అక్టోబరు- డిసెంబరులో దేశ వృద్ధిరేటు 6.7- 6.9 శాతంగా నమోదయ్యే అవకాశం ఉందని స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) రీసెర్చ్‌ నివేదిక అంచనా వేసింది. జులై- సెప్టెంబరు వృద్ధిరేటు 7.6% కంటే ఇది తక్కువే కావడం గమనార్హం. వ్యవసాయ రంగం పేలవ పనితీరు కనబర్చడమే ఇందుకు కారణంగా నివేదిక పేర్కొంది. గత ఆర్థిక సంవత్సరం (2022-23) అక్టోబరు- డిసెంబరు వృద్ధి రేటు 4.5 శాతంతో పోలిస్తే మాత్రం ఇది ఎక్కువే. ప్రభుత్వ కేటాయింపులు పెరగడం, తయారీ రంగం రాణించడం వల్ల జులై- సెప్టెంబరులో అంచనాలకు మించి 7.6% వృద్ధి రేటు నమోదైంది. తద్వారా ప్రపంచంలో అత్యంత వేగంగా వృద్ధి చెందుతున్న దిగ్గజ ఆర్థిక వ్యవస్థగా భారత్‌ తన హవా కొనసాగించింది. డిసెంబరు త్రైమాసికంలో 7% వృద్ధి లభించొచ్చని ఆర్‌బీఐ అంచనావేయగా, ఎస్‌బీఐ రీసెర్చ్‌ అంచనా అంతకన్నా తక్కువగా ఉంది.

వ్యవసాయ రంగం వల్లే..: మత్స్య రంగం మినహా మిగతా వ్యవసాయ విభాగాల పనితీరు బాగాలేనందునే ఆర్థిక వ్యవస్థ వృద్ధి నెమ్మదించడానికి కారణంగా నివేదిక పేర్కొంది. మొదటి ముందస్తు అంచనాల ప్రకారం.. 2023-24కు ప్రధాన ఖరీఫ్‌ పంటల ఉత్పత్తి 148.5 మిలియన్‌ టన్నులుగా ఉండొచ్చు. 2022-23 (ఏప్రిల్‌- మార్చి)తో పోలిస్తే ఇది 4.6% తక్కువ అని నివేదిక వెల్లడించింది. కార్పొరేట్‌ కంపెనీలు మెరుగైన పనితీరును కనబర్చడం కలిసిరావచ్చని తెలిపింది. సుమారు 4,000 నమోదిత కంపెనీల నుంచి సేకరించిన వివరాల ప్రకారం.. 2022-23 అక్టోబరు- డిసెంబరుతో పోలిస్తే 2023-24 అక్టోబరు- డిసెంబరులో కార్పొరేట్‌ కంపెనీల లాభాలు 30%, ఆదాయం 7% పెరిగాయని నివేదిక పేర్కొంది. బీఎఫ్‌ఎస్‌ఐ (బ్యాంకింగ్‌, ఆర్థిక సేవలు, బీమా) మినహా 3000 నమోదిత కంపెనీల ఆర్థిక ఫలితాలను పరిశీలిస్తే.. మార్జిన్లు 12% నుంచి 14.95 శాతానికి పెరిగాయని వెల్లడించింది. భౌగోళిక రాజకీయ ఉద్రిక్తతలు, సరఫరా అవరోధాల ప్రభావం భారత ఆర్థిక వ్యవస్థపై పెద్దగా ఉండకపోవచ్చని పేర్కొంది.