భారత్‌లో 7.4 కోట్ల బెదిరింపులను నిరోధించాం

అంతర్జాతీయ సైబర్‌ భద్రతా సంస్థ కాస్పర్‌స్కై

దిల్లీ: గత ఏడాది భారత్‌లోని 34 శాతం మంది వినియోగదార్లను స్థానిక బెదిరింపుల ద్వారా లక్ష్యంగా చేసుకున్నారని, తన ఉత్పత్తులు ఇలాంటి 7.43 కోట్ల స్థానిక సంఘటలను గుర్తించి నిరోధించాయని అంతర్జాతీయ సైబర్‌ భద్రత, డిజిటల్‌ గోప్యతా సంస్థ కాస్పర్‌స్కై తెలిపింది. నేరుగా వినియోగదార్ల కంప్యూటర్లు లేదా వాటికి అనుసంధానం చేసి తీసివేసే ఫ్లాష్‌ డ్రైవ్‌లు, కెమేరా మెమొరీ కార్డ్‌లు, ఫోన్లు, ఎక్స్‌టర్నల్‌ హార్డ్‌ డ్రైవ్‌లలో హానికరమైన ప్రోగ్రామ్‌లను గుర్తించినట్లు పేర్కొంది. ప్రపంచ వ్యాప్తంగా కాస్పర్‌స్కై సెక్యూరిటీ నెట్‌వర్క్‌(కేఎస్‌ఎన్‌) వినియోగిస్తున్న దేశాల్లో భారత్‌ 80వ స్థానంలో ఉంది. కాస్పర్‌స్కై ఉత్పత్తులు 7,43,85,324 స్థానిక సంఘటనలను గుర్తించి నిరోధించాయి. భారత సైబర్‌ భద్రతా విపణి 2023లో 6.06 బిలియన్‌ డాలర్ల (సుమారు రూ.50,300 కోట్లు)కు చేరింది. సైబర్‌ బెదిరింపులు, సైబర్‌ భద్రతపై దాడులు ప్రస్తుతం చాలా సంస్థలకు పెద్ద సవాలుగా మారిందని, 67 శాతం భారతీయ సంస్థలు వచ్చే మూడేళ్లలో కీలకమైన ఈ విభాగాన్ని పొరుగు సేవల కింద బయటి సంస్థలకు అప్పగించే అవకాశం ఉందని ఆ కంపెనీ వివరించింది.