Tata Motors: టాటా మోటార్స్‌.. రెండు కంపెనీలుగా

వేర్వేరుగా నమోదుకు బోర్డు ఆమోదం
2 సంస్థల్లోనూ వాటాదార్లకు షేర్లు

దిల్లీ: టాటా మోటార్స్‌ను రెండు వేర్వేరు నమోదిత సంస్థలుగా విభజించాలనే ప్రతిపాదనకు సోమవారం బోర్డు ఆమోదం తెలిపింది. వాణిజ్య వాహనాల వ్యాపారం, దాని సంబంధిత పెట్టుబడులు ఒక సంస్థగా; ప్రయాణికుల వాహనాల (పీవీలు) వ్యాపారాలు, ఈవీలు (విద్యుత్‌ వాహనాలు), జేఎల్‌ఆర్‌ (జాగ్వార్‌ ల్యాండ్‌ రోవర్‌), దాని సంబంధిత పెట్టుబడులు మరొక సంస్థగా విడదీయాలనుకుంటున్నట్లు ఎక్స్ఛేంజీలకు టాటా మోటార్స్‌ సమాచారమిచ్చింది. ఎన్‌సీఎల్‌టీ స్కీమ్‌ ఆఫ్‌ అరేంజ్‌మెంట్‌ కింద ఈ విభజన ప్రక్రియ జరుగుతుందని, టాటా మోటార్స్‌ వాటాదార్లందరికీ ఈ రెండు నమోదిత సంస్థల్లో షేర్లు లభిస్తాయని కంపెనీ తెలిపింది. ‘ప్రస్తుతం 3 వాహన వ్యాపారాలు స్వతంత్రంగా స్థిరమైన పనితీరు ప్రదర్శిస్తున్నాయి. విభజన ద్వారా విపణిలో ఉన్న అవకాశాలను ఒడిసి పట్టుకునేందుకు, ఆయా విభాగాల్లో దృష్టి కేంద్రీకరించేందుకు అవకాశం లభిస్తుంది. వాటాదార్లు, రుణదాతలు, నియంత్రణ సంస్థల అనుమతులు రావడానికి మరో 12-15 నెలల సమయం పట్టొచ్చు. ఈ విభజనతో ఉద్యోగులు, వినియోగదార్లు, మా వ్యాపార భాగస్వాములపై ఎలాంటి ప్రభావం పడద’ని టాటా మోటార్స్‌ ఛైర్మన్‌ ఎన్‌.చంద్రశేఖరన్‌ వెల్లడించారు.